قاراعاندىدا نۇركەن ءابدىروۆ اتىنداعى سپورت سارايىندا ءۇش كۇن بويى شاپشاڭ شاحمات پەن بليتستەن ەلىمىزدىڭ ەرلەر مەن ايەلدەر اراسىنداعى كوماندالىق ءبىرىنشىلىگى ءوتتى.
جارىستىڭ سوڭعى كۇنى ويىنعا ءسال كەشىگىپ كەلسەم, ينستيتۋتتا وقىپ جۇرگەن كەزدەن ءبىر قۇرامادا ويناپ, «قاندى كويلەك» جولداس بولىپ كەتكەن ارىپتەسىم, ارداگەر شاحماتشى گەننادي پاك دوسىم باسىن شايقاپ: «كورىپ ءجۇرسىڭ عوي, قالاي وينايدى, ءا!», دەپ استانالىق جاس شاحماتشى قاليبەك نوگەربەك ويناعان تاقتانىڭ قاسىنان شىقپاي قويدى.
قاليبەكتىڭ ەسىمىنە مەن جاقسى قانىقپىن. وتكەن جازدا ەلوردادا وتكەن «اstana وpen-2017» حالىقارالىق شاحمات فەستيۆالىنە قاتىسقانىمىزدا, ونىڭ تالاي جاس ويىنشىلاردىڭ اراسىنان ەرەسەكتەرگە ءتان ويىن ورنەگىن كورسەتكەندىگىنىڭ كۋاسى بولعانبىز. «وسى بالادان ءتۇبى بىردەمە شىعادى!», دەگەن بولاتىنمىن سەرىكتەرىمە.
بۇل ەرلەر اراسىنداعى ءبىرىنشىلىكتىڭ 7-تۋرى بولاتىن. قاليبەك بەس رەت جەڭىپ, ءبىر رەت تەڭ تۇسكەن ەكەن. ءسويتىپ 5,5 ۇپايمەن جەكە دارا كوش باستاپ كەلەدى. الدىندا ءبىز «راپيد» (15 مينۋت جانە ءار ءجۇرىسكە 10 سەكۋند قوسىلادى) دەپ اتايتىن باسەكەدە جۇلدەدەن تىس قالعان. ەسەسىن بليتستە قايتارۋعا بەكىنگەنى كورىنىپ تۇر. بليتستە (5 مينۋت جانە ءار جۇرىستەن كەيىن 10 سەكۋند قوسىلادى) جاعداي باسقاشا. مۇندا شاپشاڭدىقپەن قاتار العىرلىق كەرەك, ياعني تاقتادا قالىپتاسقان جاعدايدى تەز باعالاي ءبىلىپ, بەس-التى ءجۇرىستى الدىن الا ويلاستىرىپ قويعان ءجون.
وسى تۋردا ول تۋرنيردە بار قىرىنان جارقىراي كورىنگەن تاعى ءبىر جاس تالانت – پاۆلودارلىق دەنيس ماحنەۆپەن كەزدەستى. اقپەن وينادى. بىراق ءبىرىنشى ءجۇرىستىڭ ارتىقشىلىعىن پايدالانام دەپ ورەكپىگەن جوق. دەنيس وڭاي شاعىلاتىن جاڭعاق ەمەس: راپيدتە 1-ورىن, كوماندالىق سايىستا ءوز تاقتاسىندا 2-ورىن العان. بىرتە-بىرتە فيگۋرالار ايىرباستالىپ, ەكەۋى ءار ءتۇستى ءبىر-ءبىر ءپىلمەن قالعان. بۇل تەڭ ويىننىڭ بەلگىسى. كەلەسى ويىندا جەرلەسى, قاراعاندىلىق ستۋدەنت ەركىن قوزعانباەۆپەن تابان تىرەستى. ونىڭ وزىنەن تاجىريبەسى مول. سوعان قاراماستان, قارامەن ويناي وتىرىپ, تسەيتنوت (ۋاقىت تاپشىلىعى) تاقالعان ساتتە جارق ەتىپ شابۋىلعا شىقتى دا قارسىلاسىنان ايلاسىن اسىرىپ كەتتى.
ەندى اقىرعى تۋردا تەڭ تۇسسە دە بولادى. بىراق كوميۋتەرلىك جەرەبە قوستانايلىق شاحماتشى, بىرنەشە دۇركىن رەسپۋبليكا چەمپيونى, گروسسمەيستەر پەتر كوستەنكوعا تاعى دا اق ءتۇستى بۇيىرتىپتى. فيگۋرالار ازايعان تۇستا ءبىر-ءبىر لاديادان قالدى, بىراق تاجىريبەلى قارسىلاسى ەكى پەشكا ۇتىپ شىقتى. قاليبەك جاستار ونشا ءمان بەرە بەرمەيتىن لاديالىق ەندشپيلدى ءتاپ-ءتاۋىر مەڭگەرگەن ەكەن. كورولىن العا شىعارىپ, مات قاتەرىن ءتوندىردى دە ءبىر پەشكانى قايتاردى, ءبىرازدان كەيىن ەكىنشىسى دە قولعا ءتۇستى.
ءسويتىپ تارازى باسىن تەڭەستىرىپ كەتتى. جەڭىسكە پارا-پار تەڭ ويىن. ەندى ونى ەشكىم قۋىپ جەتە المايتىن ەدى. دەنيس بولسا بۇل جولى ءۇشىنشى ورىن الىپ, مەدالداردان تولىق جيىنتىق جاسادى. ەكىنشى ورىنعا تاعى ءبىر پاۆلودارلىق جاندوس اعمانوۆ كوتەرىلدى. شاپشاڭ شاحماتتان جۇلدەگە يە بولعاندار اقتوبەلىكتەر ارىستانبەك ورازاەۆ پەن يليا مويسەەنكو.
ايەلدەر اراسىندا دا جاستاردىڭ مەرەيى ۇستەم بولدى. شاپشاڭ شاحماتتان كوكشەتاۋلىق ديليارا يشمۋحامبەتوۆا, بليتستەن اقتوبەلىك گۋليا دەمەۋوۆا جەڭىسكە جەتتى. جۇلدەگە يە بولعاندار, تيىسىنشە شاپشاڭ شاحماتتان كسەنيا بالاباەۆا (الماتى) مەن ەلەنا انكۋدينوۆا (پاۆلودار) جانە بليتستەن اسەل لەسبەكوۆا (استانا) مەن تاتيانا ۆەركو (قوستاناي). ال كوماندالىق جارىستا اقتوبەلىكتەر وزىپ شىقتى, كەلەسى جۇلدەلى ورىندار پاۆلودارلىقتار مەن استانالىقتاردىڭ ۇلەسىنە ءتيدى.
بۇل جولى, وسى جارىستى العاش ۇيىمداستىرۋشى قاراعاندىلىقتار بارلىق ساناتتاردا ءجۇلدەلەردەن قۇر الاقان قالدى. ەلىمىزدىڭ كورنەكتى مەملەكەت قايراتكەرى, اقىن ساكەن سەيفۋلليندى ەسكە الۋعا ارنالعان تۋرنير قاراعاندىدا 2005 جىلى باستالعان ەدى, ەكى جىلدان كەيىن كوماندالىق ءمارتەبە الدى, ال ەندى ەكى جىلدان كەيىن رەسمي تۇردە شاپشاڭ شاحماتتان ەلىمىزدىڭ چەمپوناتى اتاندى. جۇلدەگەرلەرگە اقشالاي سىيلىقتار, كۋبوكتار مەن گراموتالار تابىس ەتىلدى.
كوڭىلگە كىربەڭ تۇسىرەتىن ساتتەر دە بولدى. جوعارىدا اتاعانىمىزداي, بۇل تۋرنير قازاقتىڭ ءبىرتۋار ازاماتى س.سەيفۋلليننىڭ مەموريالى بولۋعا ءتيىس ەدى. بىراق قازاقسان شاحمات فەدەراتسياسى وتكىزگەن جارىستىڭ رەسمي افيشاسىنان جازۋشى اتىن كورە المادىق, ونىڭ ەسىمى ءتۋرنيردىڭ اشىلۋ جانە جابىلۋ راسىمدەرىندە اتالمادى دا.
تاعى ءبىر اتاپ وتەرلىك جايت, تۋرنير جانكۇيەرسىز, جىم-جىرت كۇيدە ءوتتى. ءۇش-ءتورت تەلەجۋرناليست, شاحمات جاناشىرى گەنا دوسىمنان, تاعى ءبىر-ەكى اتا-انادان باسقا ەشكىمدى كورە المادىق. جارناما بولعان جوق. مۇمكىن وسى كەزدە قالادا ارداگەرلەر اراسىندا وتكەن جارىس تا اسەر ەتكەن شىعار. الداعى ۋاقىتتا سپورت تۇرلەرىن دامىتامىز دەپ جۇرگەن قالا, وبلىس اتقامىنەرلەرى تۋرنير كەستەلەرىن ۇيلەستىرىپ, جارىستى كورنەكتى تۇردە وتكىزسىن دەگەن تىلەك بىلدىرەمىز. شاحمات – فۋتبول ەمەس. بىراق ونىڭ دا ءوز جانكۇيەرلەرى, اۋەسقويلارى بار.
شاحمات – ميلليونداردىڭ, بۇقارانىڭ ويىنى. قاراعاندىدان مۇنى بايقاي المادىق.
امان جانعوجين,
ارداگەر جۋرناليست, شاحماتتان سپورت شەبەرلىگىنە كانديدات
قاراعاندى