«پرەزيدەنتتىڭ بەس الەۋمەتتىك باستامالارىن» ىسكە اسىرۋ اياسىندا شاعىن نەسيەلەندىرۋدى كەڭەيتۋ تەتىكتەرى تۋرالى بۇگىن قر ۇكىمەتىنىڭ ءباسپاسوز ورتالىعىندا ەڭبەك جانە حالىقتى الەۋمەتتىك قورعاۋ ۆيتسە-ءمينيسترى نۇرجان التاەۆ ايتىپ بەردى.
بريفينگ بارىسىندا تىلشىلەر كاسىپكەرلىكپەن اينالىسقىسى كەلەتىندەرگە جاڭا شاعىن نەسيەلەندىرۋ باعدارلاماسى بويىنشا گرانتتار بولىنە مە سونى سۇرادى. ۆيتسە-مينيستر ايتىپ وتكەندەي, 2017 جىلى قازاقستاندا پيلوتتىق رەجيمدە بىرقاتار وڭىرلەردە ءوزىنىڭ شاعىن كاسىبىن اشقىسى كەلگەندەرگە گرانتتار ءبولۋ تەتىكتەرى سىناقتان وتكىزىلدى. مەملەكەت بۇل ماقساتتارعا 30 ملن جۋىق تەڭگە ءبولدى.
250 مىڭ تەڭگە گرانت سوماسىنا, مىسالعا ءۇي شارۋاسىنداعى ايەل تىگىن ماشيناسىن ساتىپ الىپ, ۇيىندە قانداي دا ءبىر بۇيىمداردى تىگۋدى باستاي الادى. نەمەسە ەلەكترمەن دانەكەرلەۋشى قىسقا مەرزىمدى كۋرستاردا وقىعاننان كەيىن وسىنداي گرانت ارقىلى دانەكەرلەۋ اپپاراتىن ساتىپ الىپ, ءوزىنىڭ شاعىن كاسىبىن باستاي الادى.
جالپى, ۆيتسە-ءمينيستردىڭ ايتۋىنشا, مەملەكەت بولەتىن شاعىن نەسيە سوماسى 2017 جىلى 0-دەن 19 ملن-عا دەيىن تەڭگەنى قۇرادى.
«ورتا ەسەپپەن العاندا بۇل سوما قالا نەمەسە اۋىلعا بايلانىستى 5-6 ملن تەڭگە شەگىندە اۋىتقيدى. وعان قوسا, مەملەكەت جاڭادان باستاعان كاسىپكەرلەرگە نەسيە سوماسىنان 85%-عا كەپىلدىك بەرەدى. شاعىن نەسيەلەر نيەت بىلدىرگەندەرگە «بيزنەس باستاۋ» باعدارلاماسى نەمەسە باسقا دا باعدارلامالار بويىنشا وقىعاندىعى تۋرالى سەرتيفيكات بولعان جاعدايدا بەرىلەتىنىن ايتا كەتكەن ءجون. شوب-پەن اينالىساتىن, شارۋا قوجالىقتارىنا, فەرمەرلەرگە شاعىن نەسيەلەر جاڭا جۇمىس ورىندارىن اشاتىن بولسا بەرىلەدى», — دەدى نۇرجان التاەۆ.
ەسكە سالساق, 5 ناۋرىزدا قر پارلامەنتى پالاتالارىنىڭ بىرلەسكەن وتىرىسىندا مەملەكەت باسشىسى نۇرسۇلتان نازارباەۆ «پرەزيدەنتتىڭ بەس الەۋمەتتىك باستاماسىن» جاريالاعان بولاتىن. ءتورتىنشى باستاما شاعىن نەسيەلەندىرۋدى كەڭەيتۋدى قاراستىرادى.