«ساكرالدى قازاقستان» عىلىمي-زەرتتەۋ ورتالىعى قىزمەتىنىڭ نەگىزگى ماقساتى ولكەتانۋ بويىنشا عىلىمي-زەرتتەۋ جۇمىسى, ولكەتانۋ سالاسىنداعى اعارتۋشىلىق جۇمىس, رەسپۋبليكاداعى ولكەتانۋ جۇمىستارىن ادىستەمەلىك قامتاماسىز ەتۋ, مەملەكەتتىك جانە قوعامدىق ولكەتانۋ ۇيىمدارىمەن, جەرگىلىكتى مەملەكەتتىك ورگاندار, ءبىلىم بەرۋ مەكەمەلەرى, قازاقستاننىڭ ارحيۆتەرىمەن, مۋزەيلەرىمەن بىرگە ىنتىماقتاستىقتا ولكەتانۋ تاقىرىبىنداعى عىلىمي-زەرتتەۋ ءىس-شارالارىن ۇيىمداستىرۋ بولىپ ەسەپتەلەدى.
قازىرگى تاڭدا قازاقستاندا قر تۇڭعىش پرەزيدەنتى - ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىندا ۇسىنعان «قازاقستانىڭ قاسيەتتى رۋحاني قۇندىلىقتارى» («قازاقستاننىڭ كيەلى جەرلەرىنىڭ گەوگرافياسى»), «تۋعان جەر» جوبالارىن قۇرۋ ماسەلەلەرى تالقىلانۋ ۇستىندە. باعدارلاما اياسىندا اۋقىمدى ولكەتانۋ جۇمىستارىن جۇرگىزۋدى, ەكولوگيانى جاقسارتۋعا جانە ەلدى مەكەندەردى اباتتاندىرۋعا باسا ءمان بەرۋدى, جەرگىلىكتى دەڭگەيدەگى تاريحي ەسكەرتكىشتەر مەن مادەني نىسانداردى قالپىنا كەلتىرۋدى قولعا الۋ كوزدەلگەن. سونداي-اق, ەلباسى «تۋعان جەر» جوباسىمەن بىرگە جالپىۇلتتىق قاسيەتتى ورىندار ۇعىمىن ءسىڭىرۋ قاجەتتىلىگىن اتاپ ءوتتتى. وسىلايشا, پرەزيدەنت «قازاقستانىڭ قاسيەتتى رۋحاني قۇندىلىقتارى» نەمەسە «قازاقستاننىڭ كيەلى جەرلەرىنىڭ گەوگرافياسى» جوباسىن ۇسىندى. «پاتريوتيزم كىندىك قانىڭ تامعان جەرىڭە, وسكەن اۋىلىڭا, قالاڭ مەن وڭىرىڭە, ياعني تۋعان جەرىڭە دەگەن سۇيىسپەنشىلىكتەن باستالادى. سول سەبەپتى, مەن «تۋعان جەر» باعدارلاماسىن قولعا الۋدى ۇسىنامىن», دەپ اتاپ وتكەن بولاتىن ەلباسى نۇرسۇلتان نازارباەۆ.
«ساكرالدى قازاقستان» عىلىمي-زەرتتەۋ ورتالىعىنىڭ باسشىسى بولىپ بەرىك باقىت ۇلى ابدىعاليەۆ تاعايىندالدى.
بەرىك باقىت ۇلى ابدىعاليەۆ ءال-فارابي اتىنداعى قازاق ۇلتتىق ۋنيۆەرسيتەتىن تامامداعان. قازاقستان ستراتەگيالىق زەرتتەۋلەر ينستيتۋتىندا عىلىمي قىزمەتكەر, ىشكى ساياسات ءبولىمىنىڭ مەڭگەرۋشىسى, ديرەكتوردىڭ ورىنباسارى بولىپ قىزمەت اتقارعان. تەمىرتاۋ قالاسى اكىمىنىڭ ورىنباسارى, جەزقازعان قالاسىنىڭ اكىمى, 2012-2013 جىلدارى قوستاناي وبلىسى ارقالىق قالاسىنىڭ اكىمى قىزمەتتەرىن اتقاردى.