گلازگوداعى جاڭبىر مەن قاتتى جەلدىڭ ەكپىنىمەن باستالعان ويىندا ەكى كلۋب وتە ساقتىقپەن وينادى. بىراق, «استانا» نوسەرگە قاراماي, ماتچتىڭ العاشقى 30 مينۋت بويى قارسىلاس قاقپاسىنا قاۋىپ توندىرگەنىمەن, گول سوعا المادى. ويىننىڭ نەگىزگى وقيعاسى ءبىرىنشى تايمنىڭ 32-مينۋتىنان باستالدى. فۋتبولداعى «سەن سوقپاساڭ, ساعان سوعادى» دەگەن ءتامسىلدى ۇستانعان «سەلتيكتىڭ» اۆستراليالىق شابۋلىشىسى توم روگيچ موكيننىڭ ۇستىنەن اسىرا تەپكەن دوپتى قايتارماق بولعان ەۆگەني پوستنيكوۆ ءوز قاقپامىزعا گول سوعىپ الدى.
ارادا ەكى مينۋت وتكەن سوڭ پوستنيكوۆتا ءوز قاتەلىگىن جويۋ ءۇشىن تاماشا مۇمكىندىك تۋىنداعان ەدى. بىراق ەۆگەني تەپكەن دوپ قارسىلاس قاقپا باعانىنان ءسال قيىس كەتتى. ءبىرىنشى تايم اياقتالار تۇستا ەلوردالىق كلۋبقا وسى ماۋسىمدا قوسىلعان ۆەنگريالىق فۋتبولشى لاسلو كلياينحايسلەردىڭ جىبەرگەن قاتەلىگى «استاناعا» قىمباتقا ءتۇستى. لاسلونىڭ قاتەلىگىن ۇتىمدى پايدالانعان سكوتت سينكلەر ماتچتىڭ 42-مينۋتىندا ەسەپتى 2:0-گە جەتكىزدى.
ويىننىڭ ەكىنشى بولىگى دە «استانا» ءۇشىن ءساتتى باستالا قويمادى. 60-مينۋتتا سكوتت سينكلەر قاقپامىزعا ەكىنشى گولىن سوعىپ, دۋبل اۆتورى اتاندى. گولدان كەيىن وتانداستارىمىزدىڭ ۇنجىرعاسى ءتۇسىپ, شابۋىلدى مۇلدەم ۇمىتا باستادى. ءالسىن-ءالسىن شابۋىلداعانىمەن, ويىن تىزگىنىن تولىق الاڭ يەلەرىنە بەرىپ قويدى. ناتيجەسىندە, «سەلتيك» فۋتبولشىسى دجەيمس فوررەست 79-مينۋتتا ەسەپتى 4:0-گە جەتكىزدى. ال ارادان توعىز مينۋت وتكەندە يگور شيتوۆ ءوز قاقپامىزعا ماتچتاعى سوڭعى بەسىنشى گولىن سوقتى. ءبىر قىزىعى, ويىندى «استانا» فۋتبولشىلارى اۆتوگولمەن اشىپ, اۆتوگولمەن جاۋىپ يۋەردى. ءسويتىپ, ەل چەمپيوندارىمىز شوتالنديادان 5:0 ەسەبىمەن ويسىراي جەڭىلىپ قايتتى.
ويىننان كەيىن «استانا» كلۋبىنىڭ باس باپكەرى ستانيمير ستويلوۆ جۋرناليستەرگە بەرگەن سۇحباتىندا شاكىرتتەرى بىرقاتار جەكەلەي قاتەلىك جىبەرگەنىن, «سەلتيك» فۋتبولشىلارى وزدەرىنە بەرىلگەن مۇمكىندىكتى ءساتتى پايدالانا بىلگەنىن اتاپ ءوتتى. «سەلتيك» كومانداسىن بۇگىنگى جەڭىسىمەن قۇتتىقتايمىن. بۇگىن فۋتبولشىلارىما نە بولعانىن تۇسىنبەي دالمىن. وتە كوپ ورەسكەل قاتەلىك جىبەردى. دەگەنمەن, ءوز ەلىمىزدە وتەتىن جاۋاپ ويىنىندا سالماقتى ويناپ, جەڭىلمەۋگە تىرىسامىز. ەگەر, جەڭىسكە جەتىپ جاتساق ءتىپتى جاقسى. فۋتبولشىلارىمىز «استانا ارەنادا» جاقسى وينايدى. سونداي-اق, جانكۇيەرلەردىڭ قولداۋى بىزگە قوسىمشا كۇش بەرەتىنىن ايتقىم كەلەدى» - دەيدى س.ستويلوۆ.
ايتا كەتەيىك, «استانا»-«سەلتيك» اراسىنداعى پلەي-وفف كەزەڭىنىڭ جاۋاپ كەزدەسۋى 22 تامىزدا «استانا ارەنادا» وتەدى. ەكى ويىننىڭ قورىتىندىسى بويىنشا جەڭىسكە جەتكەن كوماندا چەمپيوندار ليگاسىنىڭ, ال جەڭىلىسكە ۇشىراعان كلۋب ەۋروپا ليگاسىندا توپتىق كەزەڭىندە وينايتىن بولادى.
سەلتيك» (شوتلانديا) – «استانا» (قازاقستان) – 5:0 (2:0)
گول: پوستنيكوۆ, 32-اۆتوگول. سينكلەر, 42. سينكلەر, 60. فوررەست, 79. شيتوۆ, 88-اۆتوگول.
ەسكەرتۋ: براۋن, 42. تيرني, 49 – پوستنيكوۆ, 6. لوگۆينەنكو, 63. شيتوۆ, 69.
«سەلتيك»: گوردون, تيرني, شيمۋنوۆيچ, بيتتون, لۋستيگ, نچام, براۋن, سينكلەر, روگيچ (ماكگرەگور, 63), فوررەست (ارمسترونگ, 82), گريففيتس.
«استانا»: موكين, شومكو, لوگۆينەنكو (بەيسەبەكوۆ, 66), پوستنيكوۆ, شيتوۆ, ماەۆسكي, كلياينحايسلەر, مۇجىقوۆ (گراحوۆاتس 82), توماسوۆ (مۋرتازاەۆ, 77), تۆۋماسي, كابانانگا.
تورەشىلەر: حاتسەگان, شوۆرە, گەورگە ء(بارى دە – رۋمىنيا)
16 تامىز. گلازگو. «سەلتيك پارك».