ەلباسىنىڭ قازاقستان حالقىنا ارناعان «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا جۇكتەلگەن مىندەتتەردىڭ ورىندالۋى بويىنشا بايانداعان اۋدان باسشىسى بۇگىندە شاردارادا 36 گەكتار اۋماقتا يندۋستريالدى ايماق قۇرىلىپ, وندا كاسىپكەرلەرگە قاجەتتى ينفراقۇرىلىم جۇمىستارى جۇرگىزىلىپ جاتقاندىعىن اتاپ ءوتتى.
مۇنان بولەك, ول شاردارا اۋدانى بالىق وڭدەۋ بويىنشا وبلىس كولەمىندە كوش باستاۋشى ايماق ەكەنىن ايتىپ, بۇل باعىتتا وتكەن جىلى جۇمىس ىستەپ تۇرعان 3 بالىق زاۋىتى جالپى 4 مىڭ تونناعا جۋىق بالىق وڭدەپ, 3,2 ملرد. تەڭگەنىڭ ءونىمىن وندىرگەنىن مالىمدەدى. ال ونىڭ 80 پايىزدان استامى شەت ەلدەرگە ەكسپورتتالعان. سونىمەن قاتار, بيىل جىلدىق قۋاتتىلىعى 600 توننانى قۇرايتىن تاعى ءبىر بالىق وڭدەۋ زاۋىتى ىسكە قوسىلىپ, 30 ادامدى جۇمىسپەن قامتىعان. الداعى ۋاقىتتا جاڭادان اشىلعان كاسىپورىندار ەسەبىنەن بالىق ونىمدەرىنىڭ كولەمىن 30%-عا ارتتىرۋ جوسپارلانۋدا ەكەن.
بريفينگتە بولاتبەك قىستاۋوۆ سونىمەن قوسا, «نۇرلى جەر» تۇرعىن ءۇي باعدارلاماسى اياسىندا شاردارا قالاسىنداعى استانا جانە ءال-فارابي كوشەلەرىنەن 40 پاتەرلى كوپقاباتتى 2 تۇرعىن ءۇيدىڭ قۇرىلىسى باستالاتىنىن جەتكىزدى.
«بۇل بويىنشا بۇگىنى تاڭدا جوبالاۋ-سمەتالىق قۇجاتتار ازىرلەنىپ جاتىر. ال بيىلعى جىلى ءۇش اۋىلدىق وكرۋگتە, ياعني, سۇتكەنت, اقشەڭگەلدى, ەگىزقۇم اۋىلدارىندا جەرگىلىكتى بيۋدجەتتەن بولىنگەن 64 ملن. تەڭگەگە ءبىر پاتەرلى 9 ءۇيدىڭ قۇرىلىسى اياقتالىپ, پايدالانۋعا بەرەمىز دەپ وتىرمىز. جالپى شاردارا اۋدانىندا بۇگىنگى تاڭدا 996 وتباسى تۇرعىن ءۇي كەزەگىندە تىركەلگەن. ولاردىڭ ىشىندە 126-سى جەتىم بالالار مەن اتا-اناسىنىڭ قامقورلىعىنسىز قالعان بالالار»,-دەدى اۋدان اكىمى.