«قازاقكونتسەرت» مەملەكەتتىك كونتسەرت ۇيىمى – الماتى قالاسىندا 1960 جىلدارى قۇرىلعان قازاقستانداعى ەڭ ءىرى مۋزىكالىق ۇيىمداردىڭ ءبىرى. ءوزىنىڭ باي تاريحىنىڭ العاشقى كۇندەرىنەن-اق «قازاقكونتسەرت» قازاقستاندىق مادەنيەتتىڭ كوش باسىندا بولدى. بۇل جەردە ەلىمىزدىڭ ۇزدىك ارتىستەرى مەن شىعارماشىلىق ۇجىمدارى باس قوسقان. «قازاقكونتسەرتتە» بارلىق جانرلار ۇسىنىلعان: حالىق ونەرى, كلاسسيكا, ەسترادا. شىعارماشىلىق قۇرامعا فولكلورلىق-ەتنوگرافيالىق انسامبل, «اكادەميا سوليستوۆ» مەملەكەتتىك كامەرالىق وركەسترى, «Astana Musical» تەاترى, ەسترادالىق جانە وپەرالىق انشىلەر كىرەدى. اسحات ماكسيم ۇلى ماەميروۆ – تەاتر ونەرىنىڭ ماگيسترى, دوتسەنت, فيلوسوفيا عىلىمدارىنىڭ دوكتورى (PhD) – ت. جۇرگەنوۆ اتىنداعى قازاق ۇلتتىق ونەر اكادەمياسىن دراما تەاتر رەجيسسەرى ماماندىعى بويىنشا اياقتاعان. «بولاشاق» پرەزيدەنت ستيپەندياسىنىڭ يەگەرى. 2008 جىلى فرانتسيانىڭ تانىمال Université Sorbonne Nouvelle Paris 3 ۋنيۆەرسيتەتىندە ءبىلىم الىپ, دراما ونەرىنىڭ پاريج ۇلتتىق كونسەرۆاتورياسىندا تاعىلىمدامادان وتكەن. 2010 جىلى رەسەي تەاتر ونەرى اكادەمياسىندا (گيتيس) تەاتر ونەرى ماگيسترى دارەجەسىن اياقتاپ شىقتى. ءتۇرلى جىلدارى اسحات ماكسيم ۇلى باتىس قازاقستان وبلىستىق حالىق شىعارماشىلىعى ورتالىعىنىڭ باس رەجيسسەرى, م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتى «رەجيسسۋرا, حورەوگرافيا جانە كدر» كافەدراسىنىڭ وقىتۋشىسى, قۇرمانعازى اتىنداعى ورال مۋزىكالىق كوللەدجىنىڭ «اكتەرلىق ونەر» ءبولىمىنىڭ مەڭگەرۋشىسى, باتىس قازاقستان وبلىستىق قازاق دراما تەاترىنىڭ رەجيسسەرى, ت. جۇرگەنوۆ اتىنداعى قازۇوا «تەاترلىق ونەر» فاكۋلتەتىنىڭ دەكانى, «قازاقستاننىڭ رۋحاني دامۋ قورى» اق-نىڭ ۆيتسە-پرەزيدەنتى, سونداي-اق «قازاق اۋەندەرى» اق-نىڭ پرەزيدەنتى رەتىندە قىزمەت اتقاردى. 2014 جىلدان باستاپ وسى كۇنگە دەيىن ت. جۇرگەنوۆ اتىنداعى قازۇوا «اكتەرلىك شەبەرلىك جانە رەجيسسۋرا» كافەدراسىنىڭ دوتسەنتى بولىپ تابىلادى.
مادەنيەت جانە سپورت ءمينيسترىنىڭ بۇيرىعىمەن تانىمال قازاقستاندىق رەجيسسەر اسحات ماەميروۆ «قازاقكونتسەرت» مەملەكەتتىك كونتسەرت ۇيىمى ديرەكتورىنىڭ مىندەتىن اتقارۋشى بولىپ تاعايىندالدى, دەپ حابارلادى مينيسترلىكتىڭ رەسمي سايتى.