رۋحاني جاڭعىرۋ باعدارلاماسى اياسىندا باتىس قازاقستان وبلىسىنىڭ مادەنيەت سالاسىندا 2018 جىلى ءبىراز ءىس-شارا جوسپارلانعان. سونىڭ ءبىرى – قازاقستاننىڭ جالپىۇلتتىق كيەلى نىسانى قاتارىنا كىرگەن عۇمار قاراش زيراتى ورنىنا كەسەنە ورناتىلماق. بۇل جونىندە وڭىردەگى مادەنيەت, ارحيۆتەر جانە قۇجاتتاما باسقارماسىنىڭ باسشىسى قادىربولات مۇساعاليەۆ حابارلادى.
سالا باسشىسىنىڭ ايتۋىنشا, وتكەن جىل ىشىندە وڭىردە «تۋعان جەر – تۋعان ەل» باعدارلاماسى بويىنشا - 66 شارا, «قاسيەتتى قازاقستان» جوباسى بويىنشا – 25 شارا ۇيىمداستىرىلعان. ال «تۋعان جەر – تۋعان ەل» باعىتى بويىنشا 2017 جىلى جالپى كولەمى 57675,0 مىڭ تەڭگەنى قۇرايتىن 21 شارا وتكىزىلگەن. مۇنىڭ ىشىندە 16 جەلتوقسان كۇنى ورال قالاسىندا اشىلعان «رۋحاني جاڭعىرۋ» مۋزەيىن اتاپ ايتۋعا بولادى. بۇل جوبانىڭ قۇنى - 40 ملن. تەڭگەنى قۇراعان. ال سىرىم اۋدانىنداعى الاش مۋزەيى 22 ملن.914 مىڭ تەڭگەگە كۇردەلى جوندەۋدەن ءوتىپ, ەكسپوزيتسياسى جاڭارتىلدى.
قادىربولات مۇساعاليەۆ بولاشاقتا اۋىل كىتاپحانالارى مادەني, اعارتۋ جانە ويىن-ساۋىق ورتالىقتارىنا اينالاتىنىن, بۇل باعىتتاعى جاڭعىرتۋ جۇمىسى اۋدان اكىمدىكتەرىمەن بىرلەسە ءجۇرىپ جاتقانىن ايتتى.
سونداي-اق «ىشكى تۋريزم» باعىتى بويىنشا وبلىستا ۆيرتۋالدى تۋرلار جانە وبلىس ىشىندەگى باعىتتار بويىنشا جورىقتار ۇيىمداستىرىلماق, بۇل ماقساتقا - 12 ملن. تەڭگە قاراستىرىلعان.
ايتا كەتەيىك, باتىس قازاقستان وبلىسىندا قازاقستاننىڭ ماكروساكرالدى وبەكتىلەر تىزىمىنە 6 نىسان, اتاپ ايتساق – ورتاعاسىرلىق جايىق قالاشىعى, تاقساي وبالار كەشەنى, بوكەيورداسى تاريحي مۋزەي كەشەنى, الاش مۋزەيى, جۇماعازى حازرەت كەسەنەسى جانە عۇمار قاراش زيراتى كىرگەن بولاتىن. 1921 جىلى 21 ساۋىردە 45 جاسىندا قاسكويلەر قولىنان قازا تاپقان اعارتۋشى اقىنعا ارنالعان شاعىن قورشاۋ مەن بەلگى قازىرگى جانىبەك اۋدانى بورسى اۋىلىنان 10 شاقىرىم جەردەگى قاراش كولى مەكەنىندە ورنالاسقان.
قازبەك قۇتتىمۇرات ۇلى, «ەگەمەن قازاقستان»