باسقوسۋعا قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى د.مىڭباي, پارلامەنت ءماجىلىسىنىڭ دەپۋتاتتارى, اسسامبلەيا مۇشەلەرى, مەملەكەتتىك ورگانداردىڭ, ديپلوماتيالىق كورپۋستىڭ, ەتنو-مادەني بىرلەستىكتەردىڭ وكىلدەرى, «ەكسپو-2017» كورمەسىنە كەلگەن شەتەلدىك قوناقتار, عىلىمي جانە زيالى قاۋىم وكىلدەرى, حالىقتىق قولدانبالى ونەر شەبەرلەرى قاتىستى, دەپ حابارلايدى اقوردانىڭ رەسمي سايتى.
ءىس-شارالار ۇلتتىق مۋزەيدە باستاۋ الدى. وندا ەكسپو-2017 كورمەسى وتكىزىلەتىن كەزەڭدە قوعامدىق كەلىسىم مەن جالپىۇلتتىق بىرلىكتىڭ قازاقستاندىق مودەلى جان-جاقتى تانىستىرىلادى.
مەملەكەتتىك حاتشى سويلەگەن سوزىندە نۇرسۇلتان نازارباەۆتىڭ قوعامدىق كەلىسىم مەن جالپىۇلتتىق بىرلىكتىڭ قازاقستاندىق مودەلى كوپ ەتنوستى قوعامنىڭ ينتەگراتسيالانۋىنا قاتىستى سالماقتى ساياساتتىڭ جالپىعا تانىلعان ەتالونى بولعانىن اتاپ ءوتتى.
– ەلىمىزدىڭ كونستيتۋتسياسى ناسىلدىك, ۇلتتىق, ءدىني جانە الەۋمەتتىك ەرەكشەلىگىنە قاراماستان, بارلىق ازاماتتار قۇقىقتارىنىڭ تەڭدىگىنە كەپىلدىك بەرەدى جانە قورعايدى, - دەدى گۇلشارا ابدىقالىقوۆا.
مەملەكەتتىك حاتشى بۇگىندە قازاقستاندا 100-دەن استام ەتنوس پەن 18 كونفەسسيا وكىلدەرى بەيبىت ءارى تاتۋ ءومىر ءسۇرىپ وتىرعانىن ايتتى.
سونداي-اق ءىس-شارا قوناقتارى بۇقارالىق اقپارات قۇرالدارىنىڭ ەتنو-مادەني بىرلەستىكتەر تۋرالى ارناۋلى كورمەسىمەن, حالىقتىق قولدانبالى ونەر شەبەرلەرى بۇيىمدارىنىڭ جارمەڭكەسىمەن, «كيىز ءۇي – ەلدىڭ وتاۋى» كونتسەپت-مودۋلىمەن, قازاقتىڭ ۇلتتىق تاعامدارى جونىندەگى شەبەرلىك ساباقتارىمەن تانىستى.
بۇدان بولەك, گۇلشارا ابدىقالىقوۆا مەن فورۋمعا قاتىسۋشىلار ەكسپو ساياباعى اۋماعىندا ورنالاسقان قازاقستان حالقى اسسامبلەياسىنىڭ بەيبىتشىلىك پەن كەلىسىم اللەياسىنىڭ سالتاناتتى اشىلۋ راسىمىنە قاتىستى.
وندا ەتنومادەني بىرلەستىكتەردىڭ جانە شىعارماشىل جاستاردىڭ تەاترلاندىرىلعان شەرۋى, حالىقتىق قولدانبالى ونەر شەبەرلەرىنىڭ «شەبەرلەر اۋىلى» كورمە-جارمەڭكەسى, «العا, قازاقستان!» فلەشموبى ءوتتى.
فورۋمنىڭ سوڭىندا مەملەكەتتىك حاتشى بەيبىتشىلىك جانە كەلىسىم ەنەرگياسى عالامشارداعى ەڭ تازا ءارى يگىلىكتى ەنەرگيا ەكەنىن اتاپ ءوتتى.
بەيبىتشىلىك پەن كەلىسىم اللەياسى ارقىلى ءجۇرىپ وتكەن ءار ادام قوناقجاي ءارى كەڭ پەيىل قازاق جەرىنىڭ جىلۋىنا بولەنەتىن بولسىن دەگەن تىلەك ايتىلدى.