كەزدەسۋ بارىسىندا قۇقىق قورعاۋ قىزمەتىنىڭ ماسەلەلەرى مەن «پروباتسيا تۋرالى» زاڭدى تاجىريبەلىك تۇرعىدا جۇزەگە اسىرۋ ماسەلەلەرى قاراستىرىلدى. سونىمەن قاتار, پارلامەنت دەپۋتاتىن دەپارتامەنت جانە ونىڭ بولىمشەلەرىنىڭ قىزمەتىندەگى پروبلەمالىق جايتتار, الەۋمەتتىك جۇمىس باعىتتارى, سوتتالعان ازاماتتارعا پسيحولوگيالىق كومەكتى ۇيىمداستىرۋ, اتالمىش باعىتتار بويىنشا دەپارتامەنتتىڭ ۇكىمەتتىك ەمەس ۇيىمدارمەن قارىم-قاتىناس دەڭگەيى قىزىقتىردى.
جيىندا ايتىلعانداي, بۇرىن ءىستى بولعان جانداردى سوت شەشىمى شىققان ساتتەن باستاپ تۇزەتۋ مەكەمەلەرىنەن بوساعانعا دەيىن قايتا الەۋمەتتەندىرۋ بويىنشا كوپ جاقتى جۇمىستار جۇرگىزىلەدى, ونىڭ قاتارىندا تۇرعىن ءۇي جايىن انىقتاۋ, قۇجاتتارىن دايىنداۋ مەن قايتا قالپىنا كەلتىرۋگە كومەكتەسۋ, جۇمىسقا ورنالاسۋعا جاردەمدەسۋ بار. الايدا, بۇرىن سوتتالعان ازاماتتاردى تىركەۋ ماسەلەسى بىرجاقتى شەشىلمەگەن. زاڭ بويىنشا, جاڭا مەكەنجايعا كەلگەن ادام 10 كۇننىڭ ىشىندە جەرگىلىكتى جەرى بويىنشا تىركەۋگە الىنۋى قاجەت. بىراق, بۇل مەرزىم ىشىندە تۇزەتۋ مەكەمەسىنەن پوشتا ارقىلى كەلەتىن قۇجاتتار دايىن بولىپ ۇلگەرمەيدى. ناتيجەسىندە, بوستاندىققا ەندى شىققان ادامعا سەبەپسىز ايىپپۇل سالىنۋى مۇمكىن.
وسىعان بايلانىستى, بەيىمدەۋ ورتالىعىن سوتتالعان ازاماتتاردى قايتا الەۋمەتتەندىرۋ ورتالىعى رەتىندە قايتا باعدارلاۋ تۋرالى ۇسىنىس جاسالدى. گۇلنار بيجانوۆا بۇل ماسەلەگە حالىقتى الەۋمەتتىك قورعاۋ باسقارماسىن, قارجى باسقارماسىن جانە اكىمدىكتەردى تارتۋ قاجەتتىگىن العا قويدى. قاديشا وسپانوۆا دا اتالعان ماسەلەنى قۇرامىنا وبلىستىق ءماسليحات دەپۋتاتتارى, ۇكىمەتتىك ەمەس ۇيىم وكىلدەرى كىرەتىن پارتيالىق كوميسسيادا قاراۋدى ۇسىندى.
سونداي-اق, كەزدەسۋدە ءماجىلىس دەپۋتاتى قاراعاندىنىڭ ەلىمىزدەگى №1 حقكو نەگىزىندە داعدارىس ورتالىعى اشىلعان العاشقى قالا ەكەندىگىن ءبىلدى. بۇل ورتالىقتىڭ جۇمىسى ء«بىر تەرەزە» قاعيداسى بويىنشا ۇيىمداستىرىلعان. مۇندا پروباتسيا قىزمەتىنىڭ, جۇمىسپەن قامتۋ جانە الەۋمەتتىك بەيىمدەۋ ورتالىعىنىڭ قىزمەتكەرلەرى جۇمىس جاسايدى. پروبلەمالىق ماسەلەلەردىڭ ءبىرى رەتىندە, دەپارتامەنت جانە پروباتسيا قىزمەتى جۇمىسكەرلەرىنىڭ تاپشىلىعى ايتىلدى.
كوتەرىلگەن بارلىق ماسەلەلەر دەپۋتاتتىڭ باقىلاۋىنا الىناتىن بولدى. «قانداي دا ءبىر زاڭنامالىق باستامانى جۇزەگە اسىرۋ وڭاي ەمەس. ول ءۇشىن, زاڭدى بارلىق جاعىنان نەگىزدەپ, ونىڭ قاجەتتىلىگىن دالەلدەۋ كەرەك. سوندىقتان, مەملەكەتتىك ورگانداردىڭ, دەپۋتاتتاردىڭ, ۇكىمەتتىك ەمەس ۇيىمداردىڭ بىرلەسە جۇمىس اتقارۋى ماڭىزدى», دەدى حالىق قالاۋلىسى.
ميراس اسان,
«ەگەمەن قازاقستان» قاراعاندى وبلىسى