كەزدەسۋ بارىسىندا «مەكتەپ مەدياتسياسى: پروبلەمالارى مەن بولاشاعى» اتتى تاقىرىپ تالقىلاندى.
الەم بويىنشا كەڭ تاراعان مەدياتسيا داۋلاردى سوتقا دەيىن رەتتەۋدى كوزدەيتىنى بەلگىلى. ال مەكتەپ مەدياتسياسى ۇعىمى نەنى مەڭزەيدى؟ حالىقارالىق مەدياتور تاتيانا درونزينانىڭ ايتۋىنشا, مەكتەپتە اتا-انا مەن مۇعالىم, مۇعالىم مەن وقۋشى, باسقا دا ماماندار اراسىندا داۋ-دامايلار تۋىنداۋى مۇمكىن. ال كەيدە ولار تىم شەكتەن شىعىپ جاتادى.
«ەڭ العاش مەكتەپ مەدياتسياسى 1980 جىلدارى اقش-تا پايدا بولعان. مەنىڭ ويىمشا, ءبىلىم سالاسىنداعى كەز كەلگەن مامان مەكتەپ مەدياتسياسى ۇعىمىمەن تانىس بولۋى كەرەك. مامانداردىڭ ايتۋىنشا, ءار مەكتەپتە بەس-التى مەدياتور بولعانى ءجون. ولار مەكتەپتەگى كيكىلجىدەردى شەشەتىن بولادى», دەيدى تاتيانا درونزينا.
ونىڭ ايتۋىنشا, مەكتەپتەگى مەدياتسيا – كەشەندى ادىستەمە. «ونىڭ ماقساتى – بالاعا تاربيە بەرۋ, ءبىلىم بەرۋ سالالارىندا قاۋىپسىز ورتا قالىپتاستىرۋ. ياعني, وسى سالاداعى كەز كەلگەن سۋبەكت اراسىنداعى داۋلاردى شەشۋگە مەدياتسيانىڭ وسى ءتۇرى اتسالىسادى», دەيدى ساراپشى.
تاتيانا درونزينا ايتىپ وتكەندەي, بۇل ءادىس تەك مەكتەپتەردە عانا قولدانىلمايدى. سونداي-اق مەكتەپكە دەيىنگى تاربيە, جوو, ورتا ءبىلىم بەرەتىن مەكەمەلەر, قيىن بالالارمەن جۇمىس ىستەيتىن ورتالىقتار ءۇشىن, اتا-انالار ءۇشىن دە پايدالى.
«بۇل ادىستەمە بالالاردىڭ ۇلكەن ومىرگە اياق باسۋىنا, ۇلكەن الەۋمەتتىك ورتاعا تەز بەيىمدەلۋىنە كومەكتەسەدى. مەكتەپ مەدياتورى ەڭ الدىمەن ءبىلىم بەرۋ سالاسىندا قىزمەت ەتەتىن ادام بولعانى ءجون», دەيدى درونزينا.
جيىندا بەلگىلى بولعانداي, ولاردى دايىنداۋ ءمودۋلدى پرينتسيپ بويىنشا بەلگىلى ءبىر باعدارلامالار ارقىلى جۇزەگە اسىرىلادى. وسى رەتتە بۇل مامانداردى پسيحولوگ نەمەسە الەۋمەتتىك پەداگوگتاردان قالاي اجىراتۋعا بولادى دەگەن سۇراق تۋىندارى ءسوزسىز. «مەكتەپ مەدياتورى رەتىندە ۇستاز دا, پەداگوگ, پسيحولوگ, الەۋمەتتىك پەداگوگ تا قىزمەت ەتە الادى. مەكتەپ مەدياتسياسى وسى ماماندىقتاردى تولىقتىرىپ تۇر دەۋگە بولادى. ونىڭ نەگىزگى قىزمەتى - ءبىلىم بەرۋ سالاسىنداعى ادامدار اراسىنداعى قارىم-قاتىناستاردى رەتتەۋ», دەيدى ساراپشى.
كەزدەسۋ بارىسىندا ساياسي عىلىمدار دوكتورى مەدياتسيانىڭ بۇل ءتۇرى وتە ماڭىزدى ەكەنىن ەرەكشە اتاپ ءوتتى. سوندىقتان دا ونىڭ بولاشاقتا كەڭ تارايتىنىنا سەنىم بىلدىرگەن مەدياتور قازىردەن باستاپ مەدياتسيانىڭ وسى ءتۇرىن نازارعا الۋ كەرەكتىگىن اتاپ ءوتتى.
ەستەرىڭىزگە سالا كەتسەك, 2017 جىلدىڭ 26 قاڭتارىندا قازاقستان رەسپۋبليكاسى جوعارعى سوتىنىڭ توراعاسى قايرات ءمامي داۋلاردىڭ جەكەلەگەن ساناتتارى بويىنشا ولاردى مەدياتسيا تارتىبىمەن سوتقا دەيىنگى رەتتەۋدى ەنگىزۋ بويىنشا پيلوتتىق جوبانى ىسكە اسىرۋ تۋرالى ەرەجەگە قول قويعان بولاتىن. ال مەكتەپ مەدياتسياسى قازاقستان تاجىريبەسىنە ءالى ەنگىزىلە قويعان جوق.
گۇلنۇر قۋانىشبەكقىزى,
«ەگەمەن قازاقستان»