بۇگىنگى مەكتەپ قابىرعاسىندا ت ۇلىمى مەن ايدارى جەلبىرەپ, ءبىلىم الۋعا قۇشتار بولىپ قۇلدىراڭداپ جۇرگەن ۇرپاق – ەركىن ەلدىڭ ەرتەڭى. ولاردىڭ ءبىلىمى مەن ءتالىم-تاربيەسىنە قوعام دا, اعا بۋىن دا جاۋاپتى. وسى ورايدا تاياۋدا ءبىلىم بەرۋ ۇيىمدارىنىڭ قاتىسۋىمەن ء«بىلىم بەرۋ مازمۇنىن جاڭارتۋدىڭ ماڭىزدىلىعى» اتتى سەمينار-كونفەرەنتسيا ءوتتى.
كونفەرەنتسياعا ۇيىتقى بولعان «قازاقستاننىڭ ءبىلىم جانە عىلىم الەمى» رەسپۋبليكالىق جۋرنالىنىڭ باس رەداكتورى دينا ورىنبەكقىزى ەلباسى نۇرسۇلتان نازارباەۆتىڭ قازاقستان حالقىنا جولداۋى جانە «بولاشاققا باعدار: رۋحاني جاڭعىرۋ» اتتى ماقالاسىنىڭ اياسىندا اتقارىلىپ جاتقان ءىس-شارالاردىڭ ىشىندە ءبىلىم بەرۋ سالاسىنداعى ماسەلەلەردىڭ دە الار ورنى بار ەكەنىن, زامانعا ساي ءبىلىم بەرۋ مازمۇنىن جاڭارتۋ تيىمدىلىگى تۋرالى اڭگىمەلەدى.
اتىراۋ قالاسىنىڭ مەكتەپ ديرەكتورى ايناگۇل بولەكوۆا مەنەدجمەنتتەگى ءىس-تاجىريبەسىمەن بولىسسە, استانا قالاسى مەكتەپ-ليتسەيى ديرەكتورىنىڭ عىلىمي-ادىستەمەلىك جۇمىس بويىنشا ورىنباسارى زامزاگۇل كەنجەاحمەتوۆا ءبىلىم مەن تاربيەنى قاتار وربىتەتىن ۇلتتىق پەداگوگيكانىڭ ماڭىزدىلىعىن, ونىڭ ۇلتتىق قۇندىلىقتاردى دارىپتەۋدەگى ورنى مەن ۇلتتىق كودتى تانۋداعى قايتالانباس ءرولى تۋرالى ايتا كەلىپ, ناقتىلىعى مەن تيىمدىلىگى جوق كوپتەگەن باعدارلامالارعا قاراعاندا «جەتى قازىنا» سياقتى مەكتەپ وقۋشىلارىنىڭ جاس ەرەكشەلىكتەرىنە قاراي تۇزىلگەن باعدارلامالاردى ۇسىنۋدىڭ وزەكتىلىگىن جەتكىزدى. «بۇگىنگى ۇلتتىق پەداگوگيكا «شاقىرىلماعان قوناقتىڭ سىپىرىلماعان جەرگە وتىرعانى» سياقتى كۇن كەشۋدە. ءوزىمىز ونى تورگە شىعارماساق, سىرتتان ەشكىم ونى دارىپتەمەيدى», دەدى ول.
سونداي-اق بەلگىلى قوعام قايراتكەرى ورازگۇل اسانعازى دا وسى تاقىرىپتى جالعاستىرىپ, ەلىن, جەرىن, ءتىلىن, ءدىلىن ماقتان تۇتاتىن ۇرپاقتى وقىتاتىن دا, قالىپتاستىراتىن دا جاۋاپتى تۇلعا مۇعالىم ەكەندىگىنە نازار اۋداردى. ماڭگىلىك ەل بولۋعا اپاراتىن بىردەن- ءبىر جول – قازاقتىڭ ءتول مادەنيەتىن تانۋ مەن ونىڭ باي انا تىلىندە ءبىلىم الۋ, سودان كەيىن وزگە ءتىلدى مەڭگەرۋ ەكەندىگىن ايتتى.
جيىندا قازاقستاننىڭ ءار تۇكپىرىنەن كەلگەن ءبىلىم بەرۋ ۇيىمدارىنىڭ وكىلدەرى استانا قالاسىنىڭ №70 مەكتەپ-ليتسەيىندە اشىق ساباق وتكىزىپ, وتكىزگەن ساباقتارعا تالداۋ جاسادى. وسىلايشا, مۇعالىمدەر ءوزارا تاجىريبە مەن پىكىر الماستى. سەمينار-كونفەرەنتسيادا سونىمەن قاتار قازاق ءتىلىن بىرتىندەپ لاتىن الىپبيىنە كوشىرۋ جۇمىستارى جانە ونىڭ ىڭعايلى جولىن قاراستىرۋ جايى قوزعالدى. الماتى قالاسىنان ارنايى كەلگەن فيلولوگيا عىلىمدارىنىڭ كانديداتى انار فازىلجانوۆا اتالعان ماسەلەنى عىلىمي تۇرعىدان قاراستىرۋدىڭ قاجەتتىلىگىنە توقتالدى. وسى رەتتە لاتىن الىپبيىنە كوشۋگە بايلانىستى قۋانتقان ۆانوۆ وزىندىك زەرتتەۋ جۇمىستارىمەن تانىستىردى.
مازمۇندى باسقوسۋدا ءبىلىم بەرۋ ۇيىمدارىنىڭ بىرقاتار قىزمەتكەرى «ۇزدىك اۆتور» جانە ء«بىلىم كوشباسشىسى» توسبەلگىلەرىمەن, باسقا دا ماراپاتتارمەن ماراپاتتالدى.
دۋمان اناش, «ەگەمەن قازاقستان»