«قۇرمەت» وردەنىنىڭ يەگەرى, ەكونوميكا عىلىمدارىنىڭ دوكتورى, پروفەسسور, ۇلتتىق عىلىم اكادەمياسىنىڭ اكادەميگى عالىمجان نۇرىشەۆ بەس جىل بۇرىن ومىردەن ءوتىپ ەدى. تۋعان جەرى تەكتى ازاماتىن ۇمىتقان جوق. اتىراۋ قالاسىندا 1995-2004 جىلدارى تۇرعان ۇيىنە ەسكەرتكىش تاقتا ورناتتى.
بار عۇمىرىن ەلىمىزدەگى ءبىلىم مەن عىلىمنىڭ دامۋىنا ارناعان عالىمجان جۇماباي ۇلىن ەسكە الۋ شاراسىنا وبلىس اكىمى نۇرلان نوعاەۆ قاتىسىپ, ابزال ازاماتتىڭ ءومىر جولى, ادامگەرشىلىك قاسيەتى, كاسىبي بىلىكتىلىگى اركەز ۇلگى بولىپ قالاتىنىن ايتتى.
ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ رەكتورى ابزال تالتەنوۆ, وبلىستىق قوعامدىق كەڭەستىڭ مۇشەسى انەس بيسەن ۇلى, اقىن-جازۋشى قادىر ءجۇسىپ ەستەلىكتەرىمەن ءبولىستى.
ەسكەرتكىش تاقتانىڭ اشىلۋ سالتاناتىنان سوڭ ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىندە پروفەسسور ع. نۇرىشەۆتى ەسكە الۋعا ارنالعان «جاقسىنىڭ جارىعى وشپەيدى» اتتى دوڭگەلەك ۇستەل ءوتتى.
باقىتگۇل باباش, «ەگەمەن قازاقستان»