بوكستان پاكىستان ۇلتتىق قۇراماسىن قازاق باپكەرى جاتتىقتىراتىن بولدى. بۇل تۋرالى پاكىستان بوكس فەدەراتسياسىنىڭ باس حاتشىسى ناسير تانگ TheNews.com.pk باسىلىمىنا بەرگەن سۇحباتىندا ايتتى.
«قازاقستاننىڭ بوكسى مىقتى. سوندىقتان ءبىز وسى ەلدەن مامان شاقىرۋدى ءجون كوردىك. قازاقستان بوكس فەدەراتسياسى بىزگە كومەك كورسەتەتىندىگىن ايتتى. جاقىن ارادا ولار بىزگە لايىقتى مامان جىبەرەدى دەگەن ۇمىتتەمىز», دەيدى تانگ.
باس حاتشىنىڭ ايتۋىنشا, پاكىستان بوكس فەدەراتسياسى قازاق باپكەرىنە ايىنا 2500 اقش دوللار تولەۋگە دايىن. سونداي-اق, كەلىسىم شارت مەرزىمىن ءۇش نەمەسە ءتورت جىلعا جاساۋعا نيەتتى.
ايتا كەتەيىك, ەكى كۇن بۇرىن نەپال قۇراماسىنىڭ باس جاتتىقتىرۋشىسى بولىپ وتانداسىمىز مۇحتار بەردىمبەتوۆ تاعايىندالعان ەدى. ال, اتلانتا وليمپياداسىنىڭ قولا جۇلدەگەرى بولات نيازىمبەتوۆ بۇگىندە وڭتۇستىك كورەيا ەلىنىڭ قۇراماسىن باپتايدى. ول كورەيا قۇراماسىنا دەيىن يراك بوكسشىلارىن جاتتىقتىرعان.