سەنات دەپۋتاتتارى ەربولات مۇقاەۆ پەن ناريمان تورەعاليەۆ باتىس قازاقستان وبلىسىنداعى اۋدانداردا بولدى.
سەناتورلار ءبورلى اۋدانىندا جەرگىلىكتى تۇرعىندارمەن كەزدەسۋ بارىسىندا پارلامەنتتىڭ وتكەن جىلعى جۇمىسى, سونداي-اق قازىرگى كەزدە قارالىپ جاتقان زاڭ جوبالارى تۋرالى اڭگىمەلەپ بەردى. شاراعا قاتىسۋشىلار دەپۋتاتتار مەن اتقارۋشى ورگاندار وكىلدەرىنىڭ الدىنا اۋدانداعى گاز وڭدەۋ زاۋىتىنىڭ قۇرىلىسى مەن پودستەپنوە-ەلەك اۆتوموبيل جولىن جوندەۋ جۇمىستارىن قارجىلاندىرۋ ماسەلەلەرىن قويدى. اۋىل تۇرعىندارى بالالارعا زورلىق-زومبىلىق جاساۋدىڭ الدىن الۋعا قاتىستى شارالارىنا ارنالعان زاڭداردى قاتايتۋدى قولدادى.
سەناتورلار شىڭعىرلاۋ اۋدانىندا بىرقاتار قۇرىلىستار مەن الەۋمەتتىك نىسانداردا بولدى. شىڭعىرلاۋدىڭ باتىس جاعىنداعى, ەلىمىز تاۋەلسىزدىگىنىڭ 26 جىلدىعى قارساڭىندا پايدالانۋعا بەرىلگەن جاڭا شاعىن اۋداندا پارلامەنتشىلەر جەرگىلىكتى تۇرعىندارمەن كەزدەستى. جاڭا قونىسقا كەلگەندەر «نۇرلى جەر» باعدارلاماسىنىڭ جەمىستى ورىندالۋىنىڭ ارقاسىندا ولار تۇرعىن ءۇي الۋ مۇمكىندىگىنە يە بولعاندارىن اتاپ ءوتتى. دەپۋتاتتار «بولاشاق» بالالار باقشاسى مەن «پاتريوت» دۇكەنىندە دە بولدى. ساپار بارىسىندا سەناتورلار مەملەكەت باسشىسىنىڭ «بولاشاققا باعدار: رۋحاني جاڭعىرۋ» ماقالاسىنىڭ باسىمدىقتارىن ىسكە اسىرۋ اياسىندا اشىلعان اۋداندىق تاريحي-ولكەتانۋ مۇراجايىندا بولىپ, قۇندى جادىگەرلەرلەرمەن تانىستى.
سەنات دەپۋتاتتارى ە. مۇقاەۆ پەن ن. تورەعاليەۆ «نۇر وتان» پارتياسىنىڭ عيماراتىندا اۋىل اقساقالدارى, ءماسليحات دەپۋتاتتارى, مەكەمە باسشىلارى جانە جاستار قاتىسقان كەزدەسۋدە اۋداندى ودان ءارى دامىتۋدىڭ كەلەشەگىن تالقىلادى.