اتىراۋ وبلىسىندا حالىق باتىرى ماحامبەت وتەمىس ۇلىنا ارنالعان ەسكەرتكىش بوي كوتەردى. باتىر ەسىمىمەن اتالاتىن ماحامبەت اۋدانىنىڭ ورتالىعىنان ەسكەرتكىشتىڭ اشىلۋ سالتاناتىنا وبلىس اكىمىنىڭ ورىنباسارى الىبەك ناۋتيەۆ قاتىسىپ, ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا جاسالعان يگى ءىستىڭ ماڭىزى جايلى ايتتى.
ال اۋدان اكىمى سىرىم رىسقاليەۆ «ەلى ءۇشىن ەر بولىپ تۋعان يساتاي مەن ماحامبەت ەسىمدەرى كۇللى قازاق حالقى ءۇشىن قاستەرلى دە قۇرمەتتى. وشكەنىمىز جانىپ, رۋحاني جانىمىزدىڭ شامىن قايتا مازداتقان جاڭعىرۋ كەزەڭىندە ۇلىلارىمىزدى قاستەرلەۋ – قاسيەتتى بورىشىمىز. باتىر اتىمەن اتالاتىن اۋدان ورتالىعىندا بابا ەسكەرتكىشىنىڭ جوقتىعى بارشا جۇرتشىلىقتىڭ كوڭىلىنە قاياۋ ءتۇسىرىپ كەلگەن ەدى. مىنە, باتىر بابامىز الىپ ەسكەرتكىش بولىپ ورتامىزعا ورالدى. ماحامبەت وتەمىس ۇلىنا ارنالعان بۇل ەڭسەلى ەسكەرتكىش رۋحىمىزدى وياتاتىن, ۇلى مۇراتتارعا جەتەلەيتىن, ەلجاندىلىققا, وتانشىلدىققا ۇندەيتىن قاستەرلى دە قاسيەتتى ورىنعا اينالاتىنىنا سەنەمىز», دەدى.
سالتاناتتى جيىندا باتىردىڭ ءتورتىنشى ۇرپاعى باعىت عابدۋللين, وبلىستىق قوعامدىق قاۋىمداستىق توراعاسى مۇرات ساقتاي ۇلى, قازاقستان جازۋشىلار وداعى اتىراۋ وبلىستىق فيليالىنىڭ توراعاسى, حالىقارالىق «الاش» سىيلىعىنىڭ يەگەرى, اقىن قويشىعۇل جىلقىشيەۆتەر ءسوز الدى.
ەسكەرتكىشتىڭ اۆتورى – ءمۇسىنشى, قازاقستان سۋرەتشىلەر وداعىنىڭ مۇشەسى سەرىك ماتەنيازوۆ. «باتىس اليانس ستروي» مەكەمەسىنىڭ باسشىسى ءادىل جۇبانوۆ تۇعىرىن ورناتتى. ەسكەرتكىشتىڭ جالپى بيىكتىگى – 10 مەتر 80 سم. قولادان قۇيىلىپ, تۇعىرى تەمىر-بەتونمەن جاسالىپ, گرانيتپەن قاپتالعان.
باقىتگۇل باباش, «ەگەمەن قازاقستان»
اتىراۋ