ەكولوگيالىق جۇيەنىڭ بىرتۇتاستىعىن ساقتاي وتىرىپ, دامۋدىڭ بارلىق باعىتىندا ەكونوميكالىق ءوسۋدى نەگىزگە الاتىن بىرىككەن ۇلتتار ۇيىمىنىڭ كورمە الاڭى سالتاناتتى تۇردە اشىلدى. «جاسىل» ەكونوميكا قاعيدالارىن وڭتايلاندىراتىن سونى تەحنولوگيالار تىزبەگى مەن جاڭا يدەيالاردى ۇسىناتىن 17 دۇنيەجۇزىلىك ۇيىم پاۆيلونىن كەز كەلگەن ۋاقىتتا تاماشالاي الاسىز.
«بۇل پاريج كەلىسىمشارتى مەن 2030 جىلعى كليماتتىڭ وزگەرۋىنە قارسى مەجەنى ورىنداۋعا مۇمكىندىك بەرەدى. نەگىزگى نازاردى ناقتى شەشىمدەرگە اۋدارامىز», دەدى بۇۇ-نىڭ ەكسپو-داعى باس كوميسسارى جيھان سۇلتانوعلى. سونداي-اق, ول 2030 جىلعا دەيىن ارزان ءارى تازا ەنەرگيامەن تەمپەراتۋرانى 1,5 گرادۋستىق يندۋسترياعا دەيىنگى دارەجەنى ءبىر مەزگىلدە قامتاماسىز ەتۋدىڭ ماڭىزدىلىعىن ايتىپ ءوتتى. قۋات كوزى الەمدىك ەكونوميكالىق دامۋدا اسا ماڭىزعا يە جانە بارلىق دامۋ سالالارىنىڭ نەگىزى.الەمدەگى الىپ ەنەرگيا كوزدەرى ساناتىنداعى كومىر, مۇناي جانە تابيعي گازدى ۇنەمى قولدانۋ ناتيجەسىندە عالامدىق جىلىنۋ پروتسەسى ۇدەپ كەلەدى. مامانداردىڭ پىكىرىنشە, تۇراقتى قۋات كوزدەرىنىڭ ارقاسىندا مەملەكەتتەر ەكولوگيالىق تازا ەكونوميكا قۇرا الادى, دەگەن باس كوميسسار تابيعي كاپيتالدى قورعاپ قالۋ مەن ساقتاۋ ەكونوميكالىق ءوسۋدى قامتاماسىز ەتە الادى سيپاتىنداعى تۇجىرىمدامالاردىڭ كوكەيكەستى ماسەلەگە اينالعانىن ايتتى.
تانىستىرىلىمدا اۋىل شارۋاشىلىعى داقىلدارىنىڭ ءونىمىن ارتتىرۋ بارىسىنداعى كەشەندى مەحانيكالاندىرۋ, حيميالاندىرۋ جانە مەليوراتسيالاۋ ماڭىزى تۋرالى ايتىلدى جانە شولەيتتى القاپتاردى سۋارمالى ەگىسكە اينالدىرۋدىڭ تىڭ تاسىلدەرى ۇسىنىلدى. مامانداردىڭ ايتۋىنشا, مەليوراتسيالىق جاعدايى ناشار القاپتاردا توپىراقتى سورلانۋدان, باتپاقتانۋدان ساقتايتىن نەگىزگى ءادىس – ينجەنەرلىك جولمەن قازىلعان تەرەڭ كوللەكتورلى-كارىزدى جۇيەلەر ارقىلى جەر استى سۋىنىڭ اعىمىن جاساۋ بولماق. جاڭاراتىن ەنەرگەتيكا مەن ءتيىمدى ەنەرگيا سالاسىندا ماڭىزدى جاڭالىقتارعا قول جەتكىزۋ ءۇشىن ينۆەستيتسيالاردى شوعىرلاندىرۋ تۇرعىسىنداعى زەرتتەۋ ناتيجەلەرى عالىمدارعا تاپتىرماس ادىستەر جيىنتىعى بولادى. كورمە كەزىندە اتالعان ۇيىمدار قالپىنا كەلتىرىلەتىن جانە ءتيىمدى قۋات كوزدەرىن دامىتۋ بويىنشا ماڭىزدى جاڭالىقتارمەن ءبولىسىپ وتىرۋعا ۋاعدالاستى.
ءوز كەزەگىندە «استانا ەكسپو-2017» ۇك» اق كومپانياسىنىڭ باسقارما توراعاسى احمەتجان ەسىموۆ كورمەگە حالىقارالىق قوعامداستىق تاراپىنان قىزىعۋشىلىق جوعارى ەكەنىن ايتا كەلىپ: «بۇل پاۆيلوننىڭ اشىلۋى ءۇشىن اۋقىمدى جۇمىستاردى ىسكە اسىردىڭىزدار. بۇۇ-نىڭ مەكەمەلەرى ءبىزدىڭ كورمەگە بەلسەندى قاتىسىپ وتىر. بۇل – ءبىز ءۇشىن ۇلكەن مارتەبە», دەپ ريزاشىلىعىن ءبىلدىردى.
الەمدەگى گاز بەن مۇناي وندىرىسىندەگى جەتەكشى مەملەكەتتەردىڭ ءبىرى قازاقستان الداعى جارتى عاسىردا 50 پايىز قايتا قالپىنا كەلتىرىلەتىن قۋات كوزدەرىن پايدالانۋدى ماقسات ەتىپ وتىر. بۇۇ-نىڭ قولداۋىمەن ەلىمىزدە سوڭعى بەس جىلدا مۋنيتسيپالدى عيماراتتاردى جىلىتۋعا كەتەتىن جىلدىق قۋات 45 پايىزعا قىسقارىپ وتىر. ايتا كەتەلىك, بۇۇ-نىڭ يۋنيدو, يۋنەسكو, ماگاتە, بۇۇ دب, ەسكاتو, يۋنيسەف جانە بارشاعا ارنالعان تۇراقتى ەنەرگەتيكا سىندى بىرلەسكەن ۇيىمدار جەلىسى كورمە اياسىندا ەكولوگيالىق تيىمدىلىك, رەسۋرستاردى ۇنەمدەۋ قاعيدالارى بويىنشا ءتۇرلى شارالار ۇيىمداستىرادى.
ايا ءومىرتاي, «ەگەمەن قازاقستان»