پاۆلوداردا ءوتىپ جاتقان بوكستان قازاقستاننىڭ ەرلەر اراسىنداعى چەمپيوناتىن رەسپۋبليكا سپورتىنىڭ تاريحىندا ەسىمدەرى قالعان تۇلعالار دا تاماشالاۋدا. ولاردىڭ قاتارىندا بوكستان افينا وليمپياداسىنىڭ قولا جۇلدەگەرى, قاراعاندىلىق سەرىك ەلەۋوۆ تە بار. ءبىز بىرىنشىلىك بارىسىندا بەلگىلى بىلعارى قولعاپ شەبەرىمەن از-كەم اڭگىمەلەسكەن ەدىك.
– سەرىك, چەمپيونات كوڭىلىڭىزدەن شىعىپ جاتىر ما؟
– ىرىكتەۋ كەزەڭدەرى ارتتا قالىپ, جارتىلاي فينالعا جولداما العاندار انىقتالدى. دەمەك, ناعىز شايقاس ەندى باستالماق. شيرەك فينالدا دا تارتىستى جەكپە-جەكتەر بولدى. «جۇلدەلەر اۋىلىنا» اياق باسقانداردىڭ قاتارىندا ەسىمدەرى ەلگە تانىلا قويماعان جاس سپورتشىلار دا بار. پاۆلودار رينگى جاڭا ەسىمدەر جازىلاتىن دودا بولارىنا سەنەمىن. سونداي-اق, بۇل چەمپيونات وتە جوعارى دەڭگەيدە ۇيىمداستىرىلعان دودالاردىڭ ءبىرى رەتىندە ەل ەسىندە قالۋى كەرەك.
– ريو وليمپياداسىنا قاتىسقان بوكسشىلاردىڭ چەمپيوناتتاعى ونەرىن قالاي باعالايسىز؟
– وليمپياداشىلار – بىرىنشىلىكتىڭ باستى فاۆوريتتەرى. سوندىقتان, ولار وزدەرىنە ارتىلعان سەنىمدى اقتايدى دەگەن ويدامىن. بۇعان دالەل: جانىبەك ءالىمحان ۇلى مەن قايرات ەراليەۆ تە, ابىلايحان ءجۇسىپوۆ پەن ءىلياس سۇلەيمەنوۆ تە – جارتىلاي فينالدا. قىزىقتىڭ ءبارى الدا.
– بىرىنشىلىكتە ءسىز كۇتپەگەن ءناتيجەلەر بولدى ما؟
– ازىرشە سەنساتسيا كورگەن جوقپىن. دەسە دە, 75 كيلوعا دەيىنگى سالماقتا سىنعا ءتۇسىپ جاتقان قىزىلوردالىق تۇرسىنباي قۇلاحمەتوۆتى بولە-جارا اتاپ وتكىم كەلەدى. مەنىڭشە, بولاشاعىنان زور ءۇمىت كۇتتىرەتىن جاستىڭ ءبىرى وسى تۇرسىنباي بولۋعا ءتيىس. سونداي-اق, 64 كيلوداعى جىگىتتەردىڭ دە ونەرى ۇنادى.
– پاۆلودار بوكسى دەگەندە ويىڭىزعا الدىمەن نە كەلەدى؟
– سوڭعى جىلدارى ەلىمىزدە بوكستى دامىتۋعا ايرىقشا كوڭىل بولگەن وڭىرلەردىڭ قاتارىندا پاۆلودار دا بار. سپورتشى رەتىندە بۇل جاققا تابانىم تيمەپتى. العاش رەت بيىل كوكتەمدە, جاستار اراسىنداعى ازيا بىرىنشىلىگىنە كەلدىم. مىنە, ەكىنشى رەت پاۆلودار جەرىندەمىن. مۇندا بوكسشىلارعا وتە جاقسى جاعدايلار جاسالعان. قولداۋ كەرەمەت. تەك جاتتىعۋعا ءمان بەرىپ, ناتيجەڭدى جاقسارتۋدى عانا ءبىل. جەرگىلىكتى بوكس فەدەراتسياسىنىڭ پرەزيدەنتى شۋحرات دانباي – بىلعارى قولعاپ شەبەرلەرىنىڭ ناعىز جاناشىرى. ءوڭىر بوكسىنىڭ جاڭا ساتىعا كوتەرىلۋى دە وسى كىسىنىڭ ەڭبەگى دەپ بىلەمىن. وڭىرلىك فەدەراتسيانىڭ اتقارۋشى ديرەكتورى ازامات ماقاجانوۆ تا جاقسى باستامالارعا ۇيىتقى بولىپ ءجۇر. وبلىستاعى بوكسقا دەگەن قامقورلىقتى بارعان جەرلەرىمدە ايتا جۇرەمىن.
اڭگىمەلەسكەن
فارحات امىرەنوۆ
پاۆلودار