قىتاي حالىق رەسپۋبليكاسىنىڭ Southwest ۋنيۆەرسيتەتىندە قىتاي-قازاقستان مادەني-ءبىلىم بەرۋ ورتالىعى رەسمي تۇردە اشىلدى. ورتالىقتىڭ سالتاناتتى اشىلۋى وسى ىسكە ۇيىتقى بولعان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە ونلاين جۇيەسى ارقىلى كورسەتىلىپ, وعان اتالعان ۋنيۆەرسيتەت جانە Southwest ۋنيۆەرسيتەتىنىڭ ماماندارى قاتىستى.
بيىل ناۋرىز ايىندا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ پەن فيلولوگيا فاكۋلتەتىنىڭ دەكانى شولپان جارقىنبەكوۆا Southwest ۋنيۆەرسيتەتىنە ارنايى بارىپ, كەلىسىمشارت جاساسقان بولاتىن. مىنە, ءۇش اي وتكەن سوڭ قىتاي-قازاقستان مادەني-ءبىلىم بەرۋ ورتالىعى سالتاناتتى تۇردە اشىلىپ, ءوز جۇمىسىن باستاپ كەتتى. بولاشاقتا ەكى ۋنيۆەرسيتەت اراسىنداعى اكادەميالىق ۇتقىرلىق, عىلىمي-زەرتتەۋ قىزمەتى, پروفەسسور-وقىتۋشىلار الماسۋ, قوس ديپلوم باعدارلاماسى وسى ورتالىق ارقىلى جۇزەگە اسپاق.
شارا بارىسىندا فيلولوگيا فاكۋلتەتىنىڭ باسشىسى شولپان جارقىنبەكوۆا ناۋرىز ايىندا تالقىلانعان بارلىق جوسپارلاردىڭ ءساتتى جۇزەگە اسىپ جاتقاندىعىن جەتكىزدى. بۇل ورتالىق ەكى ۋنيۆەرسيتەت اراسىندا عانا ەمەس, ەكى ەل اراسىنداعى دوستىق قارىم-قاتىناستىڭ ايقىن دالەلى ەكەنى جانە بيىلدان باستاپ بۇل ورتالىقتا ل.ن.گۋميلەۆ اتىنداعى ەۇۋ-دىڭ قازاق ءتىلى كافەدراسىنىڭ وقىتۋشىلارى قازاق تىلىنەن ساباق بەرەتىنىن ايتتى. ال Southwest ۋنيۆەرسيتەتى شەت تىلدەر فاكۋلتەتىنىڭ دەكانى ليۋ چەنيۋ تىكەلەي ەفير بارىسىندا الداعى ۋاقىتتا ەكى ۋنيۆەرسيتەت اراسىندا وقۋ, ءبىلىم جانە عىلىم سالاسىن دامىتىپ, سونداي-اق مادەني ءىس-شارالار ۇيىمداستىرىلىپ, جاستار ءۇشىن قىزمەت جاسايتىنىن جەتكىزدى. ونىڭ ايتۋىنشا, ۋنيۆەرسيتەتپەن اراداعى كەلىسىمشارت نەگىزىندە قۇرىلعان ورتالىق ەكى ەل اراسىندا التىن كوپىر بولماق. بۇل ورتالىق ل.ن.گۋميلەۆ اتىنداعى ەۇۋ-دىڭ باستاماسىمەن اشىلعان العاشقى ورتالىق ەمەس. بۇعان دەيىن مينسك پەن يراندا اشىلسا, تاياۋ بولاشاقتا تۇركيا مەن ءۇندىستاندا دا اشىلادى دەپ جوسپارلانىپ وتىر.
جانسايا جۇماش,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ جۋرناليستيكا جانە ساياساتتانۋ فاكۋلتەتىنىڭ 1-كۋرس ستۋدەنتى