10 ناۋرىزدان باستاپ قازاقستان مەن ءباا اراسىندا ۆيزاسىز ساپار كەلىسىمى ەنگىزىلەدى

وسىعان بايلانىستى سىرتقى ىستەر مينيسترلىگى قازاقستان ازاماتتارىنىڭ بىرىككەن اراب امىرلىكتەرىنىڭ اۋماعىنا كىرۋ كەزىندەگى تالاپتار تۋرالى حابارلايدى.

1. 2018 جىلعى 10 ناۋرىزدان باستاپ قازاقستان ازاماتتارى ۆيزاسىز نەگىزدە حالىقارالىق قاتىناس ءۇشىن اشىق وتكىزۋ پۋنكتتەرى ارقىلى بىرىككەن اراب امىرلىكتەرى اۋماعىنا ۆيزاسىز كىرۋگە جانە ودان شىعۋعا, ونى كەسىپ وتۋگە جانە وندا 30 (وتىز) كۇننەن اسپايتىن مەرزىمدە بولۋعا قۇقىلى.

2. الەمدەگى بارلىق اۋەجايلارداعى تاجىريبەدەگىدەي, بىرىككەن اراب امىرلىكتەرىنە كىرۋ كەزىندە قازاقستان ازاماتتارى ءوز تولقۇجاتتارىن كورسەتۋلەرى ءتيىس, ودان سوڭ ولاردىڭ دەرەكتەرى ەلەكتروندىق جۇيەگە ەنگىزىلىپ, پاسپورت پاراعىنا ءمور باسىلادى;

3. 2017 جىلعى 23 مامىردا استانادا قول قويىلعان قازاقستان رەسپۋبليكاسى مەن بىرىككەن اراب امىرلىكتەرى اراسىنداعى ۆيزاسىز ساپارلار تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتاماعا سايكەس, پاسپورت جارامدىلىعىنىڭ اياقتالۋ مەرزىمى 6 ايدان كەم بولماۋى ءتيىس, سونداي-اق حالىقارالىق ازاماتتىق اۆياتسيا ۇيىمى (ICAO) تالاپتارىنا ساي  بولۋى كەرەك;

4. ءاربىر قازاقستان ازاماتىنىڭ, سونىڭ ىشىندە كامەلەتكە تولماعانداردىڭ دا جەكە ءوز پاسپورتتارى بولۋى ءتيىس. سابيلەر اتا-انالارىنىڭ ءبىرىنىڭ پاسپورتىنا جازىلماۋى ءتيىستى;

5. قازاقستان رەسپۋبليكاسىنىڭ ازاماتتارى ءوز پاسپورتتارىنىڭ قولدانىس مەرزىمدەرىن انىق بىلۋگە, سونداي-اق بىرىككەن اراب امىرلىكتەرى زاڭداررى مەن وندا بولۋ ەرەجەلەرىن ساقتاۋى ءتيىس;

6. بىرىككەن اراب امىرلىكتەرىنە حالىقارالىق ىزدەۋدە جۇرگەندەردەن باسقا بارلىق قازاقستان ازاماتتارىنا ۆيزاسىز كىرۋگە رۇقسات ەتىلەدى جانە ولاردىڭ ءباا-گە دەيىن قانداي ەلدەردە بولعانى ەسەپكە الىنبايدى;

7. كامەلەتكە تولعان, زاڭ جۇزىندە ءوز باسىنا جاۋاپ بەرە الاتىن قازاقستان رەسپۋبليكاسىنىڭ ايەل ازاماتتارىنا بىرىككەن اراب امىرلىكتەرىنىڭ اۋماعىنا ەر ادامنىڭ ەرتىپ ءجۇرۋىنسىز كىرۋىنە رۇقسات ەتىلەدى; 

8. بىرىككەن اراب امىرلىكتەرى اۋماعىندا قاۋىپسىزدىكتىڭ بارلىق تالاپتارىن ساقتاۋعا بايلانىستى كامەلەتكە تولماعان بالالاردى اتا-انالارىنىڭ ەرتىپ ءجۇرۋى ءتيىس. ال ەگەر, كامەلەتكە تولماعان بالا اتا-اناسىز ساپار شەگەتىن بولسا, وندا بالانىڭ اتا-اناسى نەمەسە سەنىمدى وكىلى شىعۋعا ارناپ كەلىسىم بەرگەن ءارى ەرەجەگە سايكەس (استاناداعى ءباا ەلشىلىگىندە, نەمەسە شەت ەلدەردەگى بىرىككەن اراب امىرلىكتەرىنىڭ كەز-كەلگەن ديپلوماتيالىق وكىلدىكتەرىندە) زاڭداستىرىلعان سەنىمحات ۇسىنىلۋى ءتيىس;

9. بىرىككەن اراب امىرلىكتەرى زاڭدارى مەن نورماتيۆتىك-قۇقىقتىق اكتىلەرىنە سايكەس, ۆيزاسىز تارتىپپەن بارعاندارعا كەلىسسوزدەر مەن كەزدەسۋلەر وتكىزۋگە بولادى;

10. ۆيزاسىز ءتارتىپ  بويىنشا بارعان قازاقستان رەسپۋبليكاسىنىڭ ازاماتتارىنا بىرىككەن اراب امىرلىكتەرىنىڭ اۋماعىندا جۇمىسقا تۇرۋعا بولمايدى;

11. بىرىككەن اراب امىرلىكتەرىنىڭ زاڭنامالارىنا سايكەس, ۆيزاسىز بولۋ ءتارتىبىنىڭ  مەرزىمىن بۇزعان ازاماتتارعا قاتىستى قارجىلاي ايىپپۇل سالۋ تۇرىندەگى اكىمشىلىك جازا كوزدەلگەن;

12. بىرىككەن اراب امىرلىكتەرىنىڭ اۋماعىنا ساپار شەگۋدى نيەت ەتكەندەر قوسىمشا اقپاراتتى ءباا ىشكى ىستەر مينيسترلىگىنىڭ رەسمي سايتىنان, نەمەسە «Emirates» پەن «Etihad» اۋەكومپانيالارى سياقتى  رەسمي تاسىمالداۋشىلاردان الۋلارىنا بولادى.