ارۋلار مەرەكەسى قوستانايدا ايرىقشا شارالارمەن باستالدى. سونىڭ ءبىرى – ايەلدەردىڭ قاتىسۋىمەن وتكەن اۆتوشەرۋ. ەرەكشە اۆتوشەرۋدى وبلىستاعى جاستار رەسۋرسى ورتالىعى وبلىستىق ىشكى ىستەر دەپارتامەنتىمەن بىرلەسىپ, بيىل ەكىنشى رەت وتكىزدى.
وعان قاتىسۋعا بيىل 23 ايەل ىنتا ءبىلدىردى. اۆتوشەرۋدىڭ شارتى بويىنشا ايەلدەر كولىگىن تۇرلىشە بەزەندىردى. وسى جارىستا باس جۇلدەنى العان ەكاتەرينا كوجەۆينا ءوزىنىڭ تەمىر تۇلپارىنا كويلەك پەن شلياپا «كيگىزىپ», سىلانعان سۇلۋدىڭ كەيپىن كورسەتتى. ال مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنىڭ قىزمەتكەرى عاليا قاسىموۆا ءوزى مىنگەن «لادا پريوراسىن» ۇلتتىق ويۋلارمەن جانە ۇلتتىق كيىم كيگەن قۋىرشاقپەن بەزەندىرىپتى.
– ەڭ باستى ماقساتىمىز, ايەلدەردىڭ ىنتىماعىن كورسەتۋ, جول ەرەجەسىن ساقتاۋدى ناسيحاتتاۋ جانە كوپشىلىككە مەرەكەلىك كوڭىل-كۇي سىيلاۋ بولدى, – دەيدى جاستار رەسۋرسى ورتالىعىنىڭ ديرەكتورى ايگۇل ابدۋللينا.
ايەلدەر جۇرگىزگەن تەمىر تۇلپارلار شەرۋى قالا ورتاسىنداعى جەڭىس ساياباعىنان ورتالىق اباي داڭعىلى ارقىلى قالانىڭ ءبىر شەتىندەگى «استىقجان» ساۋدا ورتالىعىنا دەيىن ءجۇرىپ ءوتتى. شەرۋدى كورگەن قالالىقتاردى ماشينالاردىڭ بەزەندىرىلۋى ەرەكشە قىزىقتىردى. ولار ءۇشىن كولىكتەردى ايەلدەردىڭ تىزگىندەۋى دە بۇگىن ەرەكشە جاراسىم تاپقانداي بولدى. رۋلدەگى ايەلدەردىڭ بارلىعىنىڭ دا كولىك جۇرگىزۋدە كەمىندە ءۇش جىل ءوتىلى بار.
– رۋلگە ارۋلار وتىرعان اۆتوشەرۋدىڭ تاعى ءبىر ماقساتى, «ايەل ماشينا جۇرگىزە المايدى» دەگەن قالىپتاسىپ قالعان تۇسىنىكتى جوققا شىعارۋ ەدى. قايتا ەڭ ۇقىپتى جانە جول ەرەجەسىن قاتاڭ ساقتايتىن جۇرگىزۋشىلەردىڭ ايەلدەر ەكەنىن ايتقىم كەلەدى, – دەيدى جەرگىلىكتى پوليتسيا باستىعىنىڭ ورىنباسارى الىبەك بەرمۇقانوۆ. شەرۋ مارەگە جەتكەن سوڭ, ۇيىمداستىرۋشىلار جۇرگىزۋشىلەر ءۇشىن ۆيكتورينالىق سۇراقتار قويدى. جۇرگىزۋشى ارۋلاردىڭ بارلىعى دا مەرەكەلىك سىيلىقتارعا يە بولدى.
ءنازيرا جارىمبەت, «ەگەمەن قازاقستان»
قوستاناي