ەۋروپالىق وداقتىڭ ءباسپاسوز قىزمەتى ەۋرووداق رەسمي وكىلىنىڭ قازاقستان رەسپۋبليكاسى تاۋەلسىزدىگىنىڭ 25 جىلدىعىمەن قۇتتىقتاۋىن جاريا ەتتى, دەپ حابارلايدى قازاقپارات.
«ەۋروپالىق وداق قازاقستاننىڭ تاۋەلسىزدىگىن جاريا ەتكەنىنە 25 جىل تولۋىمەن قۇتتىقتايدى. ەو قازاقستانداعى وزگەرىستەردى قولدايدى جانە قازاقستان حالقى ءۇشىن وسى ۇستانىمدى جالعاستىرا بەرمەك. ءبىز ورتالىق ازيا بويىنشا ەو ستراتەگياسى جانە سەرىكتەستىك پەن ىنتىماقتاستىقتى كەڭەيتۋ تۋرالى كەلىسىم نەگىزىندە ەلدىڭ دامۋى, تۇراقتىلىعى مەن قاۋىپسىزدىك مۇددەلەرىندەگى ۇزاق مەرزىمدى قارىم-قاتىناستى ساقتاپ قالعىمىز كەلەدى. ءبىز كەلەسى جىلى قازاقستاندا وتەتىن EXPO-2017 كورمەسىنە ساتتىلىك تىلەيمىز», – دەلىنەدى حابارلامادا.
اتاپ وتىلگەندەي, 4 قازاندا بريۋسسەلدە ەو-قازاقستان سەرىكتەستىك كەڭەسى جاڭا كەلىسىمگە قول قويعاننان كەيىن العاش رەت وتكىزىلگەن. بۇل كەڭەس ۋاقىتشا كەلىسىمدەردى قابىلداۋعا, سونداي-اق, بارلىق سالالارداعى ەكىجاقتى قارىم-قاتىناستى نىعايتۋعا جول اشتى. «قازاقستاننىڭ بۇۇ قاۋىپسىزدىك كەڭەسىنە مۇشەلىككە كىرۋى ءارتۇرلى فورۋمدار اياسىندا ورتاق جۇمىستار اتقارۋىمىزعا, سونداي-اق وڭىرلىك جانە جاھاندىق قاۋىپسىزدىك ماسەلەلەرى توڭىرەگىندە ديالوگ قۇرۋىمىزعا مۇمكىندىك بەرەدى», – دەپ حابارلادى ەو.