ەلباسى قازاقستان حالقىنا جولداۋىندا ءتيىمدى مەملەكەتتىك باسقارۋدىڭ جولدارىن كورسەتتى.
«مەملەكەتتىك اكىمشىلەندىرۋ كەزىندە كاسىپكەرلەر مەن تۇرعىنداردىڭ شىعىندارىن قىسقارتۋعا بايلانىستى جۇمىستاردى جالعاستىرۋ قاجەت. وسىعان وراي بيزنەستى رەتتەۋگە قاتىسۋدى ءارى قاراي ازايتۋعا باعىتتالعان زاڭ قابىلداۋدى جىلدامداتۋ كەرەك. ء«بىر تەرەزە» قاعيداتى بويىنشا بيزنەسكە مەملەكەتتىك قولداۋ كورسەتۋ ۇدەرىستەرىن تسيفرلاندىرۋدى قامتاماسىز ەتۋ قاجەت. مەملەكەتتىك ورگانداردىڭ اقپاراتتىق جۇيەلەرىنىڭ ينتەگراتسياسى ء«بىر ءوتىنىش» قاعيداتى بويىنشا جەكەلەگەن مەملەكەتتىك قىزمەت كورسەتۋدەن كەشەندى قىزمەت كورسەتۋگە كوشۋگە مۇمكىندىك بەرەدى», دەدى ەلباسى.
سونىمەن قاتار مەملەكەت باسشىسى تابيعي مونوپوليا سۋبەكتىلەرى كورسەتەتىن قىزمەتتەرىنىڭ ساپاسىن ارتتىرۋ جونىندەگى جۇمىستى جالعاستىرۋ كەرەكتىگىن اتاپ ءوتتى.
«ولار ءۇشىن جانە ەنەرگيا وندىرۋشىلەر ءۇشىن ينۆەستيتسيالىق باعدارلامالارىن ەسكەرىپ, نەگىزدەلگەن تاريفتەردى بەلگىلەۋ ماڭىزدى. بيزنەس-كليماتتى جاقسارتۋ ءۇشىن باتىل ءىس-قيمىل تالاپ ەتىلەدى, اسىرەسە وڭىرلىك دەڭگەيدە. ۇكىمەت بيزنەستى كولەڭكەدەن شىعارىپ, ونى قولداۋعا باعىتتالعان جۇيەلى شارالاردىڭ جاڭا پاكەتىن دايىنداۋعا ءتيىس», دەلىنگەن جولداۋدا.
ول مەملەكەتتىك ورگاندارعا باعىنىشتى ۇيىمداردىڭ سانىن قىسقارتۋ ەسەبىنەن جەكەشەلەندىرۋ جوسپارىن كەڭەيتە وتىرىپ, ونى ىسكە اسىرۋدى جەدەلدەتۋ قاجەت ەكەنىن ايتتى.
«اكىمشىلىك شىعىنداردى ازايتۋ ءۇشىن ۆەدومستۆوعا باعىنىشتى ناقتى قاجەتتى ۇيىمداردى مۇمكىندىگىنشە بىرىكتىرۋ كەرەك. بوساعان قاراجاتتى مەملەكەتتىك قىزمەتشىلەردىڭ فاكتورلىق-بالدىق شكالاعا نەگىزدەلگەن جاڭا ەڭبەكاقى جۇيەسىن ەنگىزۋگە باعىتتاۋ قاجەت. بۇل ورتالىقتاعى جانە وڭىرلەردەگى مەملەكەتتىك قىزمەتشىلەر جالاقىسىنىڭ ديسپروپورتسياسىن قىسقارتادى, سونداي-اق جۇمىستىڭ سيپاتى مەن تيىمدىلىگى ەسكەرىلەتىن بولادى», دەدى ەلباسى.
نۇرسۇلتان نازارباەۆ ۇكىمەتكە مەملەكەتتىك قىزمەت ىستەرى اگەنتتىگىمەن بىرلەسىپ, 2018 جىلى ورتالىق جانە جەرگىلىكتى مەملەكەتتىك ورگانداردا وسى جۇيەنى ەنگىزۋدىڭ پيلوتتىق جوبالارىن ىسكە اسىرۋدى تاپسىردى.
«وڭىرلەردەگى مەملەكەتتىك قىزمەتتىڭ تيىمدىلىك الەۋەتىن ولاردىڭ ەكونوميكالىق دەربەستىگى مەن جاۋاپكەرشىلىگىن ارتتىرۋ ارقىلى مەيلىنشە تولىق اشۋ كەرەك. جالپى العاندا, وڭىرلىك ساياسات وڭىرلەردىڭ شىعىندارىن تەڭەستىرۋدەن جەكە تابىستارىنىڭ ءوسىمىن ىنتالاندىرۋعا باعىتتالۋعا ءتيىس. اتاپ ايتقاندا, بۇگىندە الەمدەگى ءاربىر ونىنشى جۇمىس ورنىن اشىپ وتىرعان سىرتتان كەلۋشىلەر ءتۋريزمى مەن ىشكى تۋريزم كەز كەلگەن ءوڭىر ءۇشىن پەرسپەكتيۆالىق تابىس كوزدەرىنىڭ ءبىرى بولىپ سانالادى», دەدى مەملەكەت باسشىسى.
سونىمەن قاتار ۇكىمەت ۆيزا ماسەلەلەرىن جەڭىلدەتۋدى, ينفراقۇرىلىمدى دامىتۋدى جانە تۋريزم سالاسىنداعى كەدەرگىلەردى الىپ تاستاۋدى قامتيتىن كەشەندى شارالار قابىلداۋى كەرەكتىگىن اتاپ ءوتتى.
«فيسكالدى ورتالىقسىزداندىرۋ اياسىندا شاعىن جانە ورتا بيزنەستەن تۇسەتىن كورپوراتيۆتى تابىس سالىعىن وڭىرلىك بيۋدجەتتەرگە بەرۋ ماسەلەسىن شەشۋ كەرەك. 2018 جىلدىڭ 1 قاڭتارىنان باستاپ 2 مىڭنان استام ادام تۇراتىن اۋداندىق ماڭىزى بار قالالار, اۋىلدار مەن اۋىلدىق وكرۋگتەردە جەرگىلىكتى ءوزىن-ءوزى باسقارۋدىڭ دەربەس بيۋدجەتى مەن كوممۋنالدىق مەنشىگىن ەنگىزۋ زاڭ جۇزىندە بەلگىلەنگەن. 2020 جىلدان باستاپ بۇل نورمالار بارلىق ەلدى مەكەندەردە كۇشىنە ەنەدى. سالىقتىق جانە سالىقتان تىس باسقا دا تۇسىمدەردىڭ 7 ءتۇرى, سونداي-اق شىعىنداردىڭ 19 باعىتى اۋىل بيۋدجەتىنە بەرىلدى. بۇل جەرگىلىكتى ماڭىزى بار ماسەلەلەردى شەشۋ ءۇشىن حالىقتى تارتۋعا مۇمكىندىك بەرەدى», دەدى مەملەكەت باسشىسى.
سونىمەن قاتار مەملەكەتتىك ورگاندار ناقتى ۋاقىت جانە جەدەل جاۋاپ بەرۋ رەجىمىندە ازاماتتاردىڭ ەسكەرتپەلەرى مەن ۇسىنىستارىن ەسەپكە الۋ ءۇشىن زاماناۋي تسيفرلىق تەحنولوگيالاردى قولدانۋعا ءتيىس ەكەنىن اتاپ ءوتتى. «مەملەكەت پەن كومپانيالار جاڭا تەحنولوگيالاردى ەنگىزە وتىرىپ, ءوز اقپاراتتىق جۇيەلەرى مەن قۇرىلعىلارىنىڭ بەرىك قورعالۋىن قامتاماسىز ەتۋى كەرەك», دەدى ەلباسى.
بۇگىندە كيبەرقاۋىپسىزدىك ۇعىمى تەك اقپاراتتى عانا ەمەس, سونىمەن قاتار وندىرىستىك جانە ينفراقۇرىلىمدىق نىسانداردى باسقارۋ تەتىگىن قورعاۋ دەگەندى دە بىلدىرەدى. «وسى جانە وزگە دە شارالار قازاقستاننىڭ ۇلتتىق قاۋىپسىزدىك ستراتەگياسىندا كورىنىس تابۋعا ءتيىس», دەلىنگەن جولداۋدا.