شقو اكىمى جۇمىس ساپارىمەن لوندوندا ءجۇر

وبلىس اكىمىنىڭ ءباسپاسوز قىزمەتىنىڭ بەرگەن مالىمەتتەرىنە سۇيەنسەك, ايماق باسشىسى ءۇش كۇندىك ءىسساپاردىڭ العاشقى كۇنىندە «Southwark Integrated Waste Management Facility» قاتتى تۇرمىستىق قالدىقتاردى سۇرىپتاۋ جانە قايتا وڭدەۋ زاۋىتىن ارالاپ, «Transport for London» قوعامدىق تاسىمالداۋدى ۇيىمداستىرۋ جۇيەسىنىڭ قىزمەتىمەن تانىسىپتى. ءىسساپاردىڭ ەكىنشى كۇنىندە ەۋروپالىق قايتا قۇرۋ جانە دامۋ بانكىنىڭ ءبىرىنشى ۆيتسە-پرەزيدەنتى الون پيلوكسپەن كەزدەسىپ, ءوڭىردىڭ ينفراقۇرىلىمىن دامىتۋعا باعىتتالعان ينۆەستيتسيالىق جوبالاردى جۇزەگە اسىرۋدىڭ ەكىجاقتى سەرىكتەستىك جوسپارىن تالقىلاپتى. ەڭ ماڭىزدىسى, جۇمىس ساپارى بارىسىندا وبلىس اكىمى د.احمەتوۆ پەن ەققدب پرەزيدەنتى سۋما چاكرابارتي اراسىندا قۇنى 5,6 ميلليارد تەڭگەنى قۇرايتىن «شىعىس قازاقستان وبلىسى قالالارى مەن اۋدان ورتالىقتارىنىڭ كوشەلەرىن جارىقتاندىرۋ جۇيەسىن جاڭعىرتۋ» جوباسىن قارجىلاندىرۋ تۋرالى كەلىسىمگە قول قويىلىپتى. جوبا جۇزەگە اسقان جاعدايدا شىعىس قازاقستاننىڭ 630 مىڭنان استام تۇرعىنى بار 6 قالاسى مەن 11 اۋدان ورتالىعىنا 32 مىڭ دانا ەنەرگيا ۇنەمدەۋشى شامدار ورناتىلاتىن بولادى. قازىرگى ۋاقىتتا اتالعان بانكتىڭ قولداۋىمەن 4,8 ملرد تەڭگەگە وسكەمەن مەن سەمەي قالالارىندا «اقىلدى» جارىقتاندىرۋ جۇيەلەرى ەنگىزىلۋدە. بۇل ءوز كەزەگىندە 25 مىڭ شامدى ەنەرگيا ۇنەمدەۋشى تۇرىنە اۋىستىرۋعا مۇمكىندىك بەرمەك. كەلىسسوزدەر بارىسىندا ايماق باسشىسى مەن ەققدب پرەزيدەنتى وسكەمەندە قۇنى 29,5 ميلليارد تەڭگەنى قۇرايتىن قالدىقتاردى زاماناۋي جولمەن جويۋ جانە قايتا وڭدەۋ جوباسىن دا پىسىقتاپ, بىرلەسە جۇمىس ىستەۋگە كەلىسىپتى.

ەلباسى 5 ناۋرىز كۇنى پارلامەنت پالاتالارىنىڭ بىرلەسكەن وتىرىسىندا قازاقستان حالقىنا ارناعان «پرەزيدەنتتىڭ بەس الەۋمەتتىك باستاماسى» اتتى ۇندەۋىندە گازداندىرۋ ماسەلەسىنە ەرەكشە ءمان بەرگەن-ءدى. وبلىس اكىمى لوندونداعى ءىسساپارىندا وسى ماڭىزدى ماسەلەنى دە نازاردان تىس قالدىرماي, اتالعان بانك وكىلدەرىن قۇنى 33,3 ميلليارد تەڭگە تۇراتىن زايسان, ءۇرجار, تارباعاتاي اۋداندارىنىڭ 50 ەلدى مەكەندەرىن گازداندىرۋ جوباسىنا اتسالىسۋعا ۇسىنىس ءبىلدىرىپتى. كەزدەسۋ قورىتىندىسىندا سۋما چاكرابارتي ەققدب-مەن بىرلەسكەن جوبالاردىڭ سانى مەن سوماسى بويىنشا ەلىمىزدىڭ ايماقتارى اراسىندا شىعىس قازاقستاننىڭ كوش باستاپ وتىرعانىن جەتكىزىپ, ينۆەستيتسيالىق جوبالاردى جۇزەگە اسىرۋعا قوسقان ۇلەسى ءۇشىن د.احمەتوۆكە «العىس حات» تابىس ەتىپ, بيىل قاراشادا پەكيندە وتەتىن ورتالىق ازيا فورۋمىنا قوناق رەتىندە قاتىسىپ, بىرلەسكەن جوبالاردىڭ بارىسى تۋرالى بايانداما جاساۋعا شاقىرىپتى.

رەتى كەلگەندە ايتا كەتەيىك, 2015 جىلدان باستاپ, وسى ۋاقىتقا دەيىن وبلىس اكىمدىگى مەن ەققدب 46,1 ميلليارد تەڭگەنىڭ 10 نەسيەلىك كەلىسىمشارتى پەن كەلىسىمىنە قول قويعان.  

ازامات قاسىم, «ەگەمەن قازاقستان»