كەشە ەلورداعا ايگىلى قازاق مەملەكەتتىك تسيركى گاسترولدىك ساپارمەن كەلدى. اتالمىش ونەر ۇجىمى سوڭعى 30 جىلداعى بۇل ساپارىن استانا قالاسىنىڭ 20 جىلدىق مەرەيتويىنا ورايلاستىرعان. «رۋحاني جاڭعىرۋ» باعدارلاماسى اياسىندا دايارلانعان «سكيفيا» اتتى العاشقى تسيركتىك لازەرلىك شوۋى وتاندىق تسيرك مايتالماندارىنىڭ جاڭالىعى دەۋگە بولادى.
9 ناۋرىز بەن 1 ءساۋىر ارالىعىندا قويىلاتىن تسيرك سپەكتاكلى «ەر توستىك» ەرتەگىسىنىڭ جەلىسىنە نەگىزدەلگەن. ەجەلگى قازاق ەرتەگىسى بويىنشا ءوربيتىن 11 وقيعا ىلكى داۋىرلەردەگى ەتنيكالىق مادەنيەت پەن بۇگىنگى زاماناۋي ۋاقىت ايشىقتارىن ۇيلەستىرگەن. ونداعى قويىلىمعا ارنايى مۋزىكا جازىلىپ, ەلىمىزدىڭ ماڭدايالدى كومپوزيتورلارىنىڭ شىعارمالارى قولدانىلعان. ۇلتتىق ناقىشتاعى قويىلىمدى استانالىقتاردىڭ نازارىنا 60 ونەرپاز الىپ شىقپاق. جارتى عاسىرعا جۋىق باي تاريحى بار ونەر ۇجىمىن ەلورداعا تسيرك ديرەكتورى باقىت بوكەباەۆ باستاپ كەلگەن.
تسيرك ديرەكتورى ب.بوكەباەۆتىڭ ايتۋىنشا, ارتىستەر وسىناۋ ەرەكشە كورسەتىلىمدى فانتاستيكالىق اسەرلى لازەرلىك جارقىل-جۇرقىلدارمەن, كاسىبي ساحنالىق جارىق پەن دىبىستاردىڭ سۇيەمەلدەۋىمەن, LED ەكرانداعى ترانسفورماتسيالىق بەينەلەرمەن ساحنالاماق.
باعدارلاما ءۇشىن تسيرك جانرى بويىنشا ارنايى ستسەناري جازىلىپ, جاڭا تاڭعاجايىپ نومىرلەر مەن باس اينالدىرارلىق تريۋكتەر قويىلادى دەپ كۇتىلۋدە. ەكى جۇزدەن استام ديزاينەرلىك كوستيۋمدەر تىگىلىپ, ەرەكشە رەكۆيزيتتەر مەن ساحنالىق تەحنولوگيالار قولدانىلعان.
جالپى, قازاق مەملەكەتتىك تسيركىنىڭ بۇل «سكيفيا» باعدارلاماسىن قويۋداعى باستى ماقسات – كاسىبي وتاندىق تسيرك ونەرىن بارشاعا ناسيحاتتاي وتىرىپ, ۇلى دالانىڭ ءداستۇرلى مادەنيەتىنىڭ سارقىتىن, سايىپقىران بابالارىمىزدىڭ بەكزات ونەرىن ۇلت ساناسىندا قايتا جاڭعىرتۋ. قازاق ونەرىنىڭ قارا شاڭىراعى تانىمىمىزداعى تاريحتى قايتا تۇلەتۋ ارقىلى قىزعالداق قىزداردىڭ ورنەكتى ونەرىن, جۇرەك جۇتقان جىگىتتەردىڭ وتتى جىگەرىن شىڭداپ, كۇللى الەمگە قازاقستان مادەنيەتىنىڭ اسىل جاۋھارلارىن, كەمەل قۇدىرەتىن كورسەتپەك.
بۇل كۇنگە دەيىن ۇلت مادەنيەتىنىڭ ساۋلەتتى ورداسى باعىندىرعان بيىكتەر از ەمەس. ايتالىق, «جۇپتىق ەكۆيليبر» تالعات وڭالباەۆ پەن ينديرا تۇتقابەكوۆا VI حالىقارالىق «شابىت» شىعارماشىل جاستار فەستيۆالىنىڭ التىن جۇلدەگەرلەرى بولسا, «ۇيرەتىلگەن يتتەردىڭ» يەسى تيمۋر قورجۇمباەۆ ۋچاو جانە ۋحان قالاسىندا وتكەن حالىقارالىق تسيرك فەستيۆالىنىڭ قولا جۇلدەگەرى اتانعان.
تولىق ەكى ساعاتتىق قويىلىم بارىسىندا قازاقستاننىڭ ەڭبەك سىڭىرگەن قايراتكەرى جايداربەك كۇنعوجينوۆتىڭ جەتەكشىلىگىمەن «نوماد» – سالت اتتى-اكروباتتىق توبى, باسقا دا «ۇيرەتىلگەن يتتەر», «ۇيرەتىلگەن ايۋلار» سىندى بىرنەشە توپ ونەر كورسەتپەك. سونداي-اق ەرتەگىلىك قويىلىمدا ماكسيم نوۆيكوۆتىڭ «لازەرلىك شوۋى» مەن «ازيا» ءبيشى-اكروباتتىق توبىنىڭ جۇمىسى دا استانالىقتارعا ايرىقشا اسەر سىيلاماق.
ميراس اسان,
«ەگەمەن قازاقستان»