ورال قالاسىندا باتىس قازاقستان وبلىسىنىڭ اكىمى التاي كولگىنوۆ «قاراشىعاناق پەترولەۋم وپەرەيتينگ ب.ۆ.» كومپانياسىنىڭ باس ديرەكتورى ەدۆين بلوممەن كەزدەستى.
ەدۆين بلوم جاڭا قىزمەتىنە 1 ءساۋىر كۇنى رەسمي كىرىسكەن بولاتىن. كومپانيا باسشىسىنىڭ قىزمەتىنە ساتتىلىك تىلەگەن ءوڭىر باسشىسى قاراشىعاناقتى يگەرۋشى اليانستپەن اراداعى ارىپتەستىكتىڭ كەلەشەك جوسپارلارىنا توقتالدى.
– ەلباسىمىز نۇرسۇلتان ءابىش ۇلىنىڭ ەلىمىزگە ينۆەستيتسيا تارتۋ بويىنشا جۇرگىزىپ وتىرعان ساياساتىنىڭ ناتيجەسىندە 1997 جىلدان بەرى 23 ملرد. دوللار ينۆەستيتسيا تارتىلدى. سونىڭ ىشىندە «كپو ۆ.ۆ.» كومپانياسىنىڭ جىل سايىنعى نەگىزگى ينۆەستيتسيا كولەمى 600 ملن. دوللاردى قۇرايدى. سوڭعى ءۇش جىلدا جەرگىلىكتى قامتۋ ۇلەسى 47%-دان 54%-عا ءوستى. بىلتىر رەكوردتىق كورسەتكىش – 32 ملن.تەڭگە ءبولىنىپ, وڭىرىمىزدە 45 جوبا جۇزەگە اسىرىلدى. كومپانيامەن بىرلەسىپ ءبورلى اۋدانىندا ەكولوگيالىق اۋماقتا قالعان بەرەزوۆكا, بەستاۋ ەلدى مەكەندەرىنىڭ تۇرعىندارىن كوشىرۋ جۇمىستارىن ۋاقىتىلى اياقتادىق. ءسىزدىڭ باسشىلىعىڭىزبەن ورتاق جۇمىستاردى ودان ءارى تابىستى تۇردە جالعاستىرامىز دەگەن سەنىمدەمىن, – دەدى التاي كولگىنوۆ.
ءوز كەزەگىندە ەدۆين بلوم دا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ شەتەلدىك ينۆەستيتسياعا بارىنشا قولداۋ كورسەتىپ وتىرعانىن جەتكىزىپ, بيزنەسكە جايلى كليمات قالىپتاسقان ەلدە كومپانيا تابىستى جۇمىستار اتقاراتىنىن اتاپ ءوتتى. سونىمەن بىرگە اق جايىق ءوڭىرىنىڭ الەۋمەتتىك ينفراقۇرىلىمىن يندۋستريالاندىرۋ, جاڭعىرتۋ جوبالارىن بىرگە اتقارۋعا دايىن ەكەندىگىن ءبىلدىردى.
كەزدەسۋدە وڭىردەگى الەۋمەتتىك-ينفراقۇرىلىمدىق جوبالارعا جىل سايىن بولىنەتىن قارجى كولەمى 20 ملن. دوللاردان 30 ملن. دوللارعا ۇلعاياتىنى ايتىلدى. قازىرگى ۋاقىتتا بۇل كەلىسىم ورتالىق مەملەكەتتىك ورگانداردىڭ قاراۋىندا.
كەزدەسۋ سوڭىندا باتىس قازاقستان وبلىسىنىڭ اكىمى كومپانيا باستامالارى مەن ۇسىنىستارىنا اكىمدىك تاراپىنان قولداۋ بولاتىنىن جەتكىزدى.
قازبەك قۇتتىمۇرات ۇلى,
«ەگەمەن قازاقستان»
ورال