سىرتقى ىستەر مينيسترلىگى ءباسپاسوز قىزمەتىنىڭ جەتەكشىسى ءانۋار جايناقوۆ رف ۆلاديمير وبلىسىندا كولىك اپاتىنا ۇشىراعان قازاقستان ازاماتتارىنا قاتىستى جاعدايدى ءتۇسىندىرىپ بەردى.
«اۆتوبۋستا بارلىعى 3 قازاقستاندىقتىڭ بولعانى انىقتالدى. ولاردىڭ بىرەۋى قازا بولدى. امان قالعانداردىڭ اراسىندا ەكىنشىسى جۇرگىزۋشى, ال ءۇشىنشى ازامات جولاۋشىلاردان جولاقى جيناۋمەن اينالىسقان. قازىرگى كەزدە ول باسقا باپ بويىنشا ۇستالدى. بۇگىن زاڭسىز كوشى-قون ىسىندە ونىڭ ناقتى مارتەبەسى بەلگىلى بولادى»,-دەيدى جايناقوۆ.
ونىڭ سوزىنە قاراعاندا, قازاقستاندىق ديپلوماتتار ۆلاديمير وبلىسىنداعى جول-كولىك وقيعاسى اياسىندا ءىستى تەرگەۋشىلەرمەن تۇراقتى بايلانىستا.
«قازىرگى ۋاقىتتا ماسكەۋدىڭ كولىكتەگى تەرگەۋ كوميتەتى سول اپاتتا امان قالعان جۇرگىزۋشىنى قاۋىپسىزدىك ەرەجەسىن بۇزۋ تۇرعىسىندا 238 باپ بويىنشا ۇستاعاندىعى ءمالىم بولدى. رەسەيدەگى قازاقستان ەلشىلىگى اتالعان كوميتەتتەن رەسمي اقپارات الۋ ءۇشىن ءتيسىتى ساۋالدى جولدادى», دەدى ول.
«ال جكو-دا امان قالعان قازاقستاننىڭ ەكىنشى ازاماتىنا توقتالاتىن بولساق, ول ۋاقىتشا ۇستالىپ, زاڭسىز كوشى-قون ءىسى بويىنشا كۋاگەر رەتىندە قارالىپ وتىر. بۇگىن ونىڭ ىستەگى مارتەبەسى جايىندا ناقتى ايقىندالادى دەپ كۇتىلۋدە»,-دەپ ءتۇسىندىردى جايناقوۆ.
ايتا كەتەيىك, رەسەي فەدەراتسياسىنىڭ ۆلاديمير وبلىسىندا قازاقستاننان شىققان اۆتوبۋس جول اپاتىنا ۇشىراعانى تۋرالى بۇعان دەيىن حابارلاعان ەدىك. ۆلاديمير وبلىستىق تجم-ءنىڭ مالىمەتتەرىنە سۇيەنسەك, اپاتقا ۇشىراعان اۆتوبۋستا 55 وزبەكستان ازاماتى جانە 2 جۇرگىزۋشىسى قازاقستاندىق بولعان. جۇرگىزۋشىلەردىڭ بىرەۋى اپاتتان مەرت بولدى.