قازاقستاندىق جەكپە-جەك شەبەرى, «نايمان» دەگەن لاقاپ اتپەن بەلگىلى قۋات حاميتوۆ كەزەكتى جەڭىسىن تاۋەلسىزدىكتىڭ 25 جىلدىق مەرەكەسىنە ارنادى. ول جەڭىستەن سوڭ بوز كىلەمدە تۇرىپ ءان سالدى. جەكپە-جەك شەبەرىنىڭ ءان سالىپ تۇرعان ءساتىن ينستاگرام جەلىسىندە v_astane اتاۋىمەن تىركەلگەن ازامات تا جاريالادى.
ول قۋات حاميتوۆتىڭ رەسەيلىك سپورتشىعا قارسى وتكىزگەن جەكپە-جەگىنەن سوڭ قول جەتكىزگەن جەڭىسىن قازاقستان تاۋەلسىزدىگىنىڭ 25 جىلدىعىنا ارنايتىنىن جازىپتى. بەينەماتەريالدا سپورتشىنىڭ سويلەگەن سوزدەرى انىق ەستىلەدى.
«بۇگىن مەنىڭ ەلىمدە قاسيەتتى مەرەكە. بۇگىن قازاقستاننىڭ ءوز تاۋەلسىزدىگىنە قول جەتكىزگەنىنە 25 جىل تولىپ وتىر. سونىمەن قاتار, مەن دە بۇگىن ءوزىمنىڭ 25-ءشى جەكپە-جەگىمدى وتكىزدىم. مەن وسى جەڭىسىمدى ەلىمە, قازاقستان تاۋەلسىزدىگىنىڭ 25 جىلدىعىنا ارنايمىن», – دەدى ق.حاميتوۆ.
وسى سوزدەردەن سوڭ ول بوز كىلەمدە تۇرىپ ميكروفونعا «ەلىم مەنىڭ» ءانىن شىرقاتا جونەلدى. ءاندى ورىنداپ بولعان سوڭ, حاميت بوز كىلەمگە الىپ شىققان قازاقستاننىڭ تۋىن ءسۇيدى. ايتا كەتەيىك, قازاقستاندىق تانىمال جەكپە-جەك شەبەرى قۋات حاميتوۆ ماسكەۋدە وتكەن Fight Nights Global 57 ءتۋرنيرىنىڭ اياسىنداعى جەكپە-جەگىن رەسەيلىك گادجي رابادانوۆقا قارسى وتكىزگەن بولاتىن. قۋات قارسىلاسىن ءۇشىنشى راۋندتا بۋىندىرۋ ادىسىمەن جەڭدى.