ۇلى جەڭىستىڭ 73 جىلدىعى مەرەكەسىندە وبلىس اكىمى ەرالى توعجانوۆ «اققۋ-1» تۇرعىن ءۇي كەشەنىنىڭ كىلتتەرىن 78 اسكەري جانە قۇقىق قورعاۋ ورگاندارىنىڭ قىزمەتكەرىنە سالتاناتتى تۇردە تابىس ەتتى.
باسپانالى بولعانداردىڭ قاتارىندا ىشكى ىستەر دەپارتامەنتىنىڭ - 30, ۇلتتىق قاۋىپسىزدىك كوميتەتىنىڭ -33 جانە باتىس ايماقتىق شەكارا قىزمەتى بيۋروسىنىڭ 10 قىزمەتكەرى بار. قازىرگى تاڭدا 339 ءۇي پايدالانۋعا دايىن. پاتەردى ساتۋ تەتىگى «قازاقستان تۇرعىن ءۇي قۇرىلىس جيناق بانكى» اق جۇيەسىمەن جانە جەكە, زاڭدى تۇلعالارعا تىكەلەي ساتۋ ارقىلى جۇزەگە اسىرىلادى.
– بۇگىن «اققۋ» تۇرعىن ءۇي كەشەنىنىڭ العاشقى كەزەڭى قولدانىسقا بەرىلىپ, 140 پاتەر تاپسىرىلدى. مىنە, ءبىز بۇگىن جاڭا باسپاناعا قول جەتكىزگەن 78 وتباسىنىڭ قۋانىشىنا كۋا بولىپ وتىرمىز. مەملەكەتتىك باعدارلامالار شەڭبەرىندە اسكەري جانە قۇقىق قورعاۋ ورگاندارىنىڭ قىزمەتكەرلەرىنە بەرىلۋىنىڭ سيمۆولدىق ءمانى زور. بۇل بەيبىت ءومىردىڭ باتىرلارى, ەلدىڭ تىنىشتىعىن كۇزەتىپ جۇرگەن ەرلەرگە دەگەن قۇرمەتتىڭ ءبىر بەلگىسى. مۇنىڭ بارلىعى ەلباسىمىز نۇرسۇلتان نازارباەۆتىڭ الەۋمەتتىك باستامالارى مەن رەفورمالارىنىڭ ءساتتى جۇزەگە اسقاندىعىنىڭ ايقىن كورىنىسى. حالىقتىڭ ءال-اۋقاتىن ارتتىرۋ, تۇرمىس-تىرشىلىگىن جاقسارتۋ مەملەكەت باسشىسىنىڭ ءجىتى نازارىندا. سوندىقتان ناۋرىز ايىندا ەلباسى الەۋمەتتىك جاڭعىرۋ جولىندا اۋقىمدى قادام جاساپ, «بەس الەۋمەتتىك باستاما» ۇسىندى. سونىڭ العاشقى تارماعىندا – ء«اربىر وتباسىنا باسپانا الۋدىڭ جاڭا مۇمكىندىكتەرىن بەرۋ», - كەرەكتىگىنە نازار اۋدارعان بولاتىن. «7 – 20 – 25» باعدارلاماسى بۇل سوزىمە دالەل, – دەدى ايماق باسشىسى ەرالى توعجانوۆ.
2017 جىلى تەك ماڭعىستاۋ ءوڭىرى بويىنشا بارلىعى 833 مىڭ شارشى مەتر تۇرعىن ءۇي قولدانىسقا بەرىلدى. ول 2016 جىلمەن سالىستىرعاندا 17 پايىزعا ارتىق. 2018 جىلدىڭ سوڭىنا دەيىن تاعى 916 مىڭ شارشى مەتر تۇرعىن ءۇي سالۋ جوسپاردا بار. العاشقى توقساندا سونىڭ 337 مىڭ شارشى مەترى تاپسىرىلىپ قويعان.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى