بۇگىن حالىقارالىق تۇركى اكادەمياسىندا تۇركى كەڭەسىنە مۇشە مەملەكەتتەردىڭ ءبىلىم جانە عىلىم مينيسترلىكتەرىنىڭ قاتىسۋىمەن ورتاق تۇركى ادەبيەتى وقۋلىعىنىڭ باعدارلاماسى تالقىلاندى.
ساراپشىلار مەن مينيسترلىكتەر وكىلدەرى اكادەميا ازىرلەگەن باعدارلاما جوباسىنا ۇسىنىستار بەرىپ, تۇزەتۋلەر ەنگىزدى.
ءبىلىم جانە عىلىم مينيسترلىكتەرى ماقۇلداعان جاعدايدا, اكادەميا ورتاق وقۋلىقتى ازىرلەي باستايدى.
ورتاق وقۋلىقتى شىعارۋ ماقساتىندا وي الماسۋ ءۇشىن بۇگىن تۇركى كەڭەسىنە مۇشە - قازاقستان, قىرعىزستان, ازەربايجان جانە تۇركيا ەلدەرىنىڭ ادەبيەتشى ماماندارى, بعم وكىلدەرى مەن اكادەميانىڭ ساراپشىلارى استانادا باس قوستى.
جيىندا ءسوز باستاعان حالىقارالىق تۇركى اكادەمياسىنىڭ (TWESCO) پرەزيدەنتى دارحان قىدىرالى بۇگىن وقۋلىقتىڭ ءوزى ەمەس, باعدارلاماسى تالقىلاناتىنىن اتاپ ءوتتى.
«2015 جىلى وسىندا وتكەن سامميت كەزىندە وقۋلىقتىڭ كونتسەپتسياسى قابىلداندى. وعان ۇلكەن تۇركولوگ عالىمدار, ادەبيەت ينستيتۋتىنىڭ ديرەكتورلارى قاتىسقان ەدى. قر بعم-دە وسى كونتسەپتسيانى ماقۇلدادى. 2016 جىلى ءبىز باكۋ تۇركولوگيالىق كونگرەسىنىڭ 90 جىلدىعىنا وراي وتكىزىلگەن ۇلكەن جيىندا تۇركى الەمىنىڭ ۇلكەن عالىمدارىمەن پىكىر الماستىق. 2017 جىلى وسى وقۋلىقتاردىڭ باعدارلامالارىن تاراپتارعا جىبەردىك. قازىرگە دەيىن تۇركيادان وسىعان بايلانىستى پىكىر كەلگەنىمەن, باسقا ەلدەردەن ناقتى ۇسىنىس بىلدىرگەن جوق. ۇسىنىستى وسى جەردە وتىرىپ, ايتادى دەگەن ۇمىتتەمىز», - دەگەن TWESCO باسشىسى تۇركى كەڭەسىنە مۇشە ەلدەردىڭ وكىلدەرىنە ءسوز بەردى.
ءوز كەزەگىندە ازەربايجاننان مەملەكەتتىك پەداگوگيكالىق ۋنيۆەرسيتتىڭ دوتسەنتى ءبىلال حاسانوۆ, قىرعىزستان تاراپىنان حالىقارالىق قىرعىز-تۇرىك «ماناس» ۋنيۆەرسيتەتى شىعىس تىلدەرى ءبولىمىنىڭ مەڭگەرۋشىسى وسماناكۋن يبرايموۆ, تۇركيادان ۇلتتىق ءبىلىم بەرۋ مينيسترلىگى ەۋروپا وداعى جانە سىرتقى بايلانىستار دەپارتامەنتىنىڭ ديرەكتورى يلحان اكسوي, قازاقستان تاراپىنان ى.التىنسارين اتىنداعى ۇلتتىق ءبىلىم اكادەمياسى ورتا ءبىلىم ينستيتۋتى ديرەكتورىنىڭ ورىنباسارى قايىرجان راحىمجانوۆ جوباعا ءبىراۋىزدان قولداۋ بىلدىرەتىندەرىن جەتكىزدى.
«ورتاق تۇركى ادەبيەتى وقۋلىعىنا قاتىستى جاڭالىققا وتە قۋانىشتىمىز. بۇل ءبىزدىڭ العا قاراي ءبىر قادام باسقانىمىزدىڭ ءبىر كورسەتكىشى. وقۋلىق باعدارلاماسىندا تۇركى حالىقتارىنىڭ رۋحاني, ساياسي, تاريحي بىرلىگى وتە تەرەڭ كورسەتىلگەن. وقۋلىقتىڭ باعىتى دۇرىس. ورتاق تۇركى ادەبيەتى نەگىزى ءداستۇرلى ادەبيەتىمىزدەن باستالعان. اۋىز ادەبيەتى ۇلگىلەرى قويىلىپ, جازبا ەسكەرتكىشتەرىمىز جانە تۇركى حالىقتارىنىڭ ادەبي-كوركەم تۋىندىلارى دا تانىتىلعان. ازەربايجان ءبىلىم مينيسترلىگىنىڭ دە بۇل وقۋلىقتى قولداپ وتىرعانىن ايتقىم كەلەدى», - دەدى ءبىلال حاسانوۆ.
جيىن بارىسىندا تۇركى كەڭەسىنە مۇشە ەلدەردىڭ بارلىق وكىلدەرى «ورتاق تۇركى ادەبيەتى» وقۋلىعىن شىعارۋدى تولىعىمەن قولدايتىندارىن جەتكىزدى.
كەزدەسۋدە حالىقارالىق تۇركى اكادەمياسى (TWESCO) ازىرلەگەن تۇركى الەمىنە ورتاق تاريح وقۋلىعى مەكتەپ باعدارلاماسىنا تاڭدامالى ءپان رەتىندە ەنگىزىلگەنى بەلگىلى بولدى.
«مەملەكەت باسشىلارىمىزدىڭ تاپسىرماسى بويىنشا ءبىز حالىقارالىق تۇركى اكادەمياسى بىرنەشە جوبانى قولعا العانبىز. سونىڭ ءبىرى - «ورتاق تۇركى ادەبيەتى» وقۋلىعى. وتىرىستى باستاماي تۇرىپ سىزدەرمەن ءبىر جاقسى حاباردى بولىسكىم كەلىپ وتىر. تاياۋدا عانا تۇركى الەمىنە ورتاق تاريح وقۋلىعىن ازىرلەپ بىتكەنبىز. تۇركيا ءبىلىم مينيسترلىگىنەن بىزگە حات كەلدى. تۇركيا ءبىلىم مينيسترلىگى ءبىز دايىنداعان وقۋلىقتى تۇركيادا تاڭداۋلى ءپان رەتىندە بيىلدان باستاپ كىرگىزىپ وتىر ەكەن», - دەدى TWESCO باسشىسى. دارحان قىدىرالىنىڭ ايتۋىنشا, حالىقارالىق تۇركى اكادەمياسى ءۇشىن بۇل زور قۋانىش. «اتالمىش وقۋلىق قازاقستانداعى نازارباەۆ زياتكەرلىك مەكتەپتەرىندە وقىتىلا باستاعان. ەندىگى كەزەكتە تۇركيا مەكتەپتەرىنە دە ەنگىزىلىپ وتىر. ءبىزدىڭ پايىمداۋىمىزشا, سامميتتە (تۇركى تىلدەس ەلدەردىڭ ءسامميتى - اۆت.) شەشىم قابىلدانعان جاعدايدا قىرعىزستان, ازەربايجان جانە قازاقستانداعى بارلىق مەكتەپتەرگە وسى اكادەميا ازىرلەگەن وقۋلىق ەنگىزىلەتىن بولادى دەگەن ۇمىتتەمىز», - دەدى دارحان قىدىرالى.
ايتا كەتسەك, بەيبىتشىلىك جانە كەلىسىم سارايىندا ءوتىپ جاتقان ورتاق وقۋلىقتى تالقىلاۋ جيىنىنا بىرنەشە تۇركى تىلدەس ەلدەردىڭ وكىلدەرى قاتىسىپ وتىر. اتاپ ايتقاندا, ورتاق وقۋلىقتى تالقىلاۋ ءۇشىن ازەربايجان مەملەكەتتىك پەداگوگيكالىق ۋنيۆەرسيتەتتىڭ دوتسەنتى ءبىلال حاسانوۆ, قىرعىز رەسپۋبليكاسى ۇعا مۇشەسى, حالىقارالىق قىرعىز-تۇرىك «ماناس» ۋنيۆەرسيتەتى شىعىس تىلدەرى ءبولىمىنىڭ مەڭگەرۋشىسى وسماناكۋن يبرايموۆ, تۇركيا رەسپۋبليكاسى ۇلتتىق ءبىلىم بەرۋ مينيسترلىگى ەۋروپا وداعى جانە سىرتقى بايلانىستار دەپارتامەنتىنىڭ ديرەكتورى يلحان اكسوي كەلگەن.