تۇركىتىلدەس ەلدەر قالامگەرلەرىنىڭ كىتاپ كورمەسى اشىلدى

شاراعا وڭتۇستىك قازاقستان وبلىسىنىڭ اكىمى جانسەيىت تۇيمەباەۆ, تۇركسوي ۇيىمىنىڭ باس حاتشىسى دۇيسەن قاسەيىنوۆ, تۇركيا, قىرعىزستان, تۇركىمەنستان, وزبەكستان, ازەربايجان, تاتارستان, قازاقستاننىڭ استانا, الماتى قالالارىنىڭ جانە ءوڭىرىمىزدىڭ كورنەكتى قالامگەرلەرى قاتىستى.  بۇگىنگى باس قوسۋ ءتۇبى ءبىر تۇركىتىلدەس ەلدەردىڭ ءوزارا ىنتىماقتاستىق, دوستىق قارىم-قاتىناسىن نىعايتىپ, باۋىرلاس ەلدەردىڭ اقىن-جازۋشىلارىنىڭ شىعارماشىلىق بايلانىسىن دامىتۋ ماقساتىندا ۇيىمداستىرىلدى. كەزدەسۋدە جازۋشىلار تۇركىتىلدەس ەلدەردىڭ, ونىڭ ىشىندە قازاق ادەبيەتىن ناسيحاتتاۋ جايى مەن كەشەگى ەلباسىنىڭ «بولاشاققا باعدار: رۋحاني جاڭعىرۋ» ماقالاسى اياسىندا پىكىر الماستى.  جيىندا ءسوز العان وبلىس اكىمى جانسەيىت تۇيمەباەۆ مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى ايرىقشا, باعدارلامالىق ماقالاسىنىڭ ماڭىزدىلىعىنا توقتالىپ, الداعى ورتاق ماقسات-مىندەتتەردى ءسوز ەتتى.  «جالاۋىن جوعارى ۇستاپ, نامىسىن ەشكىمگە تاپتاتپاعان ەجەلگى تۇرىك حالىقتارىنىڭ بۇگىنگى ۇرپاقتارىنىڭ ءبىر-بىرىمەن رۋحاني تۋىستىق قارىم-قاتىناسى ارقاشان دا جوعارى بولا بەرەدى. سىزدەرگە تۇركى ەلدەرىنىڭ سالت-داستۇرلەرىن, رۋحاني مادەنيەتىن دامىتۋ جولىندا اتقارىپ جاتقان ەڭبەكتەرىڭىز ءۇشىن العىسىم شەكسىز!», – دەدى ايماق باسشىسى.  باسقوسۋدا تۇركسوي ۇيىمىنىڭ باس حاتشىسى دۇيسەن قاسەيىنوۆ, جازۋشى, قىرعىز رەسپۋبليكاسى مادەنيەتىنە ەڭبەگى سىڭگەن قايراتكەر كالەن سىدىقوۆ, جازۋشى, ازەربايجان رەسپۋبليكاسىنىڭ قالامگەرى زاحيد حاليلوۆتار شىعارماشىلىق بايلانىستاردى نىعايتا ءتۇسۋ ماسەلەسىن كوتەردى.  اتالعان شارا اياسىندا تۇركىتىلدەس ەلدەردىڭ ادەبيەتىن, مادەنيەتىن ناسيحاتتاۋ ماقساتىندا تۇركىستانداعى وقو تاريحي مادەني ەتنوگرافيالىق ورتالىعىندا «تۇركى الەمى: ادەبي – مادەني ءداستۇر» اتتى تۇركىتىلدەس ەلدەر قالامگەرلەرى شىعارمالارىنىڭ كىتاپ كورمەسى اشىلدى.  شارا سوڭىندا وبلىس اكىمى بىرقاتار زيالى قاۋىم وكىلىنە وبلىستىڭ 85 جىلدىعىنا وراي العىس حات تابىس ەتىپ, يىقتارىنا شاپان جاپتى. ودان بولەك, جازۋشى ەركىنبەك تۇرىسوۆ, زاكىر اساباەۆ باستاعان 10 اقىن-جازۋشىعا تۇركسوي ۇيىمىنىڭ مادالدارى مەن قۇرمەت گراموتالارى تابىس ەتىلدى.