قازاقستان بۇگىندە بولاشاققا نىق سەنىممەن قادام باسىپ كەلە جاتقان ەل دەپ سانايدى رف-داعى ازەربايجان رەسپۋبليكاسىنىڭ توتەنشە جانە وكىلەتتى ەلشىسى, كەڭەس جانە ازەربايجان ەسترادا ءانشىسى, اكتەر, كومپوزيتور, پەداگوگ, ونەرتانۋ دوكتورى, پروفەسسور پولاد بيۋلبيۋل وگلى. بۇل تۋرالى قازاقپارات حابارلايدى.
«قازاقستاننىڭ جەتىستىكتەرى وتە كوپ, ونى ءبىر سۇحباتتا ايتىپ جەتكىزۋ مۇمكىن ەمەس. قازاقستاننىڭ كەڭەس وداعىنان شىعىپ, الەمگە بەدەلدى مەملەكەتكە, كورنەكتى كوشباسشى نۇرسۇلتان نازارباەۆتىڭ باسشىلىعىمەن ءوز-ءوزىن قامتاماسىز ەتكەن, ەگەمەندى, تاۋەلسىز ەلگە قالاي اينالعانى مەنىڭ كوز الدىمدا ءوتتى. بۇل ءبىرتۋار تۇلعاعا ۇلكەن راحمەت ايتۋىمىز قاجەت, ول ەڭ قيىن 90-شى جىلدارى ءوز حالقىن, ەلىن كوپتەگەن سىناقتاردان امان الىپ شىعىپ, بۇگىندە قازاقستاندى سەنىمدى تۇردە العا جىلجىعان ەل قاتارىنا قوستى», – دەيدى پ.بيۋلبيۋل وگلى. سونداي-اق, ديپلومات ەل استاناسىنىڭ گۇلدەنۋىن قازاقستاندىق عاجايىپقا بالادى.
«ساناۋلى جىلدارداعى استانانىڭ قارىشتاپ دامىعانىن قازاقستاندىق عاجايىپ دەر ەدىم. استانانى اۋىستىرۋ ءۇشىن قاتاڭ ساياسي ەرىك-جىگەر قاجەت. بۇل قيىن دا كۇدەلى ۇدەرىس. بۇگىندە استانا كوركىنە تامسانىپ قارايتىن قالاعا اينالدى», – دەدى ول. سونىمەن قاتار, ول قحا قىزمەتىنىڭ جانە ەل باسشىسىنىڭ تولەرانتتىلىققا باسا نازار اۋدارۋىمەن قامتاماسىز ەتىلىپ كەلە جاتقاندىعىن تىلگە تيەك ەتتى.
«قازاقستانعا بارعان كەزدە ازەربايجان دياسپوراسىمەن ءجيى كەزدەسەمىن. ولار قازاقستاندا جايلى ءومىر ءسۇرىپ جاتقاندارىن ايتادى. قحا - ءتۇرلى ۇلتتار مەن ءدىني سەنىمدى بىرىكتىرۋدىڭ وتە تاماشا تەتىگى. حالىق نازى تىڭدالاتىنىن جاقسى بىلەدى, سوندىقتان دا سەنىمدى ءارى تاتۋلىقتا ءومىر سۇرۋدە. وسى ءۇشىن قازاقستان حالقىنا, ونىڭ باسشىسىنا العىس ءبىلدىرۋ قاجەت. قازاقستان حالقىن جانە اسا قۇرمەتتى پرەزيدەنتكە ەل يگىلىگى جولىندا بۇدان دا ۇلكەن تابىستار تىلەيمىن. تاۋەلسىزدىكتىڭ 25 جىلدىعىمەن قۇتتىقتايمىن!», – دەدى پولاد بيۋلبيۋل وگلى.