Hunan Television قىتايداعى كورسەتىلىمى ەڭ جوعارعى تەلەارنالاردىڭ اراسىندا ەكىنشى ورىندا تۇر. قىتاي حالىق رەسپۋبليكاسىنىڭ ۇلكەن بولىگىن عانا قامتىپ قويماي, گونكونگ, ماكاو سياقتى ارنايى اكىمشىلىك اۋداندار مەن تايۆان ارالىنا دا تاراتىلادى.
سونىمەن قاتار, "قازاقستان" رترك اق باعدارلامالارى مەن جوبالارى Mango TV ينتەرنەت ارناسىندا كورسەتىلەدى دەپ جوسپارلانۋدا.
ايتا كەتسەك, Mango TV ءوز كورەرمەندەرىنە كونتەنتتىڭ بارلىق جانرىن ۇسىنادى. ولاردىڭ ىشىندە ءتۇرلى فيلمدەر, تەلەحيكايالار, مۋزىكا, مۋلتفيلمدەر جانە ويىن-ساۋىق باعدارلامالار مەن قاتار Hunan تەلەراديوكورپوراتسياسى مەن Hunan Satellite TV-ءدىڭ اۆتورلىق باعدارلامالارى دا كورسەتىلەدى.
2016 جىلدىڭ كورسەتكىشىنە قاراعاندا, Mango TV ينتەرنەت ارناسىنا 39 ميلليوننان استام بەلسەندى قولدانۋشى تىركەلگەن.
ەكى كورپوراتسيا اراسىنداعى ىنتىماقتاستىق شەڭبەرىندە جاڭا مۋزىكالىق جوبانى بىرلەسىپ شىعارۋ جوسپارلانىپ وتىر. ماۋسىم ايىنان باستاپ, تەحنيكالىق-ۇيىمداستىرۋشىلىق ماسەلەلەر بويىنشا قىزمەت توپتارى مەن شىعارماشىلىق ۇجىمنىڭ قۇرامىنداعى پروديۋسەرلەر, رەجيسسەرلەر, وپەراتورلار ءوز جۇمىسىنا كىرىسەتىن بولادى.
Hunan تەلە-راديو حابارلارىن تاراتۋ كورپوراتسياسىنىڭ پرەزيدەنتى ليۋي حۋانبين "مۋزىكا مەن تەلەارنا ەكى ەل اراسىنداعى دوستىقتى ودان ءارى نىعايتادى" دەدى.
سونداي-اق, 2018 جىلدان باستاپ, جىل سايىنعى حالىقارالىق Taklimakan Rally» جول تالعامايتىن موتوتسيكلدەر جارىسىنىڭ ءتۇسىرىلىمى قازاقستان رەسپۋبليكاسىنىڭ اۋماعىندا جۇزەگە اسپاق. 2005 جىلدان باستاپ "Taklimakan Rally" قىتايداعى ەڭ بەدەلدى موتوتسيكلدەر جارىسى بولىپ سانالادى جانە 2012 جىلى حالىقارالىق اۆتوموتوسپورت فەدەراتسياسىنىڭ ستاتۋسىن العان. بۇل جوبا قازاقستاندىق كونتەنتتى قىتاي ەلىنە كەڭىنەن شىعارۋدى جانە ءتۋريزمدى دامىتۋدى كوزدەيدى.
"اتالعان كەلىسىمدەر وتاندىق كونتەنتتى شەتەلدىك تەلەۆيزيالىق نارىققا شىعارۋ ءۇشىن باعىتتالعان. Hunan TV تەلەارناسىمەن ورناتىلعان ىنتىماقتاستىق "قازاقستان" رترك اق اۋديتورياسىن كەڭەيتۋگە مۇمكىندىك بەرەدى", - دەدى كورپوراتسيا باسقارماسىنىڭ توراعاسى ەرلان قارين.