كورەرمەندەر نازارىنا تامىزدىڭ 15 مەن 20 ارالىعىندا ەكسپو-2017 كورمەسىنىڭ كونگرەسس-ورتالىعى الاڭىندا «مۇزىكا قۇدىرەتى» اتتى شوۋ ۇسىنىلادى. توپ مۇشەلەرىنىڭ ايتۋىنشا, بۇل كەش بۇرىنعى كونتسەرتتەرىنەن وزگەشە.
«مەرەيتويدى ءوز وتانىڭدا تويلاۋ وتە قۋانىشتى سىيلىق. اعاشتىڭ ساباقتارى جان-جاققا قاراپ وسسە دە, ونىڭ تامىرى ءبىر جەردەن باستاۋ الادى. ءبىزدىڭ توپ وسىندا قۇرىلعاندىقتان, تامىرىمىز قازاقستاندا. ەكى جىل بۇرىن وسىنداي دەڭگەيدە كونتسەرت وتكىزسەك دەپ جوسپارلاپ باستاعان بولاتىنبىز. سوعان قوسا ەكسپو-2017 وتەتىنىن دە ەستەن شىعارمادىق. ءساتى ءتۇسىپ, ەكى اۋقىمدى شارا بىرىگىپ وتەتىن بولدى. بىردەن ايتا كەتەيىن, ءبىزدىڭ توپ بۇعان دەيىن وسىنداي شوۋ قويىپ كورگەن ەمەس. ءبىز ءۇشىن بۇل ۇلكەن قۇرمەت», دەدى توپتىڭ كوشباسشىسى بايعالي سەركەباەۆ.
ال كونتسەرت باعدارلاماسى جونىندەگى سۇراققا توپتىڭ ءانشىسى كەتي توپۋريا ءبارىن قۇپيا ساقتاپ, قوناقتارعا ادەمى كەش سىيلاعىلارى كەلەتىنىن ايتتى.
توپتىڭ مالىمدەۋىنشە, مەرەيتويلىق كونتسەرتتەر بىرنەشە قالادا وتكىزىلەدى. اتاپ وتسەك: استانا, الماتى, سانكت-پەتەربۋرگ جانە ماسكەۋدە. الايدا, استانا الاڭىنىڭ تەحنيكالىق قۇرىلعىلارىنىڭ ارتىقشىلىعىنان, ەڭ اۋقىمدى ءارى اسەرلى شوۋ ەلوردامىزدىڭ تورىندە وتەدى دەيدى ۇيىمداستىرۋشىلار.
«بىزگە كوپ ادامدار 6 كۇن قاتارىنان كۇنىنە 2 رەت كونتسەرت قويۋ قيىن ەمەس پە دەپ سۇراپ جاتادى. بىراق كەشە ەكسپو-2017 الاڭىندا ءۇش اي قاتارىنان ونەر كورسەتىپ جاتقان ديۋ سولەي تسيركىنىڭ قويىلىمىن كورىپ, بىزگە «قيىن» دەپ ايتۋ ۇيات سەكىلدى», دەپ كۇلدى توپتىڭ باس-گيتاراشىسى ۆلاديمير ميكلوشيچ.
«مۋزىكا قۇدىرەتى» كونتسەرتىنىڭ قويۋشى-رەجيسسەرى ۆياچەسلاۆ كۋلاەۆتىڭ ايتۋىنشا, كونگرەسس-ورتالىعىنىڭ جابدىقتالۋى ەشقانداي قيىندىق تۋعىزبادى.
«بۇكىل ويلاعان جوسپارلارىمىزدى ىسكە اسىرا الامىز. ءبىزدىڭ ماقساتىمىز كورەرمەندەرگە ۇمىتىلماس شوۋ سىيلاۋ. جانە بۇل ءۇشىن بارلىق جاعداي قاراستىرىلعان. سوعان قوسا, كورەرمەندەرمەن ينتەراكتيۆ ۇيىمداستىرامىز», - دەدى قويۋشى-رەجيسسەر.
سونىمەن قاتار, ا’Studio توبى بالالار ۇيلەرىنىڭ تاربيەلەنۋشىلەرىنە 2000 بيلەت سىيعا تارتقان ەكەن.
ايتا كەتەيىك, كونتسەرت تامىزدىڭ 15-20 ارالىعىندا ساعات 18:00 بەن 21:00-دە ەكسپو-2017 الاڭىندا ورنالاسقان كونگرەسس-ورتالىعىندا وتەدى. بيلەتتەر قالا كاسسالارى مەن expo2017astana.com سايتىندا ساتىلادى.
ايگۇل شەرنياز
«ەگەمەن قازاقستان»
سۋرەتتى تۇسىرگەن ورىنباي بالمۇرات
«ەگەمەن قازاقستان»