ء«بىر قارىن مايدى ءبىر قۇمالاق شىرىتەدى» دەگەندەي, كەيبىر پوليتسيا قىزمەتكەرلەرىنىڭ اعات ىستەرىنەن كەيدە كوپكە توپىراق شاشۋ كورىنىسى كەزدەسىپ قالادى. سودان جۇرتتىڭ پوليتسەيلەرگە دەگەن سەنىمى دە ورتايىپ جاتادى.
وعان الەۋمەتتىك جەلىلەردە ايتىلاتىنداي, ازاماتتار مەن پوليتسيانىڭ اراسىنداعى ءوزارا تۇسىنىسپەۋشىلىك وقيعالارى دا سەبەپ بولادى. بىراق پوليتسيا قىزمەتكەرلەرىنىڭ ادامداردى قورعاۋدا ءومىرىن دە قيىپ جىبەرەتىن ەرلىگى نەمەسە كۇندەلىكتى ءتارتىپ ساقتاۋداعى يگى ىستەرى تۋرالى جەلىلەردە كوپشىلىكتىڭ جاق اشپايتىنى تاڭعالدىرادى. ءوزىم ىزدەپ, پوليتسەيلەردىڭ اتىنا جازىلعان ءبىر جىلى ءسوز تابا المادىم.
پوليتسيا قىزمەتكەرلەرىن دايىنداعاندا, ەڭ الدىمەن, ولاردان ادامگەرشىلىك پەن ادالدىق تالاپ ەتىلەدى, وسى جاقسى قاسيەتتەردى بويىنا ءسىڭىرۋ ءۇشىن وقۋ ورنى تاراپىنان كوپ جۇمىستار جۇرگىزىلەدى. جاقىندا عانا سونىڭ قايتارىمىنداي ءبىر وقيعا ورىن الدى. شىراقبەك قابىلباەۆ اتىنداعى قوستاناي اكادەمياسىنىڭ قىزمەتكەرى, پوليتسيا مايورى ەربولات قاينار مەن ماگيستراتۋرانىڭ ءبىرىنشى كۋرس ماگيسترانتى, پوليتسيا كاپيتانى نۇرداۋلەت مىرزازياەۆ كوشەدە كەلە جاتىپ ءاميان تاۋىپ الادى. ولار ءاميان ىشىندەگى جارتى ميلليون تەڭگەسىمەن يەسىن تاۋىپ, قايتارىپ بەرەدى. بۇل ادامگەرشىلىك, يماندىلىق ەمەي نەمەنە؟!
– ءبىز تۋىسقان ءىنىم نۇرداۋلەت ەكەۋمىز كەلە جاتىپ, ءۇيدىڭ جانىندا جەردە جاتقان ءامياندى تاۋىپ الدىق. باسىندا الۋعا قىمسىنعانىمىز شىندىق. ويتكەنى قازىرگى زاماندا اياقتان شالاتىن ادامدار دا بولادى عوي. بىراق كوپكە توپىراق شاشۋدان اۋلاقپىن. دەگەنمەن سونداي ءىستىڭ قۇربانى بولمايىق دەگەن ويمەن ءسال كىدىرىس جاسادىق تا, قاراۋ كەرەك دەپ شەشتىك. نۇرداۋلەت جەردە جاتقان ءامياندى كوتەرىپ الىپ, ىشىندە قۇجاتى بار ما دەپ قارادى. اشساق, ءامياننىڭ ىشىندە 500 مىڭنان استام تەڭگە جانە ءاميان يەسىنىڭ تولقۇجاتى, باسقا دا جەكە قۇجاتتارى بار ەكەن. ەكەۋمىز دەرەۋ ءاميان يەسىن ىزدەستىرىپ, تانىس-تامىرلارعا عالامتورداعى الەۋمەتتىك جەلىلەر ارقىلى جازىپ, قوڭىراۋ شالىپ, 2-3 ساعاتتاي ىزدەستىرۋ شارالارىن جاساپ, يەسىن تاۋىپ الدىق. تەلەفون ارقىلى سويلەسكەندە ءامياندى جوعالتىپ العان ادام ونى قايدا ءتۇسىرىپ العانىن ەسىنە تۇسىرە الماي قاتتى قينالدى. سوسىن ءبىز ءامياندى تاۋىپ العانىمىزدى ايتىپ, ءسۇيىنشى سۇراپ, ونى قايتارىپ بەرۋگە كەزدەسەتىن جەردى بەلگىلەدىك. ءبىرشاما ۋاقىتتان سوڭ كۇتكەن كىسىمىز كەلىپ, ءاميانىن قاراپ, ءىشىن تەكسەرىپ, اقشاسى مەن قۇجاتتارىنىڭ ورنىندا بولعانىنا قۋانىشىن ءبىلدىردى. مىنە, وسىلاي كىشكەنتاي عانا جاقسىلىق جاسايمىز دەپ, نۇرجان ء(امياننىڭ يەسى, ول اتى-ءجونىن تولىق جازباۋدى ءوتىندى) باۋىرىمىزدان ۇلكەن العىس الدىق, – دەيدى ەربولات قاينار.
ال ءاميان يەسى نۇرجان:
– مەنىڭ اكادەميا قىزمەتكەرلەرى ەربولات پەن نۇرداۋلەت باۋىرلارىما العىسىم شەكسىز. ەگەر دە قوماقتى سومانى ماعان قايتارماعاندا نە بولار ەدى؟ قازاقتا «قۋعان جەتپەيدى, بۇيىرعان كەتپەيدى» دەگەن جاقسى ءسوز بار عوي. مۇنىڭ ءيمانجۇزدى ادامداردىڭ قولىنا تۇسكەنىن, ماعان قايتا بۇيىرعانىن ۇيدەگى بالا-شاعامنىڭ نەسىبەسى, ءوزىمنىڭ اق-ادال مالىم ەكەن دەپ ءبىلدىم. بۇل جىگىتتەر قوعامداعى پوليتسيانىڭ بەدەلىن ارتتىرۋعا ۇلكەن ۇلەس قوستى دەپ ويلايمىن, – دەدى.
مىنە, جارتى كۇنگە سوزىلعان جارتى ميلليون تەڭگەنىڭ وقيعاسى وسىلاي جاقسىلىقپەن اياقتالعانى ۇلكەن ابىروي بولدى, بارشامىزدى قۋانتتى.
مەيرام وسپانوۆ,
ءىىم ش.قابىلباەۆ اتىنداعى قوستاناي اكادەمياسىنىڭ ءباسپاسوز حاتشىسى
قوستاناي