مەملەكەت باسشىسى كولىك-لوگيستيكا ينفراقۇرىلىمىنىڭ تيىمدىلىگىن ارتتىرۋدى تاپسىردى.
«بۇگىندە قازاقستان ارقىلى بىرنەشە ترانسكونتينەنتالدى كوريدور وتەدى. بۇل تۋرالى كوپ ايتىلدى. جالپى, قازاقستان ارقىلى وتكەن جۇك ءترانزيتى 2017 جىلى 17 پروتسەنتكە ءوسىپ, 17 ميلليون تونناعا جۋىقتادى. ترانزيتتەن تۇسەتىن جىل سايىنعى تابىستى 2020 جىلى 5 ميلليارد دوللارعا جەتكىزۋ مىندەتى تۇر. بۇل ينفراقۇرىلىمعا جۇمسالعان مەملەكەت قاراجاتىن تەز ارادا قايتارۋعا مۇمكىندىك بەرەدى», دەدى ەلباسى.
ول جۇك قوزعالىسىن ونلاين رەجىمىندە باقىلاپ, ولاردىڭ كەدەرگىسىز تاسىمالدانۋى ءۇشىن جانە كەدەندىك وپەراتسيالاردى جەڭىلدەتۋ ماقساتىمەن بلوكچەين سياقتى تسيفرلىق تەحنولوگيالاردىڭ اۋقىمدى تۇردە ەنگىزىلۋىن قامتاماسىز ەتۋ قاجەت ەكەنىن اتاپ ءوتتى.
«زاماناۋي شەشىمدەر لوگيستيكانىڭ بارلىق بۋىنىنىڭ ءوزارا بايلانىسىن ۇيىمداستىرۋعا مۇمكىندىك بەرەدى. «ۇلكەن دەرەكتەردى» (Big data) پايدالانۋ ساپالى تالداۋدى قامتاماسىز ەتۋگە, ءوسىمنىڭ رەزەرۆىن انىقتاۋعا جانە ارتىق شىعىندى ازايتۋعا جاعداي تۋعىزادى. وسى ماقساتتار ءۇشىن ينتەللەكتۋالدى كولىك جۇيەسىن ەنگىزۋ قاجەت. بۇل جۇيە كولىك اعىنىن ءتيىمدى باسقارۋعا جانە ينفراقۇرىلىمدى ودان ءارى دامىتۋ قاجەتتىگىن انىقتاۋعا جول اشادى», دەلىنگەن جولداۋدا.
ەلباسى ىشكى وڭىرلىك قاتىناستاردى جاقسارتۋ ءۇشىن اۆتوجولداردىڭ جەرگىلىكتى جەلىسىن جوندەۋ مەن قايتا سالۋعا ارنالعان قارجى كولەمىن كوبەيتۋ كەرەكتىگىن تاپسىردى.
«وسىعان جىل سايىن بولىنەتىن بيۋدجەت قاراجاتىنىڭ جالپى كولەمىن ورتاشا مەرزىمدەگى كەزەڭدە 150 ميلليارد تەڭگەگە جەتكىزۋ قاجەت. بۇل جۇمىسقا وڭىرلەردەگى بارلىق اكىمدىكتەردىڭ بەلسەندى قاتىسۋىن قامتاماسىز ەتۋ كەرەك», دەپ اتاپ ءوتتى نۇرسۇلتان نازارباەۆ.