راقىمجان – وتباسىندا ەكى اپاسىنىڭ سوڭىنان ەرگەن ۇل. قازاق ساعىندىرىپ كەلگەن ۇل بالانى ەركەلەتىپ وسىرەتىنى بەلگىلى, الايدا راقىمجان ەسى شىققان ەركە, شەكتەن شىققان تەنتەك ەمەس, اقىلدى بالا.
رەيحستاگقا تۋ تىككەن قازاق, حالىق قاھارمانى راقىمجان اتاسى 1924 جىلى 19 قازاندا ومىرگە كەلسە, كىشكەنتاي قوشقارباەۆ 2013 جىلى 19 قازاندا دۇنيە ەسىگىن اشىپتى. تەگى مەن تۋعان كۇنى سايكەس كەلىپ تۇرعان ۇلعا اتا-اناسى, باۋىرلارى ىرىم ەتىپ, قاھارمان اتانىڭ ەسىمىن ەنشىلەتتى. ارينە قارت راقىمجاننىڭ تاعدىرى ەمەس تاعىلىمى, باتىرلىعى, ازاماتتىعى مەن قايسارلىعى دارىسىن دەگەن تىلەك, حالىق ءۇشىن كەۋدەسىن وق پەن وتقا توسەپ, ەرەن ەرلىك ۇلگىسىن كورسەتكەن باتىر باباعا دەگەن شەكسىز قۇرمەت. بۇگىندە كىشكەنتاي راقىمجان اقتاۋ قالاسىنداعى «سۇلتان» اتتى بالاباقشاعا بارادى. «بالا ءتىلى – بال» دەگەندەي, «مەن نۇرسۇلتان باقشاسىنا بارامىن!» دەيدى ماقتانىشپەن. اقىلدى, جىگەرلى, بايسالدى, بەلسەندى بالا بالاباقشادا وتەتىن ءتۇرلى شارالاردا الدىڭعى لەكتە جۇرەدى.
– ەستە ساقتاۋ قابىلەتى وتە جوعارى, العىر. تەلەديداردان ءبىر كورگەن نارسەنى سول كۇيىندە قايتالاپ بەرگەندە, ءوزىمىز قايران قالامىز. ەڭ باستىسى, امان بولسىن, ەلىن سۇيگەن ازامات بولسىن, – دەيدى اكەسى قانات جۇماباەۆ. قانات قوشقارباي ۇلى – جاتتىقتىرۋشىلار اراسىندا سامبو كۇرەسىنەن ءۇش دۇركىن الەم چەمپيونى, قازاق كۇرەسىنەن بىرنەشە دۇركىن تۇيە بالۋان, حالىقارالىق دارەجەدەگى سپورت شەبەرى. قازىرگى تاڭدا اقتاۋ قالالىق اكىمدىگىندە قالالىق سپورت ءبولىمىنىڭ باسشىسى بولىپ قىزمەت اتقارىپ ءجۇر. ول ۇلىنىڭ ءوزى سەكىلدى سپورتشى بولعانىن قالايدى, الايدا قاي سپورت ءتۇرىن بالانىڭ ىڭعايىنا, قابىلەتىنە قاراي انىقتاماق.
ەركىن ەلىمىزدىڭ ەرتەڭىنە قىزمەت ەتەر جەتكىنشەكتەر جەلكىلدەپ جەتىلە بەرگەي, دەدىك ءبىز دە اكە تىلەگىنە ورتاقتاسىپ.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى