بۇل كۇندەرى ەلىمىزدەگى ەڭ ءىرى «اپورت» مولىنىڭ ءۇشىنشى جاڭا بولىگى جۇمىسقا قوسىلۋدا. اۋماعى جاعىنان قازاقستاندا عانا ەمەس, ورتالىق ازياداعى اسا ءىرى ويىن-ساۋىق, ساۋدا ورتالىعىنىڭ جاڭا كەزەگىنىڭ اشىلۋىنا وراي, قازىرگى 3 مىڭ جۇمىس ورنىنا قوسا تاعى 2 مىڭ ادام ءۇشىن قوسىمشا جۇمىس ورىندارى قۇرىلدى. جانە مۇندا ءبىرىنشى رەت الماتى وبلىسىنىڭ حالىققا قىزمەت كورسەتۋ ورتالىعى اشىلادى.
اسا ءىرى مولدى سالۋعا ەلىمىزدىڭ كاسىپكەرلەرى 100 ميلليون دوللارعا جۋىق قاراجات سالىپ وتىر.
الماتى قالاسىمەن ىرگەلەس وبلىستا ورنالاسقان, تەڭدەسى جوق جاڭا جوبانىڭ ءۇشىنشى كەزەگىن قوسا العاندا, ەندى «اپورت» مولىنىڭ جالپى اۋدانى 210 000 شارشى مەتردەن اسادى. سوندىقتان اتالمىش مولدىڭ ءبىر مەزەتتە 5 مىڭ كولىككە اۆتوتۇراق ۇسىنا الاتىن مۇمكىندىگى بار. سونداي-اق, قالاعا جانە قالا شەتىنە قاتىنايتىن 20-دان اسا اۆتوبۋستىق باعىت ىسكە قوسىلماق. بۇل باستاما الماتى قالاسى جانە الماتى وبلىسى اكىمدىكتەرىمەن بىرلەسە وتىرىپ دايىندالدى.
«اپورتتىڭ» العاشقى كەزەگى 2009 جىلى اشىلعان بولاتىن. بار بولعانى ءبىر جىل ىشىندە مولعا 3,2 ميلليون ادام كەلدى. مولدىڭ ەكىنشى كەزەگى كەلۋشىلەر سانىن ەكى ەسە كوبەيتتى. 2017 جىلدىڭ ناۋرىز ايىندا ورىن جەتىسپەگەندىكتەن, ءۇشىنشى كەزەڭنىڭ قۇرىلىسى باستالدى. 2020 جىلعا قاراي مۇندا كەلەتىن حالىقتىڭ سانى جىلىنا 15 ميلليونعا دەيىن جەتەدى دەپ ويلايمىز», دەدى «Home Mart» جشس اتقارۋشى ديرەكتورى دميتري رەۆين.
ءوز كەزەگىندە «اپورت» مولى الەۋمەتتىك ماڭىزعا يە جوبالاردى قولداۋعا قاشاندا دايىن ەكەندىگىن ءبىلدىرىپ وتىر. وسى جازدا مولدىڭ 5 گەكتارلىق اۋماعىندا سپورتتىق الاڭدارى, دەمالىس ايماقتارى, جاساندى كول مەن امفيتەاترى بار مادەنيەت جانە دەمالىس ساياباعىنىڭ قۇرىلىسى باستالادى. بۇل ساياباق مولل قوناقتارىنا بۇكىل وتباسىمەن دەمالىستى قىزىقتى وتكىزىپ, سپورتپەن شۇعىلدانۋى ءۇشىن تولىقتاي تەگىن قىزمەت كورسەتەدى. جانە الەۋمەتتىك جاعىنان از قامتىلعان وتباسىلار مەن بالالار ۇيلەرىندەگى سابيلەر ءۇشىن ۇدايى تەگىن دەمالۋعا جاعداي تۋعىزىلىپ, قايىرىمدىلىق شارالارى جالعاساتىن بولادى.
سونداي-اق, مۇندا «ماگنۋم» جەلىسى ىشىندەگى ەڭ كەڭ تاۋار تۇرلەرىن ساتاتىن «گيپەرماركەت» فورماتىنداعى قازاقستانداعى ەڭ ءىرى «ماگنۋم» ورنالاستى.
وعان قوسا Mohito, Cropp, Sinsey, House, Reserved برەندتەرى اياسىندا جۇمىس ىستەيتىن دۇنيە جۇزىنە بەلگىلى LLP كومپانياسى قازاقستاندا تۇڭعىش رەت ءوز ونىمدەر توپتاماسىن 2018 جىلدىڭ قىركۇيەگىندە تەك «اپورت» موللىندا عانا ۇسىنعالى وتىر. LLP كومپانياسىنا تيەسىلى ەۋروپاداعى ەڭ ۇزدىك جاڭا بەس برەند زاماناۋي ريتەيلدە جۇرتشىلىقتىڭ زور قىزىعۋشىلىعىن تۋدىراتىن ەرەكشە برەندتەر سانالادى
ال دۇنيە جۇزىنە ايگىلى فرانتسۋزدىق Leroy Merlin برەندى ۇيگە ارنالعان تاۋارلار گيپەرماركەتىن قازاقستاندا تۇڭعىش رەت وسى جازدا وسى مولدا اشقالى وتىر. ول «اپورت» مولىنا ىرگەلەس ورنالاساتىن بولادى.
ەلىمىزدەگى تۇڭعىش دۇكەندەرىن «اپورت» مولىندا اشقان ەۋروپالىق, تۇرىك, رەسەيلىك برەندتەر بۇرىنعىسىنشا مولدىڭ الدىڭعى قاتارلى جالگەرلەرى رەتىندە ءوز قىزمەتتەرىن جالعاستىرادى. ولاردىڭ قاتارىندا Ostin, LC Waikiki, Koton, Kari, DeFacto, «تۆوە», FLO, Miniso, «دەتسكي مير», «سپورتماستەر», Sman, Glasman, Kari Kids, Us Polo سىندى تاعى دا باسقا كوپتەگەن ء«ىزاشار» برەندتەر بار.
وسى ايتۋلى وقيعا وراي, باق وكىلدەرىنىڭ قاتىسۋىمەن «اپورت» مولىندا جاڭا فورماتتاعى كونتسەپتۋالدى بىرقاتار نىسانداردىڭ تۇساۋكەسەرى ءوتتى. ولاردىڭ قاتارىندا وتباسىلىق «Funky World» ويىن-ساۋىق ساياباعى, ەڭ ۇلكەن SPA ورتالىعىمەن جابدىقتالعان (اۋدانى 2000 شارشى مەتر) ورتالىق ازيا جانە تمد اۋماعىنداعى ەڭ ءىرى «Miami Aquapark» اكۆاساياباعى, «ماحاببات باسپالداعى» جانە «تىلەكتەر فونتانى» ورنالاسقان ناعىز يتاليالىق پياتستسا الاڭىندا Food Gallery مەيرامحانالار گالەرەياسى بار.
«Miami Aquapark&SPA» جانە «Funky World» ساياباقتارىنىڭ سالتاناتتى تۇساۋكەسەرى حالىقارالىق بالالاردى قورعاۋ كۇنىنە وراي 1 ماۋسىمدا وتەدى دەپ جوسپارلانىپ وتىر.
ايناش ەسالي,
«ەگەمەن قازاقستان»
الماتى