مەملەكەتتىك ورتالىق مۋزەيدە قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى قورىنىڭ نەگىزىندە ۇيىمداستىرىلعان «ن.نازارباەۆ: ءداۋىر, تۇلعا, قوعام» كورمەسى اياسىندا دارىستەر مەن شەبەرلىك ساباقتارى وتكىزىلدى.
«ن.نازارباەۆ: ءداۋىر, تۇلعا, قوعام» كورمەسى «كوشباسشى جولى», «كوشباسشى فەنومەنى», «ەلباسى مارتەبەسى – ەل مارتەبەسى» جانە «الەم تانىعان كوشباسشى» تاقىرىپتىق ارنايى بولىمدەردەن تۇرادى. ەل نازارىنا قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسى قورىنىڭ ارحيۆتىك قۇجاتتارى, كىتاپتار مەن جادىگەرلەرىنىڭ توپتاماسى ۇسىنىلىپ وتىر. كورمەنىڭ ء اربىر ەكسپوزيتسياسىنا قويىلعان تاۋەلسىز قازاقستاننىڭ تاريحي دەرەكتىك حرونيكاسى ەلباسىنىڭ قىزمەتى ارقىلى ينتەراكتيۆتى اۋقىمدى اقپاراتتىق رەسۋرستار ارقىلى كورسەتىلەدى.
ەل ىقىلاسىن وياتقان بۇل كورمەنىڭ ماقساتى قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ الەمگە تانىلعان, ەكونوميكاسى قارقىندى دامىعان, ءىرى ەكونوميكالىق, وندىرىستىك, عىلىمي, مادەني, زاماناۋي مەملەكەت قالىپتاستىرۋداعى ءرولىن جۇيەلى تۇردە كورسەتۋ بولىپ تابىلادى. كىتاپحانا جيناعىنىڭ ماتەريالدارى ن.نازارباەۆتىڭ مەكتەپ جاسىنداعى, جاستىق شاق, كومسومول, پارتيا جانە مەملەكەتتىك قىزمەتتەگى كەزەڭدەرىن سيپاتتايدى. قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىنىڭ قورىنداعى كىتاپتاردىڭ اراسىنان ءار جىلداردا ن.ءا.نازارباەۆقا سىيعا بەرىلگەن قازاقستاندىق اۆتورلاردىڭ قولتاڭباسى قويىلعان كىتاپتار ەرەكشە ورىن الادى. مەملەكەت باسشىسىنىڭ تۇلعاسىنا بايلانىستى, ءاربىر قولتاڭباسى بار كىتاپتا سىيلاۋشىنىڭ تاعدىرى مەن كىتاپتىڭ قايتالانباس تاريحى جاتىر.
«الەم تانىعان كوشباسشى» بولىمىندە شەتەلدىك مەملەكەت جانە ۇكىمەت باسشىلارىنان تاپسىرىلعان ديپلوماتيالىق سىيلىقتار ۇسىنىلعان. بۇل سىيلىقتار ن.ءا.نازارباەۆتىڭ سىرتقى ساياساتتاعى ساياسي باستامالارىنىڭ ناتيجەسى بولىپ تابىلادى. قازاقستاننىڭ قازىرگى زامانعى تاريحىنىڭ وزەكتى ماسەلەلەرى مەملەكەت باسشىسىنىڭ كوپتەگەن عىلىمي جانە عىلىمي-تانىمدىق ەڭبەكتەرىندە قاراستىرىلادى. ن.ءا.نازارباەۆ دۇنيە ءجۇزىنىڭ 34 تىلىنە اۋدارىلعان جيىرمادان ارتىق كىتاپتاردىڭ جانە عىلىمي ماقالالاردىڭ اۆتورى.
ەلباسى ن.ءا.نازارباەۆقا شەتەلدىڭ 30-دان اسا مەملەكەتىنەن بەرىلگەن ەڭ جوعارى ماراپاتتارى كىتاپحانانىڭ مۋزەي قورىنىڭ ەڭ باستى قۇندىلىقتارى ءارى ماقتانىشى بولىپ ەسەپتەلەدى. بۇل ماراپاتتار مەملەكەتتەر اراسىنداعى ديپلوماتيالىق قاتىناستار ورناتۋداعى ن.ءا.نازارباەۆتىڭ قوسقان زور ۇلەسى ءۇشىن, يادرولىق قاۋىپتى جويۋ جانە قازاقستانداعى ۇلتارالىق, دىنارالىق تاتۋلىق پەن كەلىسىمدى قامتاماسىز ەتۋدەگى تولايىم باستامالارى ءۇشىن بەرىلگەنى بەلگىلى.
ءىس-شاراعا ەلىمىزدىڭ تانىمال تاريحشى عالىمدارى ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى, پروفەسسور زيابەك قابىلدينوۆ پەن پروفەسسور مۇرات ءابدىروۆ قاتىسىپ, كورمەگە كەلگەن جاستارعا قىزعىلىقتى اڭگىمە وتكىزدى.
ساپارباي پارمانقۇل, «ەگەمەن قازاقستان»
الماتى