ەلىمىزدەگى 2016-2020 جىلدارعا ارنالعان ءبىلىم بەرۋدى دامىتۋ كەستەسىنە سايكەس, وقۋ جىلى قارساڭىندا ورتا سىنىپتارعا ارنالعان جاڭا وقۋ جۇيەسى ەنگىزىلەدى. اتالعان وزگەرىستەر ەلىمىزدىڭ بارلىق مەكتەپتەرىندە 1, 2, 5, 7 سىنىپتار اراسىندا جۇرگىزىلەدى. وسىعان وراي پەداگوگتەر باسقوسۋىندا 2, 5, 7 سىنىپتارداعى جاڭارتىلعان وقۋ جۇيەسىنىڭ ەرەكشەلىگى تالقىلاندى.
استانا قالاسىنداعى نازارباەۆ زياتكەرلىك مەكتەبىنىڭ ديرەكتورى ارسەن بايتۋكوۆتىڭ ايتۋىنشا, بۇگىندە مەكتەپتەردەگى ءادىل باعالاۋدىڭ وزەكتىلىگى مەن قاجەتتىلىگىن بۇكىل پەداگوگيكالىق قوعام سەزىنىپ وتىر.
– سىني باعالاۋ جۇيەسىندە وقىتۋ مەن باعالاۋدىڭ اراسىنداعى ءوزارا بايلانىستى جۇزەگە اسىراتىن مەحانيزمدەر بار. بۇل باعالاۋ وقۋ باعدارلامالارىنا سايكەستىكتى قامتاماسىز ەتەتىن جانە وقۋ ۇدەرىسىن قولداۋعا قۇرىلعان. ايتالىق, قالىپتاستىرۋشى باعالاۋ – كۇندەلىكتى جۇمىس بارىسىنداعى باعالاۋ. باعا وقۋشىلارعا ساندىق بەلگى رەتىندە ەمەس, وقۋشىلاردىڭ جۇمىسىنا ۇسىنىس رەتىندە بەرىلەدى. ياعني, قايسىسى جاقسى اتقارىلدى, قاي جەردە قاتە جىبەرىلدى, ونى قالاي تۇزەتۋ كەرەكتىگى ايتىلادى. مۇعالىمنىڭ ۇسىنىستارى وقۋ ساپاسىن جاقسارتۋعا مۇمكىندىك بەرەدى. وقۋشىنىڭ وقۋعا جانە باعالاۋعا دەگەن كوزقاراسىن جاقسارتادى. ال جيىندىق باعالاۋ – وقۋ باعدارلاماسىنا سايكەس وقۋدان كەيىن, سونىمەن قاتار, بەلگىلى ءبىر وقۋ كەزەڭى اياقتالعاندا جۇرگىزىلەدى. باعا وقۋشىلاردىڭ جەتىستىكتەرىن, ياعني تاپسىرمالاردى ورىنداۋداعى ءاربىر قادامدارىن بەكىتۋ ارقىلى قالىپتاسادى. سوندىقتان وقۋشىلاردىڭ ءوز بەتىمەن وقۋدان تىس ىزدەنىسىن جانە وقۋ باعدارلاماسىن تەرەڭىرەك يگەرۋگە ىنتالاندىرادى, – دەيدى ا.بايتۋكوۆ.
مۇعالىمدەر سونىمەن قاتار, اتا-انا مەن ۇستاز اراسىنداعى بايلانىستى جىلدامداتۋعا ارنالعان جاڭارتىلعان وقۋ جۇيەسىن كەڭىنەن تالقىلادى. استانا قالاسىنداعى №35 مەكتەپتىڭ قازاق ءتىلى مەن ادەبيەتى ءپانىنىڭ مۇعالىمى بايان مىقشاەۆا جاڭا وقۋ جۇيەسىنىڭ بالالارعا ەڭ الدىمەن ەركىندىك بەرەتىنىن ايتادى.
– جاڭارتىلعان ءبىلىم بەرۋ جۇيەسىنە قاتىستى نازارباەۆ زياتكەرلىك مەكتەپتەرىنىڭ مۇعالىمدەرى وتكىزگەن شەبەرلىك ساعاتى كوڭىلىمنەن شىقتى. بۇل جۇيەدە تاجىريبەلى ۇستازدار بولعاندىقتان كوپتەگەن جاڭا ماعلۇماتتار الدىق دەپ ەسەپتەيمىن. مۇنداي جۇيەمەن وقىعان بالا كەڭ تۇردە ويلايدى. ەكى-ءۇش جىلدىڭ ىشىندە بۇل جۇيە تولىعىمەن ەنىپ, ءوز جەمىسىن بەرە باستايتىنىنا سەنىمىم مول, − دەيدى ول.
الداعى رەسپۋبليكالىق تامىز كونفەرەنتسياسى وتىرىسىندا زياتكەرلىك مەكتەپتەردىڭ اۋقىمدى كورمەسى وتپەك. كورمەدە مۇعالىمدەردى ادىستەمەلىك قولداۋعا ارنالعان مەتوديكالىق بازا مەن وقۋ ماتەريالدارى ۇسىنىلىپ, «جۇيەلى-مەتوديكالىق كەشەندى» كورسەتۋ جوسپارلانىپ وتىر. جيىرما مىڭنان استام مۇعالىم قاتىساتىن رەسپۋبليكالىق پەداگوگيكالىق كەڭەس اياسىندا نازارباەۆ زياتكەرلىك جانە قاناتقاقتى مەكتەپتەردىڭ بازالارىندا ءبىلىم مازمۇنىن جاڭارتۋ بويىنشا سەكتسيالىق وتىرىستار وتەدى. نازارباەۆ زياتكەرلىك مەكتەپتەرى ورتالىقتارىنىڭ مۇعالىمدەرى مەن قىزمەتكەرلەرى, سونداي-اق, قاناتقاقتى مەكتەپ مۇعالىمدەرى جاڭارتىلعان ءبىلىم بەرۋدىڭ, سىني باعالاۋدىڭ جانە باستاۋىش مەكتەپتەردە وقىتۋدىڭ ەرەكشەلىكتەرى جونىندە ترەنينگتەر مەن شەبەرلىك-سىنىپتار وتكىزۋدە. ال تاجىريبەلىك ساعاتتار قازىرگى ساباقتاردىڭ جاڭا فورماتى مەن يننوۆاتسيالىق پەداگوگيكالىق تەحنولوگيالاردى ەنگىزۋگە ارنالادى. نەگىزگى نازار ءبىلىم بەرۋ پروتسەسىن ساپالى ادىستەمەلىك تۇرعىدان دەمەۋگە جانە وتباسى قاۋىمداستىعى مەن مۇعالىمدەر اراسىنداعى جەدەل قارىم-قاتىناستى قالىپتاستىرۋعا باعىتتالىپ وتىر.
دۋمان اناش,
«ەگەمەن قازاقستان»