ءور نامىس, قايسار مىنەز قاشاننان دا قازاق قىزدارىنا ءتان قاسيەت. بۇل تۇرعىدا ءبىر عانا ءاليا مەن مانشۇكتى العا تارتساق جەتكىلىكتى. وسىناۋ بەيبىت زاماندا بىلەك پەن جۇرەك كۇشىن قاتار ۇشتاستىرىپ, بايراقتى باسەكەلەردە ەل مەرەيىن ۇستەم ەتىپ جۇرگەن نازىم قىزايباي, ءاليا يۋسۋپوۆا كەشەگى قاھارمان اكپەلەرىنىڭ زاڭدى جالعاسى ەمەس دەپ كىم ايتا الادى. سولاردىڭ ءبىرى – وڭتۇستىك كورەيانىڭ پحەنچحان قالاسىندا ءوتىپ جاتقان پاراليمپيا ويىندارىنا ەل نامىسىن ارقالاپ كەتكەن التى سپورتشىنىڭ ىشىندەگى جالعىز نازىكجاندى, شاڭعىمەن سىرعاناۋشى جاڭىل بالتاباەۆا.
بىرەر كۇن بۇرىن پاراليمپياداشىلاردى پحەنچحانعا شىعارىپ سالۋ راسىمىندە جاڭىلعا بىرەر سۇراق قويۋدىڭ ءساتى تۇسكەن ەدى.
– جاڭىل بۇگىنگە دەيىن جەتكەن جەتىستىكتەرىڭ از ەمەس. بىرنەشە دۇركىن ەل چەمپيونى اتانىپ, حالىقارالىق جارىستاردا, ازيا بىرىنشىلىگىندە جاقسى ناتيجەمەن كورىندىڭ. ءتورت جىل بۇرىن سوچيدە وتكەن پاراليمپيادا ويىندارىنا دا قاتىسقانىڭدى بىلەمىز.دايىندىعىڭ قالاي؟
– ءيا, تالاي جارىستاردا باعىمدى سىنادىم. سەگىز بىردەي الەم كۋبوگى بايگەسىنە قاتىستىم. ءوزىڭىز ايتقانداي, كوپتەگەن باسەكەدە تابىستى ونەر كورسەتتىم. دەگەنمەن, سوچيدە وتكەن پاراليمپيا ويىندارىندا بەس شاقىرىمدىق جەكەلەگەن جارىس جولىندا نەبارى 23-ورىنعا تابان تىرەگەن ەدىم. ودان بەرى ءتورت جىل ۋاقىت ءوتتى. تاجىريبەم تولىسىپ, تىڭعىلىقتى جاتتىعۋ جاسادىم. پحەنچحانعا فيزيكالىق جاعىنان دا, رۋحاني تۇرعىدان دا دايىنمىن دەسەم بولادى. اتالعان پاراليمپيا ويىندارىندا ەل نامىسىن قورعايتىن جالعىز قىز بولعاندىقتان يىعىمداعى جۇكتىڭ سالماعى جەڭىل ەمەس ەكەنىن جاقسى سەزىنەم. ماعان ارتىلعان سەنىم ۇدەسىنەن شىعىپ, جارىستا بار مۇمكىندىگىمدى كورسەتەم دەگەن ويدامىن.
– جاۋاپتى ساتتەردە ساعان جىگەر سىيلايتىن نە نارسە؟
– جارىس جولىنا شىققاندا نەمەسە كەز كەلگەن جاۋاپتى ساتتە مەنى الدىمەن قاناتتاندىراتىن ءوزىمنىڭ انام. ول كىسى ماعان جارىق الەمدى سىيلادى. قارشاداي كۇنىمنەن بار اۋىرتپالىعىمدى كوتەرىپ, دەنەنى دەندەگەن دەرتتى دە, ءاربىر قيىندىقتى دا, ءبارىن-ءبارىن جەڭىپ شىعۋعا بولاتىنىن ۇيرەتتى. «ەڭ باستىسى, قانداي قيىندىققا دا مويىما. سوڭىنا دەيىن كۇرەسە ءبىل. مىقتى بول!» دەپ ۇنەمى ايتىپ وتىرادى. ءار جەڭىسىمە قۋانادى. بۇكىل جەر بەتىندەگى جىلىلىق انامنىڭ ق ۇلىنىم دەپ باسىمنان سيپاعان ايالى الاقانىنان, مەيىرلەنە قاراعان جۇزىنەن تارايتىن سياقتى. سول مەيىرىم, سول جىلىلىق مەنى بارلىق جەڭىستەرگە جەتەلەيدى.
– بىلۋىمىزشە, سەن شاڭعىمەن سىرعاناۋدان بولەك سۋ سپورتىمەن, سونداي-اق جەڭىل اتلەتيكامەن اينالىساسىڭ. بىرنەشە سپورت تۇرىمەن قاتار اينالىسۋ قيىندىق تۋدىرماي ما؟
– ونىڭىز راس. جۇزۋدەن ءتورت دۇركىن ەل چەمپيونى اتاندىم. جەڭىل اتلەتيكا سپارتاكياداسىندا ەكى مارتە توپ جارىپ, سۋ سپورتى سپارتاكياداسىندا قولا جۇلدەگە قول جەتكىزدىم. ارينە ءبىر سپورت تۇرىمەن تۇراقتى تۇردە اينالىسقان دۇرىس. بۇل ناتيجەنىڭ كىلتى. ءار سپورتتىڭ قىر-سىرىن, وزىنە ءتان ەرەكشەلىگىن بۇكىل بولمىسىڭمەن, جان دۇنيەڭمەن سەزىنبەي, تىنىمسىز تەر توكپەي جەڭىسكە جەتەم دەۋ بەكەر. سپورت مەنىڭ ءومىرىمنىڭ ءمانى. بار قيىندىقتى ۇمىتتىراتىن جان سەرىگىم. جانىم مەن ءتانىمنىڭ ەمشىسى. بىرنەشە سپورت ءتۇرىن قاتار الىپ ءجۇرۋ مەنىڭ مۇمكىندىگىمدى شەكتەمەيدى. دەگەنمەن, پاراليمپيا ويىندارىندا ەل بايراعىن كوككە كوتەرۋ مەنىڭ ەڭ ۇلكەن ارماندارىمنىڭ ءبىرى. سوندىقتان سوڭعى جىلدارى پاراليمپياداعا دايىندىق بارىسىندا شاڭعى سپورتىنا كوبىرەك كوڭىل ءبولدىم.
– سۋدا جۇزۋدەن جاس سپورتشىلاردى جاتتىقتىراتىنىڭدى بىلەمىز. ودان بولەك بوس ۋاقىتىڭدى نەمەن وتكىزەسىڭ؟
– ادامنىڭ سىرتقى ساۋىتى مەن ىشكى بايلىعى, ءبىلىمى ساي بولۋى كەرەك دەپ ەسەپتەيمىن. سپورتتى جانىما سەرىك ەتە ءجۇرىپ ەكى بىردەي جوعارى وقۋ ورنىن ءبىتىردىم. وتكەن جىلى عانا «شاڭعىمەن سىرعاناۋ جانە بياتلون» ماماندىعى بويىنشا ماگيستراتۋرانى اياقتادىم. قولىم قالت ەتە قالعاندا, ادەبي شىعارمالار وقىپ, تانىمدىق باعىتتاعى كينوفيلمدەر تاماشالايمىن. سول ارقىلى ءوزىمدى رۋحاني بايىتىپ وتىرامىن. ال نەگىزگى ۋاقىتىم سپورتتىڭ اينالاسىندا وتەدى.
– جاڭا ءبىر سوزىڭدە جەر بەتىندەگى بارلىق جىلىلىق انانىڭ الاقانىنان تارايدى دەگەن ەدىڭ. حالىقارالىق ايەلدەر كۇنى مەرەكەسىندە گازەتىمىز ارقىلى انالار مەن قىزدارعا قانداي تىلەك بىلدىرەسىڭ؟
– «ەگەمەن قازاقستان» گازەتىنىڭ بارشا نازىكجاندى وقىرماندارىن شۋاقتى مەرەكەمەن شىن كوڭىلمەن قۇتتىقتايمىن! اق جاۋلىقتى اجەلەرىمىز بەن انالارىمىز امان بولسىن! بارشا قىز-كەلىنشەكتەرىمىزگە جاقسى ۇرپاق تاربيەلەپ, انا باقىتىن سەزىنۋدى ءناسىپ ەتسىن. اللا بۇيىرتىپ, پاراليمپيا ويىندارىنان ولجالى ورالىپ جاتسام اناما عانا ەمەس وزىمە, بارشا ارۋلار قاۋىمىنا, تۋعان ەلىمە جاساعان ەڭ ۇلكەن سىيىم سول بولار.
– اڭگىمەڭە راحمەت.
اڭگىمەلەسكەن
ارمان وكتيابر, «ەگەمەن قازاقستان»