ەلباسى نۇرسۇلتان نازارباەۆ قازاقستان حالقىنا جولداۋىندا قۇرىلىسقا جانە كوممۋنالدىق سەكتورعا زاماناۋي تەحنولوگيالاردى ەنگىزۋ قاجەتتىگىن اتاپ ءوتتى.
«جۇزەگە اسىرىلىپ جاتقان باعدارلامالار ارقاسىندا قازاقستاندا پايدالانۋعا بەرىلگەن تۇرعىن ۇيلەردىڭ كولەمى جىلىنا 10 ميلليون شارشى مەتردەن استى. تۇرعىن ءۇيدى كوپشىلىككە قولجەتىمدى ەتكەن تۇرعىن ءۇي جيناقتاۋ جۇيەسى ءتيىمدى جۇمىس ىستەۋدە. باسپانامەن قامتۋ كورسەتكىشى سوڭعى 10 جىلدا ءبىر تۇرعىنعا شاققاندا 30 پروتسەنتكە ءوسىپ, بۇگىندە 21,6 شارشى مەتردى قۇرادى. بۇل كورسەتكىشتى 2030 جىلى 30 شارشى مەترگە دەيىن جەتكىزۋ كەرەك», دەدى نۇرسۇلتان نازارباەۆ.
مەملەكەت باسشىسى وسى مىندەتتى ورىنداۋ بارىسىندا قۇرىلىس سالۋدىڭ جاڭا ادىستەرىن, زاماناۋي ماتەريالداردى, سونداي-اق عيماراتتاردىڭ جوباسى مەن قالا قۇرىلىسىنىڭ جوسپارىن جاساعاندا مۇلدە باسقا تاسىلدەردى قولدانۋدى تاپسىردى.
«عيماراتتاردىڭ ساپاسىنا, ەكولوگيالىق تازالىعىنا جانە ەنەرگيالىق تيىمدىلىگىنە جوعارى تالاپ قويۋ قاجەت. سالىناتىن جانە سالىنعان ۇيلەر مەن ينفراقۇرىلىمدىق نىسانداردى ينتەللەكتۋالدى باسقارۋ جۇيەلەرىمەن جابدىقتاۋ كەرەك. بۇل تۇرعىندارعا قولايلى جاعداي جاساپ, ەلەكتر ەنەرگياسىن, جىلۋ مەن سۋدى تۇتىنۋدى قىسقارتىپ, تابيعي مونوپوليستەردى ءتيىمدى جۇمىسقا ىنتالاندىرادى», دەدى نۇرسۇلتان نازارباەۆ.
ول سونداي-اق, زاڭناماعا, سونىڭ ىشىندە تابيعي مونوپوليالار سالاسىن رەتتەيتىن زاڭدارعا ءتيىستى وزگەرىستەر ەنگىزۋ قاجەت ەكەنىن ايتتى.
«اكىمدەر تۇرعىن ءۇي-كوممۋنالدىق ينفراقۇرىلىمىن جەتىلدىرۋ ماسەلەسىن مەملەكەت-جەكەمەنشىك سەرىكتەستىگى نەگىزىندە بەلسەندى شەشۋى كەرەك. اۋىلدىق ەلدى مەكەندەردى ساپالى اۋىزسۋمەن قامتاماسىز ەتۋ ءۇشىن ۇكىمەت بۇل ىسكە بارلىق قاراجات كوزدەرىنەن جىل سايىن كەم دەگەندە 100 ميلليارد تەڭگە قاراستىرۋى قاجەت», دەلىنگەن ەلباسى جولداۋىندا.