ەلىمىزدە ءوتىپ جاتقان الەمدىك كورمە تالاي ونەر يەلەرىنىڭ شىعارماشىلىعىن شىڭداپ, ونەرىن ورىستەتۋگە زور ىقپالىن تيگىزۋدە. كورمە اياسىندا وتەتىن فەستيۆال بۇل ءسوزىمىزدىڭ انىق دالەلى بولا الادى. سەبەبى, جاس رەجيسسەرلەر – قازاق تەاترىنىڭ ەرتەڭى. ۇلتتىق ساحنا ونەرىنىڭ كەڭگە قانات جايىپ, تەرەڭگە تامىر جىبەرۋى دە جاس تالانتتاردىڭ ىزدەنىسى مەن ۇمتىلىسىنان باستاۋ الاتىنى شىندىق. اتالمىش ونەر مەرەكەسىندە جاس رەجيسسەرلەردىڭ ارنايى شەبەرلىك ساعاتتارىنان ءوتىپ, رۋحاني ءنار الىپ, دۇنيەتانىمدارىنىڭ وزگەرىپ, ونەردە وزگەشە جول, باعىت باعدار الۋىنا مول مۇمكىندىك جاسالعان.
– فورۋم-فەستيۆال جاس تەاتر رەجيسسەرلەرىنىڭ شىعارماشىلىعىنا جول اشىپ, قازاق رەجيسسۋراسىن جاڭا ەسىمدەرمەن تولىقتىرۋدى, سونىمەن قاتار جاس جانە تانىمال تەاتر رەجيسسەرلەرىنە پىكىرتالاستار, لەكتسيالار, شەبەرلىك-سىنىپتارى, سەمينارلار باعدارلامالارى ارقىلى ءبىلىم جانە كوممۋنيكاتسيا الاڭىن جاساپ, وتاندىق رەجيسسۋرا ونەرىنىڭ ءورىسىن كەڭەيتۋگە مۇمكىندىك تۋعىزادى. سونداي-اق, قازاقتىڭ جاڭاشىل تەاتر رەجيسسەرى قايرات سۇگىربەكوۆتىڭ ەسىمىن ەستە قالدىرۋ ماقساتىندا ۇيىمداستىرىلىپ وتىر. شارانىڭ باستى ماقساتى تالانتتى رەجيسسەرلەر شىعارماشىلىعىنا قوعام مەن قالىڭ كوپشىلىكتىڭ نازارىن اۋدارۋ – دەيدى شارانى ۇيىمداستىرۋشىلار.
فورۋم-فەستيۆالگە ەلىمىزدەگى 20 مەن 40 جاس ارالىعىنداعى جاس رەجيسسەرلەر قاتىسادى. ولاردىڭ ساپىندا ەلىك نۇرسۇلتان, دينا قۇنانبايقىزى, داۋرەن سەرگازين, رۇستەم جانىامانوۆ, بولات ابدراحمانوۆ, فارحاد مولداعاليەۆ, جۇلدىزبەك جۇمانباي, گۇلناز قامىسباەۆا, مەيرام حابيبۋللين, ايدىن سالبانوۆ سىندى ەسىمى كوپكە تانىلىپ قالعان جاس رەجيسسەرلەر دە بار. ەلوردا تۇرعىندارى مەن قوناقتارى التى كۇن بويى ەلىمىزدىڭ ءار وڭىرىنەن كەلگەن تانىمال تەاترلاردىڭ كورەرمەن ىقىلاسىنا بولەنگەن تاڭداۋلى قويىلىمدارىن قىركۇيەكتىڭ 2-8 ارالىعىندا تاماشالاي الادى. م. اۋەزوۆ اتىنداعى قازاق مەملەكەتتىك اكادەميالىق دراما تەاترى, ع. مۇسىرەپوۆ اتىنداعى بالالار مەن جاسوسپىرىمدەر تەاترى, رەسپۋبليكالىق اكادەميالىق نەمىس دراما تەاترى, استانا جاستار تەاترى, اقتوبە وبلىستىق الاقاي تەاترى, س. مۇقانوۆ اتىنداعى سولتۇستىك قازاقستان وبلىستىق جاستار تەاترى, ا. ي تەاترى, ج. شانين اتىنداعى وبلىستىق اكادەميالىق قازاق دراما تەاترى, الماتى قالاسى مەملەكەتتىك قۋىرشاق تەاترى, اتىراۋ وبلىستىق ماحامبەت وتەمىس ۇلى اتىنداعى قازاق دراما تەاترى فەستيۆالىدىڭ كوركىن قىزدىرىپ ءوز ونەرلەرىن ۇسىناتىن بولادى.
قيالعا قانات ءبىتىرىپ, ارمان مەن سەزىم تۇڭعيىعىنا جەتەلەيتىن تىڭ تۋىندىلار كوبەيىپ جاتسا نۇر ۇستىنە نۇر. اتالعان فورۋم-فەستيۆال – بولاشاق رەجيسسۋرا ساڭلاقتارىنىڭ قالىپتاسۋىنا سەبەپكەر بولادى دەگەن سەنىمدەمىز.
ارمان وكتيابر,
«ەگەمەن قازاقستان»
الماتى