جاقىندا ەكىباستۇزدا قالالىق اكىمدىكتىڭ قولداۋىمەن, «اتامۇرا» مادەنيەت ورتالىعىنىڭ ۇيىمداستىرۋىمەن ەل تاۋەلسىزدىگىنىڭ 25 جىلدىعىنا ارنالعان «تاۋەلسىزدىك – ءتاۋ ەتەر جالعىز كيەم» اتتى حالىقارالىق اقىندار ايتىسى ءوتتى. ايتىسقا جىردىڭ جىلىگىن شاعىپ, مايىن ءىشىپ جۇرگەن قازاقستان, قىتاي, موڭعوليا ەلدەرىنىڭ 10 اقىنى قاتىستى. ولار – اسپانبەك شۇعاتاەۆ (باياناۋىل), ديدار قاميەۆ (قاراعاندى), نۇرمات مانسۇروۆ (قىزىلوردا), ارزىگۇل قايىنبەكقىزى (قىتاي حالىق رەسپۋبليكاسى), ەرلان داۋلەت (موڭعوليا), ابزال قابدراش (پاۆلودار), راۋان قايداروۆ (ەكىباستۇز), اياكوز سەرىكقىزى (الماتى), نۇرقانات قايرات (استانا), قۋانىش شارمانوۆ (پاۆلودار).
ەل ىشىندە پاۆلودار ورىستانعان, اقىن تۇگىلى قازاق تابۋ قيىن دەگەن قاڭقۋ سوزدەردىڭ بارى بەلگىلى. بىراق بۇل جولعى الامان ايتىس سول ءسوزدىڭ قيسىنسىز ەكەنىن دالەلدەدى. كەلگەن كورەرمەننىڭ قاراسى قالىڭ. نەگىزگى تاقىرىپ تاۋەلسىزدىك بولسا دا, اقىندار جاقىندا جول اپاتىنان قازا بولعان, ەكىباستۇزدىڭ اتىن شىعارىپ جۇرگەن اقىن قىزى الماگۇل جۇگىنىسوۆانى دا تىلگە تيەك ەتپەي وتپەدى. نەبارى 34 جاسىندا كوز جۇمعان الماگۇلدىڭ ارتىندا وشپەس ولەڭدەرى مەن ايشىقتى ايتىستارى قالدى. ادامگەرشىلىگى ءبىر توبە اقىننىڭ سازگەرلىك قىرى دا ەلگە ەندى تانىس بولا باستاعان ەدى. دەسە دە, اجال ايتىپ كەلمەيدى, ءومىر قايتىپ كەلمەيدى. جازمىشتان وزمىش جوعىنا ەرىكسىز مويىن ۇسىنامىز.
ءتورت ساعاتقا سوزىلعان ءدۇبىرلى دودادا الدىنا قارا سالماي, ءجۇيرىكتىگىن جۇيەلى سوزىمەن تانىتقان ديدار قاميەۆ باس ءجۇلدەنى يەلەندى. ءبىرىنشى ورىن اسپانبەك شۇعاتاەۆقا بۇيىرسا, ەكىنشى ورىندى راۋان قايداروۆ ەنشىلەدى. ءۇشىنشى ورىن موڭعوليادان كەلگەن قانداسىمىز ەرلان داۋلەتكە بۇيىردى.
سونىمەن قاتار, ءجۇرسىن باتەن ۇلى اتىنداعى جۇلدەنى – قۋانىش شارمانوۆ, الماگۇل جۇگىنىسوۆا اتىنداعى جۇلدەنى – ارزىگۇل قايىنبەكقىزى, ءتۇسىپحان قاسىمجانوۆ اتىنداعى جۇلدەنى نۇرمات مانسۇروۆ قانجىعاسىنا بايلادى. «ارقالى اقىن» اتالىمىنا – نۇرقانات قايرات, «وزىق ويلى, وتكىر ءتىلدى» اتالىمىنا – اياكوز سەرىكقىزى, «ازۋلى اقىن» اتالىمىنا ابزال قابدراش لايىق دەپ تانىلدى.
بارلىق اقىندارعا العىس حاتتار مەن اقشالاي سىيلىقتار تابىس ەتىلدى.
بەرىك سادىر,
«ەگەمەن قازاقستان»