استانادا «ەجەلگى مىسىر ەسكەرتكىشتەرى» اتتى حالىقارالىق كورمەنىڭ اشىلۋ سالتاناتى ءوتتى

قازاقستان رەسپۋبليكاسىنىڭ مادەنيەت جانە سپورت ۆيتسە-ءمينيسترى اقتوتى رايىمقۇلوۆا العى سوزىندە قوناقتاردى يگى باستامامەن قۇتتىقتاي كەلە, قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەدي ۇلىنىڭ قۇتتىقتاۋ سالەمىن جەتكىزدى. «مىسىر تاريحى – كونە تاريح. كونە تاريحپەن كومكەرىلگەن كورمەنىڭ اشىلۋ سالتاناتى قۇتتى بولسىن! بۇل كورمە مىسىر تاريحىن كەزەڭ-كەزەڭىمەن تانىستىراتىن ەكسپوناتتاردان قۇرالعان. مۇنداعى تاريحي تۋىندىلار وتكەن داۋىردەن مول ماعلۇمات بەرەدى. كورمەدەگى ەكسپوناتتار ەجەلگى ءداۋىر ادامدارىنىڭ تانىم-تۇسىنىگىن, مادەنيەتىن, سول داۋىردەگى قولونەر شەبەرلەرى تۋرالى مول مالىمەت بەرەدى. قر ۇلتتىق مۋزەيىندە وسى ايدا بىرنەشە حالىقارالىق كورمەلەر وتكىزىلدى. مۇنداي كورمەلەر حالىقتىڭ تانىم كوكجيەگىن كەڭەيتۋگە سەپتىگىن تيگىزەدى دەپ ويلايمىن». كورمەگە تۋتانحامون توپتاماسى زاتتارىنىڭ جارتىلاي اسىل تاستارمەن اشەكەيلەنگەن فاراوننىڭ التىن جالاتىلعان اعاش كۇيمەسى, جارتىلاي اسىل تاستارمەن اشەكەيلەنگەن التىن جالاتىلعان اعاش تاعى, سىرتقى ساركوفاگى, ساداقالارىمەن قىز ءمۇسىنى جانە جارتىلاي اسىل تاستارمەن اشەكەيلەنگەن التىن جاعا قويىلعان. سونىمەن قاتار, مىسىردىڭ باي تاريحى ديناستيالىققا دەيىنگى كەزەڭنەن باستاپ ورتا عاسىرعا دەيىنگى ارالىقتاعى ءارتۇرلى تاريحي كەزەڭدەردىڭ بۇيىمدارى مەن جادىگەرلەرى كورىنىس تاپقان. مىسىر اراب رەسپۋبليكاسىنىڭ تۋريزم مينيسترلىگى حالىقارالىق قاتىناستار بويىنشا ءبىرىنشى ۆيتسە-ءمينيسترى احمەت شۋكري: «بۇل كورمە – قازاقستان مەن مىسىر ەلىنىڭ بىرلەسە وتىرىپ جاساعان ۇلكەن شاراسى. ەكى ەل اراسىنداعى دوستىق قارىم-قاتىناستىڭ ناتيجەسىندە قوس حالىقتىڭ ءوزارا سىيلاستىعى ارتا تۇسەدى دەپ سەنەمىن. بولاشاقتا حالىقتار دوستىعى ۇلكەن تابىسقا جەتكىزەتىنى ءسوزسىز. بۇگىنگى كورمە دە وسىنىڭ ناتيجەسى», – دەپ ءوز پىكىرىن ءبىلدىردى. كورمەدە ديناستيالىققا دەيىنگى كەزەڭ ەجەلگى مىسىرداعى يەروگليف جازۋىنىڭ پايدا بولۋىنىڭ ۇلگىسى سانالاتىن فاراون نارمەردىڭ پالەتكاسىمەن تانىستىرىلادى. ودان كەيىنگى ەجەلگى پاتشالىق كەزەڭ مىسىرلىق كەڭسە حاتشىسىنىڭ ءمۇسىنى, بەدەرلى سۋرەتتەرى بار حەسير تاقتايشالارى جانە گور (اسپان) قۇدايىن كەيىپتەيتىن قارشىعانىڭ باسى ارقىلى تانىستىرىلادى. ورتا پاتشالىق كەزەڭى ونىڭ بيلىگى كەزىندە مىسىر شەكاراسى الدەقايدا كەڭەيگەن 12 ديناستيانىڭ اتا-باباسى سانالاتىن سەنۋسەرت 1 فاراوننىڭ بويالعان اعاش ءمۇسىنى ارقىلى كورسەتىلەدى. گرەك-ريم كەزەڭى ريمدىك ايەل باسىنىڭ ءمۇسىنى ارقىلى, ال كوپت كەزەڭى وسى كەزەڭگە ءتان يكون جازۋمەن جانە پورترەتتىك سۋرەت ونەرى ارقىلى تانىستىرىلادى. اسەم جازۋلارمەن بەزەندىرىلگەن شىراعدان جانە گۇل ورنەكتەرىمەن بەزەندىرىلگەن فارفور تاباق جادىگەرلەرى يسلام كەزەڭىن كورسەتەدى. كورمەنىڭ اشىلۋ سالتاناتى بارىسىندا مىسىر فولكلورىن بيىمەن دە, مۋزىكاسىمەن دە شەتەلدەردە تانىستىرىپ جۇرگەن «رەدا» تۇڭعىش حالىق ءبيى ءانسامبلى ونەر كورسەتتى.