ش.مىرزاحمەتوۆ: «ەلباسى جولداۋىنان ەل بولاشاعىن باعامداۋعا بولادى»

بۇگىن بۇل تۋرالى وڭتۇستىك قازاقستان وبلىستىق وڭىرلىك كوممۋنيكاتسيالار قىزمەتىندە وتكەن بريفينگتە قوعام قايراتكەرى شالاتاي مىرزاحمەتوۆ ءمالىم ەتتى.

ونىڭ ايتۋىنشا, ماڭىزدى قۇجاتتا يندۋستريا, جاڭا تەحنولوگيا, تسيفرلاندىرۋ جۇيەسى, لوگيستيكالىق ينفراقۇرىلىم, قارجى سەكتورى, ادام كاپيتالى, ءتيىمدى مەملەكەتتىك باسقارۋ, زاڭ ۇستەمدىگى سىندى 10 باعىت بويىنشا بىرىگىپ جۇمىس ىستەۋ كەرەكتىگى باياندالعان. قوعام قايراتكەرى جولداۋدا ايتىلعان ماقسات-مىندەتتەردى جۇزەگە اسىرۋعا ەل بولىپ اتسالىسۋ كەرەكتىگىن ايتتى.

«مەملەكەت باسشىسى جولداۋدا بىرنەشە باعىتتار بويىنشا ماسەلە كوتەردى. وسى اتالعان تاپسىرمالار اياسىندا جۇمىس ىستەپ, مەجەلەردى ورىنداساق, الەمدەگى دامىعان ەلدەردىڭ قاتارىنان كورىنەتىن بولامىز. ەلباسى بارلىق سالادا زاماناۋي تەحنولوگيالاردى, تسيفرلى جۇيەنى پايدالانۋ كەرەكتىگىن ۇسىندى. بۇل زامان تالابى. ەلباسى جولداۋىنان ەل بولاشاعىن باعامداۋعا بولادى», - دەدى شالاتاي مىرزاحمەتوۆ.

پرەزيدەنت بارشا قازاقستاندىقتارعا جۇكتەلىپ وتىرعان مىندەتتىڭ ءبىرى - اگروونەركاسىپ كەشەنىن جاڭا تەحنولوگيالىق دەڭگەيگە كوتەرۋ ەكەنىن اتاپ ءوتتى. بۇل اۋىل شارۋاشىلىعىندا ەڭبەك ونىمدىلىگى مەن وڭدەلگەن ءونىم ەكسپورتىن تۇبەگەيلى ارتتىرۋعا سەرپىن بەرەدى.

ءباسپاسوز ءماسليحاتىنا قاتىسقان م.اۋەزوۆ اتىنداعى وقمۋ پرورەكتورى قانات بايبولوۆ وڭتۇستىك قازاقستان وبلىسى اگرارلىق ءوڭىر رەتىندە وزىق تەحنولوگيانى پايدالانۋدى ارتتىرا ءتۇسۋ قاجەتتىگىن ايتتى.

 «جولداۋدا ەلباسى 10 باعىت بويىنشا جۇمىلا ەڭبەك ەتۋ كەرەكتىگىن تاپسىردى. سونىڭ ىشىندە IT سالاسى, اۋىلشارۋاشىلىق ماماندىقتارىن دايارلايتىن جوعارى وقۋ ورىندارى وقۋ باعدارلامالارىن جاڭارتىپ, اگروونەركاسىپ كەشەنىندەگى وزىق ءبىلىم مەن تاجىريبەنى تاراتاتىن ورتالىققا اينالۋ كەرەكتىگىنە توقتالدى. ماسەلەن, 2017-2021 جىلدارعا ارنالعان تسيفرلى قازاقستان باعدارلاماسى اياسىندا م.اۋەزوۆ اتىنداعى وقمۋ-دا IT-ورتالىق قۇرىلىپ, قازىرگى تاڭدا بىرنەشە جوبا ىسكە اسىرىلۋدا», - دەدى قانات سەيىتجان ۇلى.

ءباسپاسوز ءماسليحاتىنا قاتىسۋشىلار جۋرناليستەردىڭ سۇراقتارىنا جاۋاپ بەرىپ, ەلباسى جولداۋىن حالىق اراسىندا كەڭىنەن ناسيحاتتاۋعا شاقىردى.