ەلباسى بيىل قوسىمشا 20 ميلليارد تەڭگە ءبولىپ, شاعىن نەسيەلەۋ كولەمىن 62 ميلليارد تەڭگەگە جەتكىزۋدى تاپسىرعانى بەلگىلى.
ەڭبەك جانە حالىقتى الەۋمەتتىك قورعاۋ ۆيتسە-ءمينيسترى نۇرجان التاەۆ ۇكىمەت ۇيىندە وتكەن ءباسپاسوز ءماسليحاتىندا مەملەكەت باسشىسى جاريالاعان بەس الەۋمەتتىك باستامانىڭ ىشىندەگى شاعىن نەسيەلەندىرۋ كولەمىن كەڭەيتۋ ماسەلەسىنە ارنايى توقتالدى. ءمينيستردىڭ ورىنباسارى بەس الەۋمەتتىك باستامانىڭ دا حالىقتىڭ ەڭ وزەكتى سۇرانىستارىن قامتىپ وتىرعانىن, سونىڭ ءبىرى شاعىن نەسيەلەندىرۋدى ارتتىرۋ جاپپاي كاسىپكەرلىكتى دامىتۋعا نەگىز بولاتىنىن اتاپ ءوتتى. ۆيتسە-ءمينيستردىڭ ايتۋىنشا, شاعىن نەسيەلەندىرۋدى ارتتىرۋ اۋىل تۇرعىندارىن جاڭا تابىس كوزدەرىمەن جانە جۇمىس ورىندارىمەن قامتاماسىز ەتپەك. ماسەلەن, ميكروكرەديتتى كەڭەيتۋ شارالارى بيىل 14 مىڭنان استام ادامدى نەسيەمەن قامتۋعا مۇمكىندىك بەرەدى.
ازاماتتاردىڭ كاسىپكەرلىك باستامالارىنىڭ ورىندالۋى ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى شەڭبەرىندە جۇزەگە اسىرىلۋدا. بىلتىر بۇل باعدارلاما ارقىلى 7 227 شاعىن نەسيە بەرىلدى. اۋىلدىق جەرلەر مەن قالالاردا شاعىن نەسيەنى العاندار قاتارى 6 791 ادامدى قۇرادى. سونىمەن قوسا كاسىپكەرلەردىڭ 57 پايىزدان استامى ستارتاپ جوبالارى رەتىندە جەكە كاسىبىن اشتى. «باستاۋ-بيزنەس» جوباسى شەڭبەرىندە 15 مىڭ ادام كاسىپكەرلىك سالاسىندا وقىتىلىپ, 3 314 ادام شاعىن نەسيە الدى. كرەديتتىڭ قولجەتىمدىلىگىن كەڭەيتۋ ماقساتىندا كەپىلدەندىرىلگەن نەسيە بەرۋ مەحانيزمى ەنگىزىلدى. 2017 جىلى 420 كەپىلدەمەگە كەلىسىمشارت جاسالدى. ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىنىڭ كومەگىمەن بىلتىر شاعىن جانە ورتا بيزنەس 3,6 پايىزعا ارتتى. 2018 جىلى اتالعان باعدارلامانى قارجىلاندىرۋعا 87 ميلليارد تەڭگە قاراستىرىلعان.
«سونىمەن بىرگە ميكروكرەديتتەۋگە 20 ميلليارد تەڭگە ءبولىنىپ, ونىڭ 14 ميلليارد تەڭگەسى اۋىلدىق جەرلەرگە, 6 ميلليارد تەڭگەسى قالاعا باعىتتالاتىن بولادى. بۇدان باسقا ميكروكرەديتتەردى بەرۋ مولشەرى قالالار مەن اۋىلدار ءۇشىن قايتا سارالانادى», دەدى ۆيتسە-مينيستر. ياعني قالالاردا جانە اۋىلدى ەلدى مەكەندەردە زاكىرلىك كووپەراتسيالارعا بەرىلەتىن ميكروكرەديتتىڭ ورتاشا مولشەرى 6,5 ميلليون تەڭگەدەن اسپايدى. ال اۋىلدىق جەرلەردەگى باسقا دا جوبالار ءۇشىن بۇل شاعىن نەسيە كولەمى 3,5 ميلليون تەڭگەدەن اسپايتىن بولادى. بۇعان دەيىن شاعىن نەسيەلەۋ ۇيىمدارى ۇسىنىپ كەلگەن پايىزدىق ۇستەمەلەر جىلىنا 30-50 پايىزدى قۇراعاندىقتان, اۋىلدى جەرلەردە كاسىپ اشۋعا مۇلدەم قولايسىز ەدى.
ەگەر اۋىل تۇرعىنى شاعىن نەسيە الۋ ارقىلى جەكە كاسىبىن اشقىسى كەلسە, جۇمىسپەن قامتۋ ورتالىعىنا, «اتامەكەن» كاسىپكەرلەر پالاتاسىنىڭ فيليالىنا نەمەسە اكىمدىككە حابارلاسا الادى.
«ونىڭ ءوتىنىمى بىردەن جۇمىسپەن قامتۋ ورتالىعىنا جىبەرىلەدى. وندا ونى «ەڭبەك» اقپاراتتىق جۇيەسى ارقىلى تەكسەرىپ, ءوتىنىم يەسىنىڭ شىن مانىندە جۇمىسسىز الدە ءوزىن ءوزى جۇمىسپەن قامتۋشى ەكەنى انىقتالادى. بۇدان كەيىن وعان نەسيەنى الۋ جانە قاجەتتى قۇجاتتار جونىندە كونسۋلتاتسيا بەرىلەدى. سونان سوڭ «باستاۋ-بيزنەس» باعدارلاماسى بويىنشا وقىتۋعا جىبەرىلەدى. وقىتۋ كۋرسىن تامامداعان سوڭ سەرتيفيكاتقا يە بولادى دا, 5 نەمەسە 7 جىلعا دەيىن جىلىنا 6 پايىزبەن نەسيە الۋ قۇقىنا يە بولادى», دەدى ن.التاەۆ.
ارينە جەكە كاسىبىن اشقىسى كەلەتىن جاستار كوپ. بىراق اۋىلدى جەرلەردە ولاردىڭ نەسيەگە ءوتىنىشى قاناعاتتاندىرىلمايدى, ەكىنشى دەڭگەيلى بانكتەر كەپىلدەمە رەتىندە ۇسىنعان مۇلكىن كوبىنەسە قابىلدامايدى. سوندىقتان مەملەكەتتىك باعدارلاما كەپىلگە قوياتىن مۇلكى جوق كاسىپ اشۋشىلارعا ارنالعان كەپىلدەمە جۇيەسىن قاراستىرادى. ەگەر ول كاسىبىن ەندى باستاپ جاتقان جان بولسا, نەسيەنىڭ 85 پايىزىنا مەملەكەت تاراپىنان كەپىلدىك بەرىلەدى. بۇل كەپىلدەمەنى اۋىلدا بولسا «قازاگروگارانت» ۇيىمى, قالادا بولسا «دامۋ» قورى بەرەدى. ەگەر ءىس باسىنداعى كاسىپكەر رەتىندە بيزنەسىن كەڭەيتۋ ماقساتىندا قارجى العىسى كەلسە, وندا جىلىنا 50 پايىزىنا دەيىن كەپىلدىك بەرىلەدى, دەدى ۆيتسە-مينيستر.
دۋمان اناش, «ەگەمەن قازاقستان»