ناۋرىز ايى تۋسا دا قىلىشىن سۇيرەتكەن قىس وڭىردەن ءالى كەتە قويعان جوق. جۋاننىڭ جىڭىشكەرىپ, جىڭىشكەنىڭ ۇزىلەتىن, كۇننىڭ ۇزارىپ, ءتۇننىڭ قىسقاراتىن شاعى ەندى باستالعانى بەلگىلى. «اش قارىن جۇبانا ما مايلى اس جەمەي» دەپ ۇلى اباي ايتقانداي, ءدال وسى كەزدە قىستان قىسىلىپ شىققان جۇرتقا مايلى اس بولماسا دا, قۇنارلى تاعام قاجەت-اق. ول قۇنارلى تاعامىڭىز قالتاڭىزعا سالماق سالماسا ءتىپتى عانيبەت ەمەس پە؟
ايتايىن دەپ وتىرعانىمىز, جاقىندا اباي اۋدانىنىڭ ورتالىعى – قاراۋىل اۋىلىندا جەرگىلىكتى اكىمدىك پەن سەمەيدىڭ ىرگەسىندەگى «اگروفيرما «پريرەچنوە» جشس اراسىندا جاسالعان مەموراندۋم اياسىندا اۋىل شارۋاشىلىعى ونىمدەرىنىڭ جارمەڭكەسى ۇيىمداستىرىلىپ, 15 توننا ازىق-ت ۇلىك پەن كوكونىس ارزان باعادا ساۋدالاندى.
اۋدان اكىمىنىڭ ورىنباسارى مارات ەدىلباەۆتىڭ ايتۋىنشا, اقپاننىڭ 20-سى كۇنى وتكەن جارمەڭكەدە 7,5 توننا كارتوپ, 530 كەلى ءسابىز, 270 كەلى قىزىلشا, 1 توننا سارىمساق پەن 675 كەلى ورامجاپىراق پىشاق ۇستىنەن ساتىلىپ كەتىپتى. كوكونىستەردىڭ بارلىعى بار بولعانى 83 تەڭگەدەن ساۋداعا شىعارىلعاندىقتان جۇرت تالاپ الىپتى.
«نەگىزگى ازىق-ت ۇلىك تاۋارلارى بويىنشا باعانىڭ ءوسۋىن بولدىرماۋ ماقساتىندا اۋدان اكىمدىگى تاراپىنان بىرقاتار شارالار جۇزەگە اسىرىلىپ كەلەدى. وسى رەتتە وتكەن جىلدىڭ 13 قازانىندا سەمەي قالاسىنا قاراستى «اگروفيرما «پريرەچنوە» جشس-ءنىڭ ديرەكتورى مۇحيت تۇماباەۆپەن اۋدان اكىمدىگى ەكى جاقتى مەموراندۋمعا قول قويعان بولاتىن. اتالمىش كەلىسىم اياسىندا وڭىرىمىزدەگى ەڭ ىرگەلى كوكونىس وسىرەتىن شارۋاشىلىق وسىمەن ەكىنشى مارتە اۋدان ورتالىعىنا ارزان باعاداعى ازىق-ت ۇلىك تاۋارلارىن اكەلىپ وتىر. العاشقى جارمەڭكە 13-14 اقپان كۇندەرى وتسە, ءبىر اپتادان كەيىن, مىنە, ەكىنشى مارتە جارمەڭكە ۇيىمداستىرىلدى. العاشىندا اۋدانعا جالپى كولەمى بەس توننادان (2,7 توننا كارتوپ, 630 كەلى ءسابىز, 280 كەلى قىزىلشا, 910 كەلى سارىمساق, 800 كەلى ورامجاپىراق) استام ازىق-ت ۇلىك ونىمدەرى جەتكىزىلگەن بولاتىن. تۇراقتاندىرۋ قورىنان بولىنگەن ونىمدەر تىكەلەي وندىرۋشىدەن جەتكەندىكتەن البەتتە ۇستەمە باعاسىز بولاتىنى انىق. بۇل ءسوز جوق, اۋدانىمىزداعى وسىناۋ ازىقتىق ءونىم تۇرلەرىنىڭ باعاسىن ءبىرشاما تۇراقتاندىرىپ, جۇرتشىلىقتىڭ قاجەتىن وتەيتىن يگىلىكتى شارا دەپ بىلەمىز», - دەيدى اۋدان اكىمىنىڭ ورىنباسارى.
ازامات قاسىم,
«ەگەمەن قازاقستان»
شىعىس قازاقستان وبلىسى,
اباي اۋدانى