تەننيس
قازاقستاندىق تەننيسشى الەكساندر بۋبليك اقش-تا وتكەن جەكەلەي سىنداعى حالىقارالىق ATP Challenger ءتۋرنيرىنىڭ جەڭىمپازى اتاندى. ول فينالدىق سايىستا بريتانيالىق تەننيسشى ليام ءبروۋديدى ەكى سەتتە 6:2, 6:3 ەسەبىمەن جەڭدى.
ءتۋرنيردىڭ جۇلدە قورى 100 مىڭ اقش دوللارىن قۇرايدى. ەسكە سالا كەتسەك, بۇل الەكساندر بۋبليكتىڭ ATP Challenger سەرياسىنا ەنەتىن تۋرنيردەگى ەكىنشى جەڭىسى. العاش رەت ول وسى جىلدىڭ اقپان ايىندا مەكسيكادا وتكەن باسەكەدە جەڭىمپاز اتانعان ەدى.
ۆولەيبول
ۆولەيبولدان قىزدار اراسىندا ءوتىپ جاتقان ازيا چەمپيوناتىندا قازاقستان قۇراماسىنىڭ سپورتشىلارى ۆەتنام قىزدارىنان بەس پارتياعا سوزىلعان ويىندا جەڭىلىپ قالدى. العاشقى ەكى پارتيادا وتانداستارىمىز قارسىلاستارىنان باسىم ءتۇسىپ جاتقان بولاتىن. الايدا سوڭعى ءۇش پارتيادا ۆەتنامدىق ارىپتەستەرىنە ۇپاي بەرىپ قويدى. قورىتىندى ەسەپ, 3:2 (25:22, 25:18, 21:25, 20:25, 15:5). ەندى وتانداستارىمىز ازيا چەمپيوناتىنىڭ سوڭعى كۇنىندە بىرىنشىلىكتىڭ جەتىنشى ورىنى ءۇشىن جارىس قوجايىندارى فيليپپين ەلىنىڭ سپورتشىلارىمەن كىم مىقتىنى انىقتايدى.
ۆەلوسپورت
الماتىدا سپورت كۇنىنە وراي اۋەسقوي ۆەلوسپورتشىلار اراسىندا «Tour of World Class Almaty» ۆەلوجارىسى وتەدى. سپورتتىق شارا 20 تامىز, ياعني جەكسەنبى كۇنگە جوسپارلانعان. بيىلعى تۋرنيرگە بىلتىرعىعا قاراعاندا ازداپ وزگەرىس ەنگىزىلگەن. بۇگىندە ايتۋلى شاراعا 750 ادام تىركەۋدەن ءوتىپ, جارىسقا قاتىسۋعا نيەتتەنىپ وتىر. سونىمەن قاتار, الماتىداعى بەلگىلى ۆەلوكوماندالار: Almaty Bro Team, World Class Almaty, Alatau Racing Team, Apple City Team, Isker Company, Good Energy توپتارى دا باق سىنايدى. قاتىسۋشىلار 14, 34 جانە 57 شاقىرىمدىق قاشىقتىقتى باعىندىرادى.
ۋنيۆەرسيادا-2017
الماتىدا ستۋدەنتتەر اراسىندا وتكەن قىسقى ۋنيۆەرسيادا حالىقارالىق جارىستاردىڭ تاريحىنداعى ەڭ ۇزدىگى دەپ تانىلدى. بۇل تۋرالى حالىقارالىق ستۋدەنتتىك سپورت قاۋىمداستىعىنىڭ (FISU) اتقارۋشى كوميتەتىنىڭ ساراپشىلار كەڭەسىنىڭ قورىتىندى ەسەبىندە ايتىلدى. وتىرىس كەزىندە كەڭەستىڭ جەتەكشىسى ميلان اۆگۋستين ءسوز سويلەپ, 2017 جىلعى ۋنيۆەرسيادانىڭ جەتىستىكتەرىن ايتتى. ايتا كەتەيىك, XXIX جازعى ۋنيۆەرسيادا 19 تامىزدا تايبەيدە باستالادى. بۇل جارىستا قازاقستاندىق سپورتشىلار جەڭىل اتلەتيكا, ءجۇزۋ, بوكس, كۇرەس جانە باسقا دا سپورت تۇرلەرى بويىنشا سىنعا تۇسەدى.
ازىرلەگەن
ءالي بيتورە,
«ەگەمەن قازاقستان»