بۇل كۇندەرى قاراعاندىدا قان تامىرلارىنا جوعارى تەحنولوگيالى وتالار جاسالىپ جاتىر. ول ءۇشىن ومو نەيروحيرۋرگيا جانە نەۆرولوگيا ورتالىعىندا انگيوگرافيالىق جابدىعى بار وپەراتسيالىق بلوك اشىلدى.
№3 وتباسى دەنساۋلىق ورتالىعى مەملەكەت-جەكەمەنشىك سەرىكتەستىگى اياسىندا بوي كوتەرگەن نىسان. قۇرىلىس جۇمىستارىن جۇرگىزۋ مەن مەديتسينالىق جابدىقپەن جابدىقتاۋ ءۇشىن جەكە كاسىپكەر د.مىرزاعاليەۆ 400 ملن تەڭگە كولەمىندە قاراجات جۇمساعان. جالپى اۋدانى 1 140 شارشى مەتردەن تۇراتىن عيماراتتا دارىگەرلەر ءبىر اۋىسىمدا 150 ادامدى قابىلداۋعا قاۋقارلى. تۇرعىندار كوپ ورنالاسقان اۋداندا بوي كوتەرگەن وتباسى ورتالىعى باستاپقى مەديتسينالىق-سانيتارلىق كومەكتىڭ قولجەتىمدىلىگىن ارتتىراتىن بولادى.
– ورتالىقتا بارلىق جاعداي جاسالعان. اتالعان ءوڭىر تۇرعىندارى ءۇشىن كورسەتىلەتىن كومەك ساپالى بولادى دەگەن ۇمىتتەمىز. بۇل جەردە جالپى پراكتيكاداعى دارىگەرلەر, تەراپەۆ, پەدياتر, اكۋشەر-گينەكولوگتار جۇمىس ىستەيدى, فۋنكتسيالى دياگنوستيكا كابينەتتەرى بار. رەنتگەن اپپاراتى قويىلادى. سونىمەن قاتار بولاشاقتا سالالىق ماماندار دا قىزمەت كورسەتەدى دەپ جوسپارلاۋدامىز, – دەيدى ورتالىق ديرەكتورى روزا رازيەۆا.
وتباسى ورتالىعى – قاراعاندى قالاسىنداعى №1 ەمحانانىڭ بەسىنشى فيليالى. بۇل جەردە 20 مىڭ ادامعا دەيىن قىزمەت كورسەتىلەدى. قىزمەتكەرلەرگە جانە كەلۋشىلەرگە قولايلى بولۋى ءۇشىن عيماراتتا باسقا ەمحانالاردا قاراستىرىلماعان جەلدەتۋ جۇيەسى ورناتىلعان.
وبلىستىق دەنساۋلىق ساقتاۋ باسقارماسىنىڭ باسشىسى ەرلان نۇرلىباەۆتىڭ ايتۋىنشا, وبلىس بويىنشا ءبىر دارىگەرگە ورتاشا ەسەپپەن 2 مىڭ ادام بەكىتىلگەن. فيليالداردى ىرىلەندىرۋ بۇل كورسەتكىشتى 1500 ادامعا دەيىن ازايتۋعا مۇمكىندىك بەرەدى ەكەن.
– مىنە, تاعى دا ءبىر مەديتسينا ورتالىعى اشىلدى. جاڭا جىلداعى بۇل جاڭالىق تۇرعىندار ءۇشىن قۋانىشتى جاعداي. نىسان مەملەكەت-جەكەمەنشىك سەرىكتەستىگى اياسىندا سالىنعان. ال, وبلىس بويىنشا جالپى 21 الەۋمەتتىك مەملەكەتتىك نىسان بوي كوتەردى. بۇل رەسپۋبليكا بويىنشا وتە جاقسى كورسەتكىش. وسى ارقىلى بىرنەشە جىلدار بويى شەشىمىن تاپپاي كەلگەن الەۋمەتتىك ماسەلەلەردى شەشۋگە مۇمكىندىك الدىق, – دەيدى ايماق باسشىسى ە. قوشانوۆ.
جاعداياتتىق ورتالىقتىڭ باستى مىندەتى – وبلىستا ينسۋلت اۋرۋىنا شالدىققاندارعا كومەك كورسەتۋدى ۇيىمداستىرۋ. ياعني دارىگەر ناۋقاسقا باراتىن جەدەل جاردەم جولعا شىققان ساتتەن باستاپ, اۋرۋحاناعا جەتكىزىلگەنگە دەيىنگى جاعدايدى باقىلاپ وتىرادى. قاراعاندى وبلىسى بويىنشا اقپاراتتى جيناۋعا مۇمكىندىك بەرەتىن ارنايى سىزبا ارقىلى ونلاين رەجىمدە جۇمىس جاسايتىن ورتالىقتا ينسۋلت تيپتەرى بويىنشا اقپاراتتى قاداعالاپ, ءار كۇنگە مونيتورينگ جۇرگىزىلىپ وتىرادى.
ال, 2017 جىلدىڭ 1 ناۋرىزىندا 215 ورىنعا ارنالعان نەيروحيرۋرگيا جانە نەۆرولوگيا ورتالىعى اشىلعان بولاتىن. قازىر ورتالىقتا انگيوگرافيالىق قوندىرعىمەن وپەراتسيالىق بلوك جۇمىس جاساۋدا. «Philips» فيرماسىنىڭ «Allura Centron» انگيوگراف اپپاراتىمەن تامىرىشىلىك, شاعىن ينۆازيالىق ادىستەر ارقىلى ينسۋلت, انەۆريزم, مالفورماتسيا, ستەنوز سيياقتى اۋرۋلارعا وتا ەندوۆاسكۋليارلى تۇردە جاسالادى.
وسىدان ءبىراز ۋاقىت بۇرىن عانا ميداعى انەۆريزمانى كەسىپ الىپ تاستاپ, ءۇش كۇن وتكەن سوڭ ناۋقاستى اۋرۋحانادان شىعارۋ دەگەن قيال سەكىلدى بولاتىن. الايدا ءبىزدىڭ نەيروحيرۋگتەر ءۇشىن مۇنداي وتا جاساۋ «Philips» فيرماسىنىڭ «Allura Centron» جاڭا انگيوگرافىنىڭ ارقاسىندا مۇمكىن بولىپ وتىر. بۇل قۇرىلعىنىڭ كومەگىمەن كۇردەلى قان تامىرى ىشىندە جاسالاتىن وپەراتسيالاردى شاعىن عانا تىلىك ارقىلى جاساۋعا بولادى. ول ءوز كەزەگىندە اناعۇرلىم تەزىرەك ساۋىعۋعا سەپتىگىن تيگىزەدى. سونىمەن قاتار بۇل اپپارات قان تامىرلارى اۋرۋلارىن بارىنشا دالىرەك دياگنوستيكالاۋعا كومەكتەسەدى. ايتا كەتۋ كەرەك, مەديتسينا ورتالىعىندا ايىندا ينسۋلت ءبولىمى مەن نەيروحيرۋرگيا جانە نەۆرولوگيا ورتالىعى اشىلعالى ءينسۋلتتىڭ سالدارىنان قازا بولۋ جايتتارى ازايعان.
ناۋقاستاردى دەرتتىڭ العاشقى 40 مينۋتىندا اۋرۋحاناعا جەتكىزۋ كورسەتكىشتەرى دە 2016 جىلعى 35%-بەن سالىستىرعاندا 2017 جىلى 85%-عا دەيىن جوعارىلاعان. دارىگەرلەردىڭ ايتۋىنشا ينسۋلت كەزىندە ناۋقاستى اياق-قول تارتىلۋدان ساقتاپ قالۋعا نەمەسە ءومىرىن اراشالاپ قالۋدا ءبىرىنشى ساعات – ەڭ ماڭىزدى مەرزىم. – بۇل اپپارات بىزگە 3D رەجىمدە بولىپ جاتقان بارلىق جايتتى كورۋگە, اناعۇرلىم ناقتى دياگنوز قويۋعا, شۇعىل تۇردە ناۋقاسقا قاجەتتى وتانى جاساۋعا مۇمكىندىك بەرەدى.
جاڭا انگيوگرافپەن جۇمىس ىستەۋ ءۇشىن ءبىزدىڭ ماماندار استانادا تاجىريبەدەن ءوتىپ قايتتى. قازىردىڭ وزىندە ءبىز جوعارى تەحنولوگيالىق وتالاردى جاساپ جاتىرمىز. ايتا كەتۋ كەرەك, شەتەلدەردە مۇنداي وتالار وتە قىمبات. سەبەبى, ولار شىن مانىسىندە ادامداردىڭ ءومىرىن ساقتاپ قالادى. بۇل بولاشاققا قادام, – دەدى وبلىستىڭ باس نەيروحيرۋرگى عابيت ماحامباەۆ.
قاراعاندىلىق نەيروحيرۋرگتەر ناۋقاستاردىڭ ءومىرىن بۇرىنعىدان دا كوبىرەك اراشالاپ قالۋعا مۇمكىندىك الىپ وتىر.
ميراس اسان, «ەگەمەن قازاقستان»
قاراعاندى