باتىس قازاقستان وبلىسىنىڭ جانىبەك جانە بوكەي ورداسى اۋداندارى – 1942-1943 جىلدارى ستالينگراد مايدانىنىڭ جاقىن تىلى سانالعان, بىرنەشە رەت نەمىس-فاشيست ۇشاقتارى بومبا تاستاپ, ناعىز سوعىس ءتۇتىنىن يىسكەگەن ەلىمىزدەگى بىردەن-ءبىر ءوڭىر.
سوندىقتان دا ورالدا جەڭىس كۇنىنە ارنالعان سالتاناتتى شارالار جىل سايىن ەرەكشە وتەدى. بيىل دا باتىر قىزدار – مانشۇك مامەتوۆا, ءاليا مولداعۇلوۆا جانە حيۋاز دوسپانوۆانىڭ ەسكەرتكىشى ورناتىلعان الاڭعا گۇل شوعىن قويۋمەن باستالعان شارالار كۇنى بويى جالعاستى.
باتىس قازاقستان وبلىسىنىڭ اكىمى التاي كولگىنوۆ جەڭىس الاڭىندا, ماڭگىلىك الاۋ باسىندا سويلەگەن سوزىندە وسى وڭىردەن مايدانعا اتتانعان 80 مىڭعا جۋىق جاۋىنگەردەن كۇنى بۇگىن كوزى ءتىرى 108 ارداگەر قالعانىن ايتىپ ءوتتى. ەلىمىزدە مايدانگەرلەرگە بارلىق قۇرمەت جاسالىپ جاتىر. بۇل كۇنى باتىس قازاقستان وبلىسىندا دا ارداگەرلەرگە ەرەكشە نازار اۋدارىلىپ, سىي-قۇرمەت كورسەتىلىپ, بۇگىنگى بەيبىت كۇن مەن تاۋەلسىزدىك ءۇشىن راحمەت ايتىلدى.
باتىس قازاقستان وبلىستىق قازاق دراما تەاترى بۇل كۇندى «مانشۇك» قويىلىمىنىڭ پرەمەراسىمەن اتاپ ءوتتى. باتىسقازاقستاندىقتاردىڭ بيىل استانانىڭ 20 جىلدىق تويىنا تارتۋى دا سوۆەت وداعىنىڭ باتىرى مانشۇك مامەتوۆانىڭ ەڭسەلى ەسكەرتكىشى بولعالى تۇر.
قازبەك قۇتتىمۇرات ۇلى
«ەگەمەن قازاقستان»
باتىس قازاقستان